အိန္ဒိယနိုင်ငံဟာ သီရိလင်္ကာနိုင်ငံအတွက် နိုင်ငံတကာငွေကြေးရန်ပုံငွေအဖွဲ့ (IMF) ချေးငွေ ဒေါ်လာ ၂ ဒသမ ၉ ဘီလီယံရရှိဖို့ ထောက်ခံပေးခဲ့ပြီးနောက် ဇန်နဝါရီ ၁၉ ရက်မှာ အိန္ဒိယနိုင်ငံခြားရေးဝန်ကြီး ဆူဘရာမန်ယမ် ဂျိုင်ရှန်ကာဟာ သိရီလင်္ကာမြို့တော် ကိုလံဘိုကို ရောက်ရှိလာပါတယ်။

နိုင်ငံခြားရေးဝန်ကြီး ဆူဘရာမန်ယမ် ဂျိုင်ရှန်ကာဟာ ၂၀၂၁ ခုနှစ်ကတည်းက သီရိလင်္ကာနိုင်ငံကို ၃ ကြိမ်မြောက်ခရီးစဉ် ဖြစ်ပါတယ်။

အိန္ဒိယနိုင်ငံခြားရေးဝန်ကြီးရဲ့ ၂ ရက်တာ ခရီးစဉ်အတွင်း သီရိလင်္ကာနိုင်ငံခြားရေးဝန်ကြီး အလီ ဆာဘရီနဲ့ တွေ့ဆုံခဲ့ပြီး ကြွေးမြီကပ်ဘေးထဲ ကျရောက်နေတဲ့ အိမ်နီးချင်းနိုင်ငံနဲ့ ဆက်ဆံရေး ပိုမိုခိုင်မာလာစေဖို့နဲ့ ၂ နိုင်ငံအကြား အရေးပါတဲ့ သဘောတူစာချုပ် အများအပြားကိုလည်း လက်မှတ်ရေးထိုးခဲ့ကြပါတယ်။

ဂျိုင်ရှန်ကာရဲ့ ခရီးစဉ်အတွင်းမှာ ၂ နိုင်ငံဟာ သီရိလင်္ကာနိုင်ငံမြောက်ပိုင်းရှိ ကျွန်း ၃ကျွန်းကို လွှမ်းခြုံနိုင်မယ့် ပြန်လည်ပြည့်ဖြိုးမြဲ စွမ်းအင်စီမံကိန်း တခုအတွက် နားလည်မှုစာချွန်လွှာကို လက်မှတ်ရေးထိုးနိုင်ဖို့ မျှော်လင့်ကြောင်း သီရိလင်္ကာ လျှပ်စစ်နဲ့ စွမ်းအင်ဝန်ကြီးဌာနမှ သတင်းရင်းမြစ်နှစ်ခုက ဆိုပါတယ်။

ဒီစီမံကိန်းကို အိန္ဒိယက ဝင်မယူသေးခင် တရုတ်ကုမ္ပဏီတခုဆီ အရင်ပေးအပ်ထားတာကြောင့် မနှစ်က အငြင်းပွားမှု ဖြစ်ခဲ့ရပါသေးတယ်။

အိန္ဒိယဟာ သီရိလင်္ကာရဲ့ ကြွေးမြီပြန်လည်ဖွဲ့စည်းရေးအစီအစဉ်ကို အခိုင်အမာ ထောက်ခံပါကြောင်း ကမ္ဘာလုံးဆိုင်ရာ ချေးငွေအဖွဲ့ IMF ကို ပြောကြားခဲ့ပြီး သီရိလင်္ကာနိုင်ငံဟာ သူ့ရဲ့ အနီးဆုံးအိမ်နီးချင်းနိုင်ငံမှာ ဒေါ်လာ ၁ ဘီလီယံလောက် အကြွေးတင်နေတာပါ။

