ဘိုင်ယန်မြူးနစ်အသင်းနည်းပြဟောင်း ဂျူလီယန် နာဂယ်စမန်းဟာ ချဲလ်ဆီးအသင်းရဲ့ နည်းပြရာထူးကနေ ထုတ်ပယ်ခံလိုက်ရတဲ့ ဂရေဟမ်ပေါ်တာ နေရာမှာ အစားထိုးဖို့အတွက် ရေပန်းအစားဆုံး ဖြစ်နေတယ်လို့ တနင်္လာနေ့က ဗြိတိန်မီဒီယာတွေမှာ ဖော်ပြပါတယ်။

ပရီးမီးယားလိဂ်မှာ ငွေကြေးအမြောက်အမြား အကုန်ကျခံပြီး အသင်းကို တည်ဆောက်ခဲ့ပေမဲ့လည်း အမှတ်ပေးဇယားရဲ့ အဆင့် ၁၁ နေရာမှာ ရပ်တည်နေသလို ရလဒ်တွေလည်း ဆက်တိုက်ဆိုးရွားလာတာကြောင့် ချဲလ်ဆီးအသင်းက ပေါ်တာကို အခုလို ထုတ်ပယ်လိုက်တာပါ။

ချဲယ်ဆီးအသင်းရဲ့ လက်ထောက်နည်းပြဖြစ်သူ ဘရူနိုဆယ်တာ ကတော့ နည်းပြအသစ် မခန့်အပ်ခင်အထိ ယာယီနည်းပြအဖြစ် တာဝန်ယူသွားမှာဖြစ်ပြီး လာမယ့်အင်္ဂါနေ့ကျရင်လည်း လီဗာပူးအသင်းနဲ့ စတန်းဖို့ဘရစ်ချ် အိမ်ကွင်းမှာ ယှဉ်ပြိုင်ကစားရဖို့ ရှိပါတယ်။

ချဲလ်ဆီးအသင်းပိုင်ရှင်အသစ်တွေဟာ ပေါ်တာကို ဘရိုက်တန်အသင်းကနေ ပြီးခဲ့တဲ့နှစ်၊ စက်တင်ဘာလမှာ ခေါ်ယူခဲ့တာဖြစ်ပြီး ဒီအင်္ဂလိပ်လူမျိုးနည်းပြအနေနဲ့ ချဲယ်ဆီးအသင်းကို ၃၁ ပွဲ ကိုင်တွယ်ရာမှာ ၁၂ ပွဲသာ အနိုင်ရရှိခဲ့တာကြောင့် ရာထူးကနေ ထုတ်ပယ်ခံလိုက်ရတာပါ။

ချဲလ်ဆီးနည်းပြရာထူးအတွက် သတင်းတွေထွက်ပေါ်နေတဲ့အထဲမှာ စပါးနဲ့ ပီအက်စ်ဂျီအသင်း နည်းပြဟောင်း ပိုချက်တီနို၊ စပိန်နဲ့ ဘာစီလိုနာအသင်း နည်းပြဟောင်း လူးဝစ် အန်းနရစ်၊ ရီးရဲလ်မက်ဒရစ်အသင်း နည်းပြဟောင်း ဇီဒန်း၊ ဖရန့်ဖတ်အသင်းရဲ့ လက်ရှိနည်းပြ အော်လီဗာ ဂလက်စ်နာ၊ စပို့တင်းနည်းပြ ရူဘင် အမိုရင်မ်တို့နဲ့အတူ လက်စတာစီးတီးအသင်းကနေ ထုတ်ပယ်ခံလိုက်ရတဲ့ ဘရန်ဒန် ရော်ဂျာလည်း ပါဝင်နေပါတယ်။

ချဲလ်ဆီးအသင်းဟာ နည်းပြဂရေဟမ်ပေါ်တာကို ထုတ်ပယ်လိုက်ပြီ ဖြစ်ပါတယ်။  စနေနေ့က ပွဲစဉ်မှာ အက်စ်တန်ဗီလာကို နှစ်ဂိုး ဂိုးမရှိနဲ့ရှုံးနိမ့်ခဲ့ပြီးတဲ့နောက်မှာ နည်းပြပေါ်တာနဲ့ ပတ်သက်ပြီး ချဲလ်ဆီးအသင်း တာဝန်ရှိသူတွေက ဆွေးနွေးဆုံးဖြတ်ခဲ့တာပါ။ 

နည်းပြပေါ်တာဟာ အသင်းနဲ့ စုစုပေါင်း ၃၁ ပွဲမှာ ၁၂ ပွဲသာ အနိုင်ရရှိအောင်စွမ်းဆောင်နိုင်ခဲ့ပြီး ပရီးမီးယားလိဂ် အမှတ်ပေးဇယားမှာ အဆင့် ၁၁ နေရာအထိ ရောက်ရှိခဲ့ရတာပါ။ 

နည်းပြဂရေဟမ်ပေါ်တာအပေါ် အမြင့်မားဆုံးသော လေးစားမှုရှိသလို ပရော်ဖက်ရှင်နယ်ပီသမှုနဲ့ သိက္ခာတရားရှိတဲ့ နည်းပြတစ်ဦးဖြစ်ပေမဲ့ ရလဒ်ပိုင်းအရ စိတ်ပျက်စရာဖြစ်ခဲ့လို့ ထုတ်ပယ်ဖို့ ဆုံးဖြတ်ခဲ့တာဖြစ်ကြောင်း ချဲလ်ဆီးအသင်းက သတင်းထုတ်ပြန်ခဲ့ပါတယ်။

ပရီးမီးယားလိဂ်မှာ လက်ကျန် ၁၀ ပွဲ ကစားဖို့ကျန်ရှိသလို ချန်ပီယံလိဂ် ကွာတားဖိုင်နယ်လည်းရှိ နေသေးကြောင်း၊ အဲဒီပြိုင်ပွဲနှစ်ရပ်မှာ အကောင်းဆုံးဖြစ်ဖို့ အတူတကွ ကြိုးပမ်းကြရမှာ ဖြစ်ကြောင်း ချဲလ်ဆီးအသင်းက သတင်းထုတ်ပြန်ပါတယ်။ 

ပေါ်တာဟာ မနှစ်က စက်တင်ဘာလတုန်းက တူချယ်ရဲ့ နေရာကို အစားဝင်လာသူဖြစ်ပြီး ၇ လခန့်အကြာမှာပဲ နည်းပြရာထူးကနေ ဖယ်ရှားခံခဲ့ရတာ ဖြစ်ပါတယ်။