အာဖရိက အလယ်ပိုင်းရှိ ကွန်ဂိုဒီမိုကရက်တစ်သမ္မတနိုင်ငံမှာ  အာဖရိကန်အဆိုတော် ဖလ်လီအီပူပါရဲ့ အောက်တိုဘာ ၂၉ ရက် ဖျော်ဖြေပွဲမှာ လူတွေတိုးကြိတ် နင်းမိပြီး အနည်းဆုံး   ၁၁ ဦး သေဆုံးခဲ့လို့ ပြည်ထဲရေးဌာနက ပြောပါတယ်။

မြို့တော်ကင်ရှာဆာရှိ လူ ၈၀,၀၀၀ ဆန့်တဲ့ အာဇာနည် အားကစားကွင်းကြီးထဲမှာ လူသိများထင်ရှားတဲ့ အာဖရိကန် အဆိုတော် ဖလ်လီအီပူပါရဲ့ ဖျော်ဖြေပွဲကို ပရိတ်သတ်တွေ အများလာရောက် ကြည့်ရှုခဲ့ရာက လူတွေပိတ်မိတိုးမိပြီး ထိခိုက်သေဆုံးခဲ့တာဖြစ်ပါတယ်။ 

ပြည်ထဲရေး ဝန်ကြီး ဒန်နီရယ်လ် အဆီလိုအိုကီတိုကတော့ ဒီဖြစ်ရပ်နဲ့ ပတ်သက်ပြီး ပွဲစီစဉ်သူတွေကို ပြစ်တင်လိုက်ပြီး  လူ ၈၀၀၀၀ ဆန့်တဲ့ အားကစားရုံမှာ သူ့ခံနိုင်စွမ်းထက် ၁၀၀ ရာခိုင်နှုန်းထက် ကျော်လွန်သွားခဲ့ကြောင်းနဲ့ လူတွေတိုးမိပြီး ရဲတပ်ဖွဲ့ဝင် ၂ ယောက်အပါအဝင် ၁၁ ယောက် သေဆုံးသွားတယ်လို့ သတင်းထောက်တွေကို ပြောပါတယ်။  

လူ့အသက်တွေ ဆုံးရှုံးခဲ့ရမှုအတွက် ပွဲစီစဉ်သူဟာ အပြစ်ပေးခံရမယ်လို့လည်း ပြောကြားလိုက်ပါတယ်။

ကင်ရှာဆာမြို့သား အဆိုတော် အီပူပါရဲ့  ဖျော်ဖြေပွဲမတိုင်ခင် အားကစားကွင်းအပြင်ဘက် လမ်းတွေပေါ်မှာ စုဝေးနေသူတွေကို လုံခြုံရေးတပ်ဖွဲ့တွေက မျက်ရည်ယိုဗုံးတွေနဲ့ ပစ်ခတ်လူစုခွဲခဲ့ပါတယ်။

အမေရိကန်နိုင်ငံ ဝါရှင်တန်ဒီစီမြို့တော်မှာ ဇွန် ၁၉ ရက်ကကျင်းပတဲ့ ဂီတဖျော်ဖြေပွဲအတွင်း ပစ်ခတ်မှုဖြစ်ပွားပြီး ဆယ်ကျော်သက် တယောက် သေဆုံးကာ ရဲအရာရှိတယောက်အပါအဝင် လူသုံးယောက် ဒဏ်ရာရခဲ့ပါတယ်။

ဘားတွေနဲ့ စားသောက်ဆိုင်တွေ ထူထပ်တဲ့ ၁၄ လမ်းနဲ့ ယူလမ်း လမ်းဆုံမှာ ညနေပိုင်းက ပစ်ခတ်မှု ဖြစ်ခဲ့တာပါ။ သံသယရှိသူကို ဖမ်းထားပြီလားဆိုတာ ရှင်းရှင်းလင်းလင်း မသိရသေးပါဘူး။

ရဲချုပ် ရောဘတ် ကွန်တေ သရီးက “သာယာလှပတဲ့ရာသီဥတုကို ခံစားချင်သူတွေ၊ အဖေများနေ့ကို ပျော်ပျော်ပါးပါး ဖြတ်သန်းချင်သူတွေအတွက် ဒီလိုမျိုး အဖြစ်အပျက်တွေမှာ တရားမဝင် လက်နက်တွေက လူတွေ လက်ထဲရောက်နေတာ မလုံခြုံဘူး။ ဒါက လက်မခံနိုင်စရာပဲ”လို့ ပြောပါတယ်။

မိုးချယ်လာလို့ ခေါ်တဲ့ ခွင့်မပြုထားတဲ့ ဂီတဖျော်ဖြေပွဲမှာ ပစ်ခတ်မှု ဖြစ်ခဲ့တာလို့ ရဲက ပြောပါတယ်။ ပစ်ခတ်မှု မစခင်က အဲဒီနေရာမှာ လူတယောက်ဆီကနေ သေနတ်တလက် သိမ်းယူ ရရှိခဲ့ပါတယ်။

ဒဏ်ရာရသူ တယောက်ဆီကနေ သူပိုင်တဲ့ နောက်ထပ် သေနတ်တလက်ကို တွေ့ခဲ့တယ်လို့ ရဲက ပြောပါတယ်။

ဒါပေမဲ့ ပစ်ခတ်ချိန်မှာ သုံးတဲ့ သေနတ်ကို ပြန်မသိမ်းနိုင်ခဲ့ကြောင်းနဲ့ ဒဏ်ရာရသူတွေ အခြေအနေ တည်ငြိမ်တယ်လို့ ရဲက ပြောပါတယ်။