ထိုင်ဝမ်ရဲ့ မဟာမိတ်နိုင်ငံ နည်းနည်းထဲက တနိုင်ငံဖြစ်တဲ့ ဂွါတီမာလာနိုင်ငံကို ထိုင်ဝမ်သမ္မတ ဆိုင်အင်ဝမ်က ၃ ရက်ကြာ သွားရောက်ခဲ့ပြီး ဧပြီ ၂ ရက်မှာ ခရီးစဉ် ပြီးစီးခဲ့ပါတယ်။

ဒီခရီးစဉ်အတွင်း ဆိုင်အနေနဲ့ ဂွါတီမာလာသမ္မတ အလီဟန်ဒရို ဂျီယမ်မန်တီ အစိုးရကို ပိုမို ပူးပေါင်းဆောင်ရွက်ဖို့ ကမ်းလှမ်းခဲ့တယ်လို့ သိရပါတယ်။ 

ဟွန်းဒူးရက်စ်နိုင်ငံက တရုတ်ပြည်မကြီးအစိုးရအပေါ် ထောက်ခံတဲ့အနေနဲ့ တိုင်ပေနဲ့ သံတမန်ရေး အရ အဆက်အသွယ် ဖြတ်တောက်အပြီး တစ်ပတ်အကြာမှာပဲ ဆိုင်ရဲ့ ဒီခရီးစဉ် ထွက်ပေါ်လာ ခဲ့တာပါ။

၁၉၄၉ ခုနှစ်မှာ တရုတ်ပြည်တွင်းစစ် ပြီးဆုံးခဲ့ချိန်ကစလို တရုတ်ပြည်မကြီးနဲ့ ထိုင်ဝမ်ဟာ လက်တင် အမေရိကနိုင်ငံတွေ အပေါ် လွှမ်းမိုးနိုင်ဖို့ အပြိုင်အဆိုင် ကြိုးပမ်းခဲ့ကြပါတယ်။

ထိုင်ဝမ်ဟာ တရုတ်ပိုင်နက် တစ်စိတ်တစ်ပိုင်းဖြစ်တယ်လို့ တရုတ်ပြည်မကြီး အစိုးရဘက်က ယူဆထားပေမယ့်လည်း ထိုင်ဝမ် အစိုးရဘက်ကတော့ အပြင်းအထန် ငြင်းဆိုထားပါတယ်။

ဒီ နှစ်နိုင်ငံစလုံးနဲ့ သံတမန်ဆက်ဆံရေး တပြိုင်နက်ထားရှိတာမျိုးအပေါ် တရုတ်ဘက်က တခြားနိုင်ငံတွေကို ခွင့်ပြုဖို့ ငြင်းဆန်ထားပါတယ်။ 

ဆိုင်ရဲ့ ဂွါတီမာလာ ခရီးစဉ်အတွင်း ကျေးလက်ဒေသဖွံ့ဖြိုးရေးအတွက် ဒေါ်လာ ၄ သန်းတန် သဘောတူညီချက်ကို လက်မှတ်ရေးထိုးခဲ့ပြီး နှစ်နိုင်ငံအကြား ပူးပေါင်း ဆောင်ရွက်မှု မြှင့်တင်ဖို့ လည်း ကတိပြုခဲ့ပါတယ်။ 

ထိုင်ဝမ်နဲ့ သံတမန် ဆက်ဆံရေးရှိတဲ့ နိုင်ငံ ၁၃ နိုင်ငံထဲက တစ်ခုဖြစ်တဲ့ ဂွါတီမာလာကို ရောက်မလာခင် ဆိုင်က နယူးယောက်မြို့မှာ အငြင်းပွားဖွယ်ရာ ခရီးတစ်ထောက်နားခဲ့တာကြောင့် တရုတ်နိုင်ငံအတွက် ဒေါသထွက်စရာ ဖြစ် ခဲ့ပါတယ်။ 

တရုတ်ဘက်က ဆိုင်ကို အမေရိကန်တာဝန်ရှိသူတွေနဲ့ မတွေ့ဆုံဖို့ အကြိမ်ကြိမ် သတိပေးထား ခဲ့တာပါ။ 

မကြာသေးမီ နှစ်တွေအတွင်း လက်တင်အမေရိကနိုင်ငံတွေမှာ တရုတ်နိုင်ငံရဲ့ သြဇာလွှမ်းမိုးမှု မြင့်တက်လာခဲ့ပြီး နီကာရာဂွါ၊ အယ်လဆာဗေးဒိုး၊ ပနားမားနဲ့ ကော်စတာရီကာနိုင်ငံတို့ကလည်း တရုတ်ပြည်မကြီးအစိုးရ အလိုကျ ထိုင်ဝမ်အစိုးရကို စွန့်ပယ်ခဲ့ပါတယ်။ 

