စစ်အာဏာရှင်စနစ်ဆန့်ကျင်ရေး၊ စစ်မှန်တဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်နိုင်ရေးအတွက် နှစ်ပေါင်း ၇၀ ကျော် အသက်သွေး ချွေးပေးအပ်ပြီး တိုက်ပွဲဝင်ခဲ့ကြ တဲ့ မွန်လူမျိုးတွေကို ဦးညွှတ်ဂုဏ်ပြုကြောင်း ဒီကနေ့ ကျရောက်တဲ့ ၇၆ နှစ်မြောက် မွန်အမျိုးသား နေ့အတွက် အမျိုးသားညီညွတ်ရေးအစိုးရ (NUG) က ဂုဏ်ပြုသဝဏ်လွှာ ပေးပို့လိုက်ပါတယ်။
ဒါ့အပြင် ရာမညဒေသလို့ အမည်တွင်တဲ့ လက်ရှိမြန်မာနိုင်ငံ တောင်ပိုင်းဒေသမှာ မွန်လူမျိုးတွေဟာ ဗုဒ္ဓသာသနာထွန်းကားရေးအတွက် စေတီပုထိုးကျောင်းကန်တည်ဆောက်တာ၊ မြို့ပြရပ်ရွာတွေ ထူထောင်တာ၊ အိမ်နီးချင်းနိုင်ငံတွေနဲ့ ကူးလူးဆက်ဆံရောင်းဝယ် ဖောက်ကားတာတွေသာမက အရှေ့တောင်အာရှဒေသမှာ ဗုဒ္ဓသာသနာတော်ပြန့်ပွားရေးအတွက် ပါဝင်ဆောင်ရွက်ခဲ့တဲ့ လူမျိုးတမျိုးဖြစ်တယ်ဆိုတာ အထင်အရှားတွေ့ရှိရတယ်လို့လည်း NUG ဂုဏ်ပြုသဝဏ်လွှာမှာ ဖော်ပြပါတယ်။
ခေတ်အဆက်ဆက် ကိုယ်ပိုင်ပြဋ္ဌာန်းခွင့် အပြည့်အဝကျင့်သုံးခဲ့ကြတဲ့ မွန်လူမျိုးတွေဟာ ဗြိတိသျှ ကိုလိုနီလက်အောက်ကို တခြားတိုင်းရင်းသားလူမျိုးတွေနည်းတူ ရောက်ရှိခဲ့ရပြီး ဗြိတိသျှနဲ့ ဂျပန်တို့ကို ဆန့်ကျင် တော်လှန်ရာမှာလည်း တက်ကြွစွာပါဝင်ခဲ့ကြကြောင်း၊ ဒါပေမဲ့ မြန်မာနိုင်ငံ လွတ်လပ်ရေးရရှိပြီးနောက် ဖဆပလခေါင်းဆောင်တွေဆီ မွန်ပြည်နယ်သတ်မှတ်ပေးဖို့ အရေးဆိုတဲ့အခါ ဖဆပလ ခေါင်းဆောင်တွေက ငြင်းပယ်ခဲ့တာကြောင့် လက်နက်ကိုင်တော်လှန်ရေးကို မလွှဲမရှောင်သာ ဆောင်ရွက်ခဲ့ကြရတယ်လို့ ဆိုပါတယ်။
လက်ရှိအချိန်မှာတော့ မြန်မာနိုင်ငံမှာ အကြမ်းဖက်စစ်အာဏာရှင်က နိုင်ငံတော်အာဏာကို လုယူသိမ်းပိုက်ခဲ့ပြီး နိုင်ငံသူ နိုင်ငံသားတွေအပေါ် အကြမ်းဖက်နှိမ်နင်းတာတွေကို နေ့စဉ်ရက်ဆက် ကျုးလွန်နေတာကြောင့် ပြည်သူတရပ်လုံးက ရရာနည်းလမ်းနဲ့ ခုခံတော်လှန်နေကြချိန်မှာ မွန်အမျိုးသားနိုင်ငံရေးအင်အားစုတွေက တခြားသော တိုင်းရင်းသား ပြည်သူတွေနဲ့ စုစည်းလက်တွဲပြီး ဆောင်ရွက်နေတာကို တွေ့ရတယ်လို့ NUG အစိုးရက ပြောပါတယ်။
သာသနာသက္ကရာဇ် ၁၁၁၆ ခုနှစ်၊ တပို့တွဲလပြည့်ကျော် ၁ ရက်မှာ မွန်အမျိုးသား ညီနောင်နှစ်ပါးဖြစ်တဲ့ သမလမင်းနဲ့ ဝိမလမင်းတို့က မျက်မှောက်ခေတ် ပဲခူးမြို့နေရာဒေသမှာ မွန်မျိုးနွယ်စုတွေကို ဦးဆောင်ကာ ပထမဟံသာဝတီ မွန်နေပြည်တော်ကို ထူထောင်ခဲ့ပြီး အဲဒီနေ့ကို မွန်အမျိုးသားနေ့အဖြစ် သတ်မှတ်ခဲ့တာဖြစ်ပါတယ်။
အမိနိုင်ငံတော်ကြီး ဖက်စစ်စနစ်ဆိုးအောက်ကနေ လွတ်မြောက်ရေးအတွက် တိုက်ပွဲဝင်ရင်း ဒီးမော့ဆိုရှေ့တန်းတနေရာမှာ ကျဆုံးခဲ့ကြတဲ့ ရဲဘော် ၂ ယောက်ကို ကရင်နီပြည်အာဇာနည်သူရဲကောင်းတွေအဖြစ် အလေးနီပြု မှတ်တမ်းတင်ဂုဏ်ပြုတယ်လို့ ကရင်နီပြည်သူ့ကာကွယ်ရေးတပ်ဖွဲ့ Karenni People Defense Force – KPDF က ထုတ်ပြန်ပါတယ်။
KPDF ရဲဘော်တွေဖြစ်ကြတဲ့ ရဲဘော် ရဲရင့်နဲ့ လင်းအိမ်သစ်(ခ)လုံဖီးတို့ဟာ ဇန်နဝါရီ ၂၃ ရက် မနေ့က ရှေ့တန်းတိုက်ပွဲမှာ တိုင်းပြည်နဲ့ လူမျိုးအတွက် ရဲရင့်စွာတာဝန်ထမ်းဆောင်ရင်း ကျဆုံးသွားခဲ့ကြတာဖြစ်ပြီး ကျန်ရစ်သူမိသားစုနဲ့အတူ ဝမ်းနည်းကြေကွဲရကြောင်းလည်း ထုတ်ပြန်ချက်မှာ ဖော်ပြပါတယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။
NUG အစိုးရကတော့ ပြည်သူ့ခုခံတွန်းလှန်စစ်ပွဲ စတင်ခဲ့တဲ့ ၁ နှစ်အတွင်း အကြမ်းဖက် စစ်ကောင်စီဘက်က တပ်ဖွဲ့ဝင်ပေါင်း ၂၀,၁၅၀ ကျော်သေဆုံးကာ ဒဏ်ရာရသူ ၇,၀၀၀ ကျော်လောက်ရှိလာပြီး စစ်ကောင်စီ စိုးမိုးအုပ်ချုပ်နိုင်တဲ့နေရာဟာ တိုင်းပြည် နယ်မြေအကျယ်အဝန်းရဲ့ ထက်ဝက်တောင် မရှိတော့ဘူးလို့ NUG ယာယီသမ္မတ ဒူဝါလရှီးလက ပြောကြားထားပါတယ်။
ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်း လမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက သတင်းစာရှင်းလင်းပွဲမှာ ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။
