ဒိန်းမတ်အသင်းဟာ သူတို့ရဲ့အသင်းဂျာစီကို အရောင်တစ်မျိုးတည်းနဲ့သာဒီဇိုင်းထုတ်လုပ်ပြီး ကမ္ဘာ့ဖလား အိမ်ရှင်ကာတာကို သပိတ်မှောက်သွားမှာဖြစ်ပါတယ်။

အိမ်ကွင်းဂျာစီအနီရောင်၊ ဒုတိယဝတ်စုံအဖြူရောင်တွေရဲ့ လိုဂို၊ အမှတ်တံဆိပ်နဲ့ စပွန်ဆာအမည်တွေကို အရောင်တစ်မျိုး တည်းနဲ့သာဒီဇိုင်း ထုတ်လုပ်ခဲ့တာပါ။

ဒါ့အပြင်တတိယဝတ်စုံမှာတော့ အားလုံးကို အနက်ရောင် တစ်မျိုး တည်းသာအသုံးပြုပြီး ဒီဇိုင်းထုတ်လုပ်ထားတာပါ။

ဒါဟာ ကာတာနိုင်ငံကဘောလုံးကွင်းတွေမှာအလုပ်လုပ်ရင်း ကွယ်လွန်သွားခဲ့ကြသူတွေအတွက် ဝမ်းနည်းခြင်းအထိမ်းအမှတ်အနေနဲ့ ထုတ်လုပ်ထားတာဖြစ်ပါတယ်။

ကာတာနိုင်ငံဟာ ဘောလုံးကွင်းတွေတည်ဆောက်ရေးမှာ ရွှေ့ပြောင်းအလုပ်သမားတွေကိုအပေါ် လူ့အခွင့်အရေးချိုးဖောက်မှုတွေရှိခဲ့ပြီး လူပေါင်း ၆၀၀၀ ခန့်သေဆုံးခဲ့ရပါတယ်။

ဒိန်းမတ်အသင်းဟာ ကာတာကမ္ဘာ့ဖလား အုပ်စု D မှာ ပြင်သစ်၊ တူနီးရှား၊ သြစတြေးလျအသင်းတွေနဲ့ တစ်အုပ်စုတည်း ကျရောက်နေပြီး  နိုဝင်ဘာ ၂၂ ရက်မှာ တူနီးရှားနဲ့ စတင်ကစားသွားရမှာဖြစ်ပါတယ်။ 

မြန်မာ့နွေဦးတော်လှန်ရေးမှာ တက်တက်ကြွကြွပါဝင်နေကြတဲ့ ပြည်သူ့ဘက်တော်သား ဟားငါးကောင်အဖွဲ့ကို အင်္ဂလန်ပရီးမီးယားလိဂ် ဘောလုံးကလပ်အသင်းတသင်းဖြစ်တဲ့ ဘရန်းဖို့ဒ်အသင်းက ဂုဏ်ပြု ဂျာစီတစုံကို ပေးပို့ခဲ့တယ်လို့ သိရပါတယ်။

ဒီအကြောင်းနဲ့ ပတ်သက်ပြီးတော့ ဟားငါးကောင်အဖွဲ့မှ လူရွှင်တော် ပိုးလေးက “ပရီးမီးယားလိဂ်မှာ ကန်နေတဲ့ Brentford ဘောလုံးအသင်းသားတွေ လက်မှတ်ထိုးထားတဲ့ သူတို့အသင်းရဲ့ဝတ်စုံတစုံ ပေးပို့လာပါတယ်။ ဟားငါးကောင်အဖွဲ့ဟာ နွေဦးတော်လှန်ရေးမှာ အမှန်တရားဘက် ရပ်တည်တဲ့အတွက် ဂုဏ်ပြုတာလို့လည် သိရပါတယ်။ အမှန်တရားဘက်ကသာရပ်တည်ရင် မြန်မာပြည်သူတွေကသာမက ကမ္ဘာကြီးကပါ ပစ်မထားပါဘူးဆိုတာ သက်သေပါပဲ။” လို့ ပြောပါတယ်။

ဘရန်းဖို့ဒ် ဘောလုံးအသင်းဟာ မြန်မာ့နွေဦးတော်လှန်ရေးကို အားပေးထောက်ခံကြောင်း သူတို့ရဲ့ အင်တာနက်စာမျက်နှာမှာ ရေးခဲ့တဲ့အသင်းတသင်းဖြစ်ပြီး လက်ရှိပေးပို့လာတဲ့ အသင်းဂျာစီပေါ်မှာတော့ အသင်းသား ကစားသမားတွေ လက်မှတ်ရေးထားထားကြပြီး ဟားငါးကောင်အဖွဲ့ရဲ့ အစစာလုံးတွေဖြစ်တဲ့ “HK5”လို့ ရေးသားထားတာကို တွေ့ရပါတယ်။

ဟာသလူရွှင်တော် တိုင်းကျော်၊ ပြည်ကျော်၊ တိုးကျော်၊ ဝိုင်းကျော်နဲ့ ပိုးလေးတို့ ပူးပေါင်းထားတဲ့ ဟားငါးကောင်အဖွဲ့ကို ဦးသိန်းစိန်အစိုးရလက်ထက်မှာ စတင်ဖွဲ့စည်းခဲ့တာဖြစ်ပြီး ဦးသိန်းစိန်အစိုးရနဲ့ အန်အယ်လ်ဒီအစိုးရတွေကို ပြက်လုံးတွေထုတ်ခဲ့တဲ့ လူရွှင်တော်အဖွဲ့ဖြစ်ကာ လက်ရှိအာဏာသိမ်းစစ်ကောင်စီလက်ထက်မှာလည်း ပြည်သူတွေနဲ့ တသားတည်းရပ်တည်ကာ ရှေ့တန်းကနေ အနုပညာ အလုပ်တွေကို ဆက်လုပ်နေပြီး တော်လှန်ရေးမှာ တထောင့်တနေရာက ပါဝင်နေကြတာ ဖြစ်ပါတယ်။

နွေဦးတော်လှန်ရေးမှာ စစ်အာဏာရှင်ကိုတော်လှန်တဲ့ ပြည်သူတွေကို စစ်ကောင်စီကအကြမ်းဖက်ခဲ့သလို ပြည်သူဘက်ကရပ်တဲ့ အနုပညာသမားတွေကိုလည်း စစ်ကောင်စီက ဖမ်းဆီးထောင်ချခဲ့ပါတယ်။ ဟားငါးကောင်အဖွဲ့ကိုလည်း စစ်ကောင်စီကလိုက်လံဖမ်းဆီးတာကြောင့် တောထဲကိုတိမ်းရှောင်လာရသလို လက်ရှိအချိန်မှာ လွတ်မြောက်နယ်ရဲ့ တနေရာမှာရှိပြီး အာဏာရှင်တော် လှန်ရေးကို တစိုက်မတ်မတ် လုပ်ကိုင်နေတာ ဖြစ်ပါတယ်။