ဂွါတီမာလာ သမ္မတဘက်ကတော့ ဒီဗဟိုအမေရိကနိုင်ငံကို လာရောက်လည်ပတ်ခဲ့တဲ့ ဆိုင်အပေါ်မှာ ကျေးဇူးတင်ကြောင်း ပြသခဲ့ပါတယ်။

မက္ကဆီကိုနိုင်ငံအရှေ့ပိုင်း ဗီရာခရုဇ်ပြည်နယ်မှာ စွန့်ပစ်ထားတဲ့ နောက်တွဲပါ ကုန်တင်ကားထဲကနေ ဂွါတီမာလာနိုင်ငံက အဖော်မပါ၊ အရွယ်မရောက်သေးသူ ၁၀၃ ဦးကို မက္ကဆီကို အာဏာပိုင်တွေက တွေ့ရှိခဲ့ကြောင်း အစိုးရက မတ် ၆ ရက်မှာ ပြောလိုက်ပါတယ်။

ဒါဟာ မက္ကဆီကိုကို ဖြတ်ပြီး သွားလာနေတဲ့ ရွှေ့ပြောင်းကလေးတွေကို လတ်တလော ရှာဖွေတွေ့ရှိမှု အကြီးမားဆုံးပမာဏ ဖြစ်တယ်လို့လည်း ဆိုပါတယ်။

ကလေး ၁၀၃ ဦးအပြင် နောက်တွဲယာဉ်ထဲမှာ ဂွါတီမာလာ၊ ဟွန်ဒူးရပ်စ်၊ အယ်လ်ဆာဗေးဒိုးနဲ့ အီကွေဒေါတို့က အရွယ်ရောက်ပြီးသူ ၂၁၂ ဦးတို့နဲ့အတူ ဂွါတီမာလာနဲ့ အယ်လ်ဆာဗေးဒိုး နိုင်ငံတို့မှ မိသားစုဝင် ၂၈ ဦးတို့ကိုလည်း တွေ့ရှိခဲ့ရကြောင်း အမျိုးသား ရွှေ့ပြောင်းနေထိုင်ရေး ဆိုင်ရာ အဖွဲ့အစည်း (INM) ရဲ့ ထုတ်ပြန်ချက်မှာ ဖော်ပြထားပါတယ်။

အာဏာပိုင်တွေဟာ အဝေးပြေးလမ်းမပေါ်မှာ ယာဉ်မောင်းမပါရှိတဲ့ နောက်တွဲယာဉ်ကို တွေ့ရှိရတာဖြစ်ကြောင်း INM က ပြောပါတယ်။

နောက်တွဲယာဉ်ကို ပန်ကာတွေတပ်ထားပြီး လေဝင်လေထွက်ရှိအောင် အမိုးတစိတ်တပိုင်း ထုတ်ထားတဲ့အပြင် နောက်တွဲယာဉ်အတွင်းပိုင်းမှာ ၂ ထပ်ကန့်ပြီး ဖန်တီး တည်ဆောက်ထားပါတယ်။

ကလေးငယ်တွေကို ဗီရာခရုဇ်ရဲ့ မိသားစုစောင့်ရှောက်ရေးစနစ်မှာ ထိန်းသိမ်းထားမှာဖြစ်ပြီး တခြားရွှေ့ပြောင်းနေထိုင်သူတွေကိုလည်း မက္ကဆီကိုမှာ သူတို့ရဲ့ တရားရေးအခြေအနေကို ဆုံးဖြတ်ဖို့ စီမံဆောင်ရွက်သွားမှာဖြစ်ကြောင်း INM က ပြောပါတယ်။

အခုနှစ် အစောပိုင်းတုန်းကလည်း မက္ကဆီကိုအာဏာပိုင်တွေဟာ ဂွါတီမာလာက အဖော်မပါတဲ့ အရွယ်မရောက်သေးသူ ၅၇ ဦးကို အမေရိကန်-မက္ကဆီကို နယ်စပ်အနီးရှိ စစ်ဆေးရေးဂိတ်တခုမှာ တွေ့ရှိခဲ့ပြီး တောင်ပိုင်း ချီယာပါစ်ပြည်နယ်မှာလည်း ဗဟိုအမေရိကမှ အများစုပါဝင်တဲ့ အုပ်စုတစုထဲမှာ တခြား အရွယ်မရောက်သေးသူ အယောက် ၂၀ ကို တွေ့ရှိခဲ့ပါသေးတယ်။