ဒါပေမဲ့ သီရိလင်္ကာနိုင်ငံဟာ ချေးငွေအတွက် IMF အဖွဲ့နဲ့ နောက်ဆုံးသဘောတူညီမှုရဖို့ နိုင်ငံအတွက် အကြီးဆုံး ငွေချေးပေးနိုင်မယ့် တရုတ်နဲ့ အိန္ဒိယ နှစ်နိုင်ငံလုံးဆီက ထောက်ခံမှုကို လိုအပ်နေတာပါ။

ဒီချေးငွေဟာ နှစ်ပေါင်း ၇၀ အတွင်း လူဦးရေ ၂၂ သန်းနီးပါးရှိတဲ့ သီရိလင်္ကာနိုင်ငံကို အဆိုးရွားဆုံး ဘဏ္ဍာရေးအကျပ်အတည်းကနေ လွတ်မြောက်အောင်ကူညီဖို့ မဖြစ်မနေ လိုအပ်နေတာ ဖြစ်ပါတယ်။

မွန်ပြည်နယ်၊ ရေးမြို့နယ်က CDM ကျန်းမာရေးဝန်ထမ်းတွေကို ချေးငွေ ပြန်ပေးဆပ်ဖို့ စစ်ကောင်စီလက်အောက်ခံ ကျန်းမာရေးဌာနက ဖိအားပေးနေတယ်လို့ ကျန်းမာရေးဝန်ထမ်းနဲ့ နီးစပ်တဲ့သူတွေက ပြောပါတယ်။

လက်ရှိ စစ်ကောင်စီလက်အောက်မှာ တာဝန်ထမ်းဆောင်နေတဲ့ ကျန်းမာရေးဝန်ထမ်းတွေက CDM ကျန်းမာရေးဝန်ထမ်းတွေကို ချေးငွေတွေ နှစ်ဆလောက်ကို ပြန်ဆပ်ပေး ရမယ်ဆိုပြီး ဖိအားပေး ခြိမ်းခြောက်ခံနေရတယ်လို့ CDM ကျန်းမာရေးဝန်ထမ်း တယောက်က ပြောပါတယ်။

နောက်ထပ် ကျန်းမာရေးဝန်ထမ်းတဦးက “အခုချိန်က ချေးငွေပြန်ဆပ်ဖို့က အလုပ်တွေလည်း မရှိဘူး။ CDM ဝင်ထားပြန်တော့ တိမ်းရှောင်နေရတဲ့သူတွေလည်း ရှိကြတယ်။ အခုလို ချေးငွေ မပေးသွင်းဘူးဆိုရင် ဝန်ထမ်းဥပဒေနဲ့အညီ အရေးယူတာတွေ၊ စစ်ကောင်စီခန့် ကျန်းမာရေးဦးစီးဌာနဘက်က လုပ်လာမှာကိုလည်း စိုးရိမ်ရတယ်”လို့ ပြောပါတယ်။

​အခု ရေးမြို့ပေါ်ကုသရေး ဆေးရုံ ၅ ခုနဲ့ ကျေးလက်ကျန်းမာရေးဌာန ၈ ခုတွေထဲက CDM ကျန်းမာရေးဝန်းထမ်းတွေ ဖိအားပေးခံနေရတာဖြစ်ပြီး အလုပ်ထဲ ပြန်ဝင်ရောက်လုပ်ပါကလည်း မူလရာထူးနေရာကို မပေးဘဲ နယ်ဘက်ကို ပြောင်းရွှေ့ခံရတဲ့သူတွေလည်း ရှိနေခဲ့တာပါ။

စစ်တပ်အာဏာသိမ်းပြီးတဲ့နောက် ကျန်းမာရေးဝန်ထမ်းအများစုက CDM ပြုလုပ်ခဲ့ကြကာ ဒီနေ့ အထိ ပြည်သူဆေးရုံဆေးခန်းတွေမှာ ဆရာဝန်နဲ့ ဆေးဝါးတွေလုံလောက်မှု မရှိခဲ့တာကြောင့် ကုသရေးအပိုင်းမှာ ငွေကြေးပိုမိုကုန်ကျများတယ်လို့ ဒေသခံတွေက ဆိုပါတယ်။