ဂျပန်ဝန်ကြီးချုပ်ဟောင်းရဲ့ နိုင်ငံတော်ဈာပနသို့ ဖိတ်ကြားတာဟာ မြန်မာစစ်တပ်ရဲ့ တရားဝင်မှုကို ဖြစ်စေတဲ့အပြင် လူ့အခွင့်အရေး ချိုးဖောက်မှုတွေကို အားပေးရာရောက်ကာ နိုင်ငံတော်ဈာပနကို ပိုပြီး မထီမဲ့မြင်ပြုတဲ့ လုပ်ရပ်ဖြစ်တယ်လို့ ဂျပန်အောက်လွှတ်တော်အမတ်ဟောင်းမစ္စတာ Naoto Sakaguchi က ပြောဆိုလိုက်ပါတယ်။
စက်တင်ဘာ ၂၇ ရက်နေ့ ကျင်းပမယ့် ဂျပန်ဝန်ကြီးချုပ်ဟောင်း မစ္စတာ ရှင်ဇိုအာဘေးရဲ့ နိုင်ငံတော်ဈာပနအခမ်းအနားမှာ အကြမ်းဖက်စစ်ကောင်စီရဲ့ တိုကျိုသံအမတ်ကို တက်ရောက်ဖို့ ဖိတ်ကြားခဲ့တာဟာ ဂျပန်အစိုးရရဲ့ နိုင်ငံတော်စျာပနကျင်းမယ် ရည်ရွယ်ချက် ဆန့်ကျင်နေတယ်လို့ ဆိုပါတယ်။
နိုင်ငံတော် ဈာပန ကျင်းပရခြင်း အကြောင်းရင်းက ဒီမိုကရေစီစနစ်ကိုကာကွယ်စောင့်ရှောက်ဖို့ သန္နိဋ္ဌာန်ကို ပြသရေးဖြစ်ကြောင်း ၀န်ကြီးချုပ် Kishida က ပြောကြားခဲ့တာနဲ့ဆန့်ကျင်ပြီး ရွေးကောက်ခံအစိုးရအား အာဏာသိမ်းဖြုတ်ချ၊ ပြည်သူတွေကို အစုလိုက်အပြုံလိုက် သတ်ဖြတ်၊ ဖိနှိပ်ကာ ဒီမိုကရေစီကို ဖျက်ဆီးနေတဲ့ အကြမ်းဖက်စစ်ကောင်စီဝန်ထမ်းကို တက်ရောက်ခွင့်ပြုတာ အံ့ဩမိကြောင်း ဂျပန်လွှတ်တော်အမတ်ဟောင်းမစ္စတာ နအိုတို ဆခခုချိ က ဂျပန်အစိုးရလုပ်ရပ်ကို ဝေဖန်ပြောကြားလိုက်တာပါ။
မစ္စတာ Naoto Sakaguchi က “ဂျပန်အစိုးရရဲ့ လုပ်ရပ်က မှားနေပေမယ့် မြန်မာနိုင်ငံက ပြည်သူတွေကို ကျနော်အပါအဝင် ဂျပန်ပြည်သူတွေက မမေ့ကြပါဘူး။ မြန်မာနိုင်ငံ စစ်ကောင်စီအောက်က လွတ်မြောက်ရေးကို မြန်မာပြည်သူတွေနဲ့အတူ အောင်ပွဲရ ဒီမိုကရေစီ ပြန်ရသည်အထိ လက်တွဲအားပေးမယ်” လို့ ဒီဗွီဘီကို ပြောဆိုခဲ့ပါတယ်။
အကြမ်းဖက်စစ်ကောင်စီရဲ့သံအမတ်ကို ဖိတ်ကြားတာက စစ်ကောင်စီကို အသိအမှတ်ပြုရာရောက်နိုင်တာမို့ ဂျပန်ရောက်မြန်မာနိုင်ငံသားတွေသာမက ဂျပန်လွှတ်တော်အမတ်တွေ၊ ဂျပန်လူ့အခွင့်အရေးလှုပ်ရှားနေသူတွေကပါ ဂျပန်အစိုးရကို သွားရောက်တွေ့ဆုံပြီး ကြိုတင်ကန့်ကွက်ပြောဆိုနေတဲ့ကြားက အခုလိုတက်ရောက်ဖို့ ဖိတ်ကြားခဲ့တာဖြစ်ပါတယ်။
စက်တင်ဘာ ၁၉ ရက်နေ့က ကျင်းပခဲ့တဲ့ အင်္ဂလန် ဘုရင်မကြီး အဲလိဇဘက် ၂ ရဲ့ နိုင်ငံတော်ဈာပနအခမ်းအနားကို မြန်မာကိုယ်စားလှယ်တွေ တက်ရောက်ခွင့်မပြုခဲ့တဲ့ ဗြိတိန် အစိုးရလို ဂျပန်အစိုးရအနေနဲ့ ပြတ်သားမှုမရှိဘဲ ကိုယ့်ပြည်သူတွေကို ရက်ရက်စက်စက် သတ်ဖြတ်ဖြိုခွင်းနေတဲ့ အကြမ်းဖက်စစ်ကောင်စီရဲ့ ကိုယ်စားလှယ်တဦးကို ဘာကြောင့် ဖိတ်ကြားခဲ့တယ်ဆိုတာ မိမိအပါအဝင် ဒီမိုကရေစီဘက်တော်သားတွေအနေနဲ့ နားမလည်အောင် ဖြစ်ရကြောင်း CDM သံတမန်အရာရှိ ဦးအောင်စိုးမိုးက ဂျပန်သတင်းဌာနတွေကို ဒီနေ့ ပြောကြားခဲ့ပါတယ်။
