လျှပ်စစ်မီးပြတ်တဲ့ ပြဿနာကြောင့် ရန်ကုန်မြို့တွင်းပြေးဆွဲနေတဲ့ YBS မော်တော်ယာဉ်လိုင်းတွေ CNG အလုံအလောက် မရရှိတဲ့အတွက် မော်တော်ယာဉ်အစီးရေ အပြည့်အဝ မထွက်နိုင်ဘဲ ဘတ်စ်ကားစီး ခရီးသွားပြည်သူတွေ အခက်ကြုံနေရပါတယ်။
မော်တော်ယာဉ်သုံး သဘာဝဓာတ်ငွေ့ရောင်းဆိုင်တွေမှာ CNG ဖြည့်တင်းစဉ် လျှပ်စစ်မီး ပြတ်တောက်မှုတွေ ဖြစ်နေတဲ့အတွက် ဂက်စ်ဖြည့်ဖို့ အချိန်ကြာမြင့်စွာ စောင့်ဆိုင်းနေရတာကြောင့် မော်တော်ယာဉ်အစီးရေ အလုံအလောက် မထွက်နိုင်ကြောင်း YBS ယာဉ်မောင်းတွေထံက သိရပါတယ်။
သခင်မြပန်းခြံနဲ့ လှိုင်သာယာကို ပြေးဆွဲနေတဲ့ မော်တော်ယာဉ်လိုင်းမှ ယာဉ်မောင်းတဦးက “ရန်ကုန်မှာက လျှပ်စစ်မီးက ပုံမှန်မရတော့ဘူး။ CNG ဆိုင်တွေမှာ ဂက်စ်ဖြည့်ရင် မီးပျက်တဲ့အတွက် အချိန်အကြာကြီး ကားထိုး တန်းစီပြီး စောင့်နေရတယ်။ ဂက်စ်ဆိုင်မှာပဲ တန်းစီပြီး အချိန်ပေးနေရတော့ ကားက မထွက်နိုင်တော့ဘူး။ ကားအလုံအလောက် မထွက်နိုင်တော့ ခရီးသည်တွေလည်း ဒုက္ခရောက်ရတယ်” လို့ ပြောပါတယ်။
ရန်ကုန်မြို့မှာ သဘာဝဓာတ်ငွေ့ CNG အရောင်းဆိုင်ပေါင်း ၄၀ ကျော်ရှိပြီး လျှပ်စစ်မီးမရတဲ့ အခက်အခဲကြောင့် CNG အရောင်းဆိုင်တချို့ ပိတ်ထားတယ်လို့လည်း သူက ဆက်ပြောပါတယ်။
ရန်ကုန်မြို့အတွင်း ပြေးဆွဲနေတဲ့ မော်တော်ယာဉ်လိုင်းတွေ CNG သဘာဝဓာတ်ငွေ့ အလုံအလောက်မရှိလို့ မော်တော်ယာဉ်လိုင်းတွေ အစီးရေ အပြည့်အဝ မထွက်နိုင်တဲ့အတွက် မြို့တွင်းကားမှတ်တိုင်တွေမှာ ခရီးသွားပြည်သူတွေ စုပြုံ စောင့်ဆိုင်းနေကြရတာပါ။
“ခုနောက်ပိုင်း လိုင်းကားတွေက အရင်လောက်မများတော့ဘူး။ မှတ်တိုင်တွေမှာလည်း လူတွေစုပြုံနေတာပဲ။ ညနေပိုင်း အလုပ်သိမ်းချိန်ဆို ကားတစီးလာဖို့ မနည်းစောင့်ရတယ်။ ကားရောက်လာရင်လည်း မနည်းတိုးဝှေ့တက်ပြီး အိမ်ပြန်ရတယ်” လို့ အင်းစိန် ပေါက်တောဝမှတ်တိုင်အနီး နေထိုင်သူ အမျိုးသမီးတဦးက ပြောပါတယ်။
ရန်ကုန်တိုင်းဒေသကြီးအတွင်း YBS ယာဉ်လိုင်း ၁၁၀ ကျော်၊ ယာဉ်အစီးရေ ၃,၀၀၀ ကျော် နေ့စဉ်ပြေးဆွဲနေတယ်လို့ ရန်ကုန်တိုင်းဒေသကြီး ပုဂ္ဂလိက သယ်ယူပို့ဆောင်ရေးကြီးကြပ်မှု ကော်မတီ (YRTC) ရဲ့ ထုတ်ပြန်ချက်အရ သိရပါတယ်။
