ရခိုင်ပြည်နယ်၊ ကျောက်ဖြူမြို့နယ်မှာ စစ်ကောင်စီတပ်စခန်းအတွက် လျှပ်စစ်မီးသွယ်တန်းဖို့ လုပ်ငန်းတွေ ဆောင်ရွက်နေတာကြောင့်  ငါးဖမ်းသမားတွေကို ငါးဖမ်းခွင့် တလပိတ်ပင်ထားတယ်လို့ ဒေသခံတွေက ပြောပါတယ်။

ကျောက်ဖြူမြို့နယ် အုန်းကျွန်းက လျှပ်စစ်မီးသွယ်တန်းနေတာကြောင့် မဒေးကျွန်းနဲ့ သစ်ပုတ်တောင်ရွာက ကျားပိုက်ငါးဖမ်းသမားတွေကို ဖေဖော်ဝါရီ ၂၁  ရက်ကစပြီး တလကြာ ငါးဖမ်းခွင့် ပိတ်လိုက်တယ်လို့ သစ်ပုတ်တောင်ကျေးရွာက ငါးဖမ်းလုပ်ငန်း လုပ်ကိုင်နေသူ တစ်ဦးက ပြောပါတယ်။

"အုန်းကျွန်းက စစ်တပ်စခန်းကို လျှပ်စစ်မီးကြိုးသွယ်တန်းနေကြတာရှိတယ်။ အဲဒီမှာ စစ်တပ်က သင်္ဘောတွေ သွားလာနေကြတယ်။ အဲဒါကြောင့် ရေတပ်က လာပြောသွားတယ်။ ဒေသခံတွေက ဒီငါးဖမ်းလုပ်ငန်းနဲ့ အဓိက သက်မွေးဝမ်းကျောင်း နေကြတာ။ အခုလို ငါးဖမ်းခွင့် ပိတ်တော့ စားဝတ်နေရေးအတွက် အခက်အခဲတွေ ဖြစ်လာနိုင်တယ်" လို့ ဆိုပါတယ်။

စစ်ကောင်စီက ကျားပိုက်ငါးဖမ်းသမားတွေကို တလ ငါးဖမ်းခွင့် ပိတ်ပင်ထားတယ်လို့ ပြောဆိုထားပေမဲ့ အချိန်ဘယ်လောက်အထိ ကြာမြင့်သွားမယ်ကို အတိအကျ ခန့်မှန်းလို့ မရနိုင်သေးဘူးလို့ ငါးဖမ်းလုပ်ငန်းလုပ်ကိုင်သူတွေက ပြောပါတယ်။

ကျောက်ဖြူမြို့နယ်မှာ ရေနက်ဆိမ်ကမ်းစီမံကိန်းနဲ့ ရွှေဂက်စ်ဓာတ်ငွေ့ထုတ်လုပ်နေမှုတွေကြောင့် ရေနံတင်သင်္ဘောတွေ သွားလာနေကြတာကြောင့် ငါးတွေအရင်လို့ ဖမ်းလို့မရတော့ဘူးလို့ပြော ငါးဖမ်းလုပ်ငန်းလုပ်ကိုင်နေသူတွေက ပြောပါတယ်။

မဒေးကျွန်းနဲ့ သစ်ပုတ်တောင် ကျေးရွာတွေမှာ ကျားပိုက်ငါးဖမ်းလုပ်ငန်းလုပ်ကိုင်နေသူ ၂၀ နီးပါးခန့်ရှိတယ်လို့သိရပါတယ်။

ကျောက်ဖြူနဲ့ ရခိုင်ပြည်နယ်က မြို့နယ်တချို့က ပင်လယ်ပြင်တွေမှာ စစ်ကောင်စီက မကြာခဏဆိုသလို လက်နက်ကြီး ပစ်ခတ်လေ့ကျင့်တာကြောင့် ငါးဖမ်းလုပ်ငန်းတွေ မကြာခဏ ဆိုသလို ရပ်တန့်ထားရတယ်လို့ သိရပါတယ်။

ဧရာဝတီတိုင်း၊ မအူပင်မြို့နယ်မာ အောက်တိုဘာ ၁ ရက်မှ  ၁၅ ရက်အထိ တိုးမြစ်ထဲ ရေလုပ်သားတွေ ငါးဖမ်းခွင့်ကို စစ်ကောင်စီက ပိတ်ပင်ထားတယ်လို့ ဒေသခံတွေဆီက သိရပါတယ်။

ပြည်သူ့ကာကွယ်ရေးတပ်ဖွဲ့ PDF တွေ ရေကြောင်းကနေ ပြန်လည်ဝင်ရောက်လာနိုင်တယ်ဆိုတဲ့ သတင်းကြောင့် စစ်ကောင်စီတပ်ဖွဲ့ဝင်တွေက မြစ်ထဲ ပိတ်ဆို့ ရှာဖွေနေသလို ငါးဖမ်းခွင့်ကိုလည်း ပိတ်ပင်ခဲ့တာလို့ ဒေသခံတွေက ပြောပါတယ်။

ငါးဖမ်းလုပ်ငန်းလုပ်သူ ဒေသခံတဦးက “ကျနော်တို့က တိုးမြစ်ကိုပဲ အားထားပြီး ငါး ရှာနေရတာ။ အမြဲတမ်းရှာရတာ မဟုတ်ဘူး။ ရက်အပတ်နဲ့ ရှာနေရတာ။ ခုလိုမျိုး ပိတ်လိုက်တော့ ရေလုပ်သား တွေ အဆင်မပြေတော့ဘူး”လို့ ပြောပါတယ်။

မအူပင်မြို့နယ်မှာ တိုးမြစ်ထဲ ငါးဖမ်းခွင့်ကို စစ်ကောင်စီက ပိတ်ပင်လိုက်တာကြောင့် ရေလုပ်သားတွေအတွက် စားဝတ်နေရေးအခက်အခဲတွေ ရှိလာတယ်လို့ ဆိုပါတယ်။

ဧရာဝတီတိုင်းကို ပြည်သူ့ကာကွယ်ရေးတပ်ဖွဲ့ PDF တွေ ပြန်ဝင်လာတော့မယ်ဆိုတဲ့ သတင်းထွက်ပေါ်လာပြီး နောက်ပိုင်းမှာ စစ်ကောင်စီတပ်သားတွေက မြို့အဝင် အထွက် စစ်ဆေးရေးဂိတ်