လိဒ်ယူနိုက်တက်နဲ့ပွဲစဉ်မှာ ရရှိခဲ့တဲ့ပင်နယ်တီကို ဟာလန်းက ကိုယ်တိုင်မကန်ဘဲ ကွင်းလယ်လူ ဂွမ်ဒိုဂမ်ကို ပေးကန်ခဲ့တဲ့အပေါ် နည်းပြဂွါဒီယိုလာက မကျေမနပ်ဖြစ်နေပါတယ်။

မန်စီးတီးအသင်းဟာ ဘုန်းမောက်အသင်းကို ၂ ဂိုး ဂိုးမရှိနဲ့ အနိုင်ရရှိနေတဲ့အချိန်မှာ ပင်နယ်တီကန်ခွင့်ရရှိခဲ့တာပါ။

ပင်နယ်တီကန်သွင်းဖို့ တာဝန်ပေးခံထားရသူ ဟာလန်းဟာ အစောပိုင်းမှာ သွင်းဂိုးနှစ်ဂိုးရရှိထားတဲ့ အသင်းဖော် ဂွမ်ဒိုဂမ်ကို ဟတ်ထရစ်သုံးဂိုးရရှိစေဖို့အတွက် ပင်နယ်တီပေးကန်ခဲ့တာပါ။ 

ဒါပေမဲ့ ဂွမ်ဒိုဂမ်က ပင်နယ်တီလွဲချော်ခဲ့ပြီး  ၁ မိနစ်အတွင်းမှာပဲ ဘုန်းမောက်က ချေပဂိုး သွင်းသွားတာကြောင့် မန်စီးတီးတို့ နောက်ဆုံးမိနစ်အထိ အကြိတ်အနယ်ယှဉ်ပြိုင်ခဲ့ရတာပါ။

ဂမ်ဒိုဂမ်အနေနဲ့ ဟတ်ထရစ်ရမယ်ဆိုရင် နှစ်သက်စရာဖြစ်ပေမဲ့ ပရီးမီးယားလိဂ်လိုပြိုင်ပွဲမှာ ၂ ဂိုး ပြတ်နဲ့ ရလဒ်ဟာ ဘာမဆိုဖြစ်သွားနိုင်တာကြောင့် ဦးစားပေးကန်သွင်းသူ ဟာလန်းသာ ပင်နယ်တီ ဆက်ကန်သင့်ကြောင်း ဂွါဒီယိုလာက ပြောပါတယ်။ 

ဘယ်လိုပဲဖြစ်ဖြစ် အနိုင် ၃ မှတ်ရရှိခဲ့ပြီး ပင်နယ်တီကန်သွင်းတဲ့ကိစ္စကတော့ သင်ခန်းစာ ယူနိုင်လိမ့်မယ်လို့မျှော်လင့်ကြောင်း ဂွါဒီယိုလာက ပြောပါတယ်။ 

အင်္ဂလန်လက်ရွေးစင်အသင်းလူစာရင်းက သုံးသင်းစာအထိရှိနေကြောင်း  ဂျာမနီကွင်းလယ်လူ ဂွမ်ဒိုဂမ် ကချီးကျူးသွားပါတယ်။

ဂျာမနီဟာ ဇွန် ၈ ရက်မနက်က  နေးရှင်းလိဂ် အုပ်စုပွဲစဉ် အနေနဲ့  အင်္ဂလန်အသင်းကို အိမ်ကွင်းမှာလက်ခံကစားသွားရမှာပါ။

ပွဲမတိုင်ခင်သတင်းစာရှင်းလင်းပွဲမှာ အင်္ဂလန်အသင်းရဲ့ လူစာရင်းတောင့်တင်းမှုကို ဂွမ်ဒိုဂမ်က ချီးကျူးခဲ့ပြီး ဂျာမနီအသင်းအနေနဲ့ ပြင်ဆင်မှုတွေသေချာလုပ်ဆောင်ဖို့လိုအပ်ကြောင်း ပြောပါတယ်။

အင်္ဂလန်အသင်းက အလွန်တောင့်တင်းတဲ့လူစာရင်းပိုင်ဆိုင်ထားတယ်။ ပွဲထွက် ၁၁ ဦးစာရင်းမှာ  တစ်နေရာကို မတူညီတဲ့ ကစားသမား ၃ ဦး အထိ အလွယ်တကူပွဲထွက်လို့ရကြောင်း၊ အဲဒီလို အင်အားတောင့်တင်းမှုကို စိန်ခေါ်နိုင်ဖို့အတွက်  အသင်းဘက်ကလည်း သေချာပြင်ဆင်ထားဖို့ လိုအပ်ပြီး သူတို့ရဲ့ စိတ်ပြင်းပြမှုကို လိုက်မီဖို့လိုကြောင်း၊ ဖျက်ထုတ်မှုတွေသေချာလုပ်ဖို့လိုပြီး  ကြံ့ခိုင်မှုပိုင်းဆိုင်ရာကလည်း ဒီပွဲမှာ အရေးပါတဲ့အချက်ဖြစ်လာလိမ့်မှာဖြစ်ကြောင်း မန်စီးတီးကွင်းလယ်လူ ဂွမ်ဒိုဂမ် ကပြောပါတယ်။

ဂျာမနီနည်းပြ ဟန်ဆီဖလစ်ခ်ကတော့ ဂျာမန်ကစားသမားတွေဟာ ပရီးမီးယားလိဂ် မှာပြောင်းရွှေ့ကစားနေကြလို့ ခြေစွမ်းတိုးတက်လာတယ်လို့ ချီးကျူးသွားပါတယ်။