ရန်ကုန်မှာ လျှပ်စစ်မီးပြတ်နေတာကြောင့် CNG သုံး မော်တော်ယာဉ်တွေ ဓာတ်ငွေ့ဖြည့်ဖို့ အချိန်ကြာမြင့်စွာ စောင့်နေကြရပြီး တချို့ကားသမားတွေကတော့ အချိန်တရက်လောက် ပေးမှသာ ဓာတ်ငွေ့ဖြည့်နိုင်တော့တယ်လို့ CNG မော်တော်ယာဉ်မောင်းတွေထံက သိရပါတယ်။
ရန်ကုန်မှာ လျှပ်စစ်မီးကို အချိန်ပိုင်းနဲ့သာ ရရှိတော့လို့ လျှပ်စစ်မီးအသုံးပြုပြီး ဖြည့်သွင်းရတဲ့ CNG ဆိုင်တွေမှာ CNG သုံး မော်တော်ယာဉ်တွေဟာ မနက်ပိုင်းမှစတင်ကာ ညနေပိုင်းလောက်အထိ တန်းစီစောင့်ဆိုင်းနေကြရသလို တချို့က ညအိပ်စောင့်ဆိုင်းရတဲ့ အခြေအနေတွေအထိ ဖြစ်ပေါ်နေတာပါ။
အရင်က CNG မော်တော်ယာဉ်တွေဟာ ဓာတ်ငွေ့ဖြည့်ဖို့အတွက် တန်းစီစောင့်ဆိုင်းစရာ မလိုတဲ့ ဆိုင်တွေကို ရွေးချယ်ပြီး သွားရောက်ဖြည့်သွင်းနိုင်ပေမဲ့ အခုအခါ တမြို့လုံး လျှပ်စစ်မီးပျက်တာ များပြားနေတဲ့အတွက် CNG ဆိုင်တိုင်းမှာ ကားတွေတန်းစီပြီး နေ့စဉ် စောင့်ဆိုင်းနေရတာလို့ လိုင်းကားမောင်းသူတဦးက ပြောပါတယ်။
“နေ့တိုင်းတော့ မစီရဘူး။ တရက်ခြားပေါ့။ ချောင်မယ့်ဆိုင်ကို လိုက်ကြည့်ရတာ။ အခုက ချောင်တဲ့ဆိုင် မရှိတော့ဘူး။ အကုန်ကျပ်နေတာ။ မီးပျက်၊ ဘာပျက်နဲ့ အကုန်ကျပ်နေတာ။ တချို့ဆို ညပါအိပ်ရတာ” လို့ YBS ၄၀ ယာဉ်မောင်းတဦးက ပြောပါတယ်။
အခုရက်ပိုင်း လျှပ်စစ်မီးပျက်တဲ့ အခြေအနေ ပိုဆိုးလာတဲ့အတွက် CNG ဆိုင်တွေက မီးစက်မောင်းပြီး ဖြည့်သွင်းပေးနေပေမဲ့ ဂက်စ်အိုးအပြည့်မရဘဲ သုံးပုံနှစ်ပုံသာသာလောက်သာ ရရှိလို့ တခါဖြည့်ရင် နှစ်ခေါက်လောက် ပြန်တန်းစီပြီးမှာသာ အိုးအပြည့်ရရှိတယ်လို့ တက္ကစီ ယာဉ်မောင်းတဦးက ပြောပါတယ်။
ခုအခါ စက်သုံးဆီဈေးနှုန်းတွေ မြင့်တက်လာတာကြောင့် ရန်ကုန်မြို့ လမ်းမတွေပေါ်မှာ ယာဉ်သွားလာမှု အရင်ကထက် လျော့နည်းလာပြီး လက်ရှိထွက်နေတဲ့ အငှားယာဉ်တွေကလည်း CNG မော်တော်ယာဉ်တွေသာ အများစုဖြစ်တယ်လို့လည်း သိရပါတယ်။
ရန်ကုန်မြို့အတွင်း CNG ဂက်စ်ဖြည့်နိုင်တဲ့ ဆိုင်ပေါင်း ၃၀ နီးပါးရှိပြီး အဆိုပါ ဂက်စ်ဖြည့်တင်းတဲ့ ပန့်တွေဟာ လျှပ်စစ်မီးအသုံးပြု မောင်းနှင်ရတဲ့အတွက် အခုလို လျှပ်စစ်မီး အချိန်ကြာမြင့်စွာ ပြတ်နေတဲ့အတွက် ဓာတ်ငွေ့ဖြည့်ဖို့ တန်းစီစောင့်ဆိုင်းနေရတဲ့ ကားတွေဟာ ဂက်စ်ဆိုင်တိုင်းလိုလို တွေ့ရတာ ဖြစ်ပါတယ်။