စက်တင်ဘာ ၂၇ ရက်နေ့ ကျင်းပမယ့် ဂျပန်ဝန်ကြီးချုပ်ဟောင်းရှင်ဇိုအာဘေးရဲ့ စျာပနကို အမေရိကန် ဒုသမ္မတ ကမာလာ ဟဲရစ်စ်၊ အိန္ဒိယဝန်ကြီးချုပ် မိုဒီ၊ သြစတြေးလျ ဝန်ကြီးချုပ် အန်တိုနီ အယ်လ်ဘနိစ် တို့အပါအဝင် နိုင်ငံပေါင်း ၂၁၇ နိုင်ငံက ဧည့်သည်တော်ပေါင်း ၇၀ဝ လောက်ကို ဖိတ်ကြားထားပြီး ဂျပန်ပြည်သူ ၆၀ ရာခိုင်နှုန်းကျော်က မပြုလုပ်ဖို့ ကန့်ကွက်နေကြသလို အတိုက်အခံပါတီခေါင်းဆောင်အားလုံးက တက်ရောက်မှာမဟုတ်ဘူးလို့ ကြေညာထားပါတယ်။
မစ္စတာ Naoto Sakaguchi ဟာ မြန်မာနိုင်ငံ ဒီမိုကရေစီထွန်းကားရေး အားပေးဆောင်ရွတ်နေတဲ့ နိုင်ငံရေးသမားတဦးဖြစ်ပြီး မြန်မာနိုင်ငံ ရွေးကောက်ပွဲကာလတွေမှာ သွားရောက်လေ့လာစောင့်ကြည့်ခဲ့သူတဦးဖြစ်ပြီး နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့လည်း အကြိမ်များစွာ တွေ့ဆုံဆွေးနွေးခဲ့သူတဦးလည်းဖြစ်ပါတယ်။
သေနတ်သမားရဲ့ လုပ်ကြံသတ်ဖြတ်ခံခဲ့ရတဲ့ ဂျပန်ဝန်ကြီးချုပ်ဟောင်း ရှင်ဇိုအာဘေး ကွယ်လွန်သွားပြီလို့ NHK ဂျပန်ရုပ်သံက အတည်ပြု ကြေညာသွားပါတယ်။
အသက် ၆၇ နှစ်အရွယ် ရှင်ဇိုအာဘေးဟာ ဇူလိုင် ၈ ရက် ဒီနေ့မနက် ၁၁ နာရီခွဲလောက်က နိုင်ငံအနောက်ပိုင်း နာရာမြို့ရှိ ရထားဘူတာရုံတခုအနီးမှာ မဲဆွယ်စည်းရုံးရေးမိန့်ခွန်း ပြောနေချိန်မှာ သေနတ်နဲ့ ပစ်သတ်ခံခဲ့ရတာပါ။
အခြေအနေ ဆိုးရွားတာကြောင့် ဆေးရုံကို အမြန်ပို့ဆောင်ခဲ့ရပြီး အစောပိုင်းက သတင်းစာရှင်းလင်းပွဲတခုမှာ လက်ရှိဂျပန်ဝန်ကြီးချုပ် ဖူမီအိုခီရှိဒက အာဘေးရဲ့ အခြေအနေကို အတည်ပြုခဲ့ပြီး ဆရာဝန်တွေက သူ့ကိုကယ်တင်ဖို့ ကြိုးစားလုပ်ဆောင်နေကြောင်း ပြောကြားခဲ့ပါတယ်။
သူ့ရဲ့အသက်ကို ကယ်တင်ဖို့ ကြိုးစားခဲ့ပေမဲ့ ဒီကနေ့ညနေ ၅ နာရီ ၃ မိနစ်မှာတော့ ကွယ်လွန်သွားပြီဖြစ်တဲ့အကြောင်း ဆေးရုံက ဆရာဝန်တွေရဲ့ ပြောဆိုချက်ကို ကိုးကားပြီး Nikkei Asia ဂျပန်သတင်းမှာ ရေးပါတယ်။
အာဘေးဟာ ဂျပန်နိုင်ငံရဲ့ သက်တမ်းအရှည်ဆုံး ခေါင်းဆောင်ဖြစ်ပြီး နိုင်ငံရဲ့ ဝန်ကြီးချုပ်အဖြစ် နှစ်ကြိမ် တာဝန်ထမ်းဆောင်ဖူးပါတယ်။
ရှင်ဇိုအာဘေးကို ပစ်ခတ်သူဟာ အသက် ၄၁ နှစ်အရွယ် အမျိုးသား ယာမဂါမိ တက်ဆုယ ဖြစ်ပြီး သူ့ကို လတ်တလောမှာ လူသတ်ဖို့ကြိုးစားမှုနဲ့ ဖမ်းဆီးထားပါတယ်။ သူဟာ ဂျပန်ရေကြောင်း ကိုယ်ပိုင်ကာကွယ်ရေးတပ်မှာ ၂၀၀၅ ခုနှစ်အထိ ၃ နှစ်ကြာ အလုပ်လုပ်ခဲ့တယ်လို့ ကာကွယ်ရေး တာဝန်ရှိသူတွေက ပြောပါတယ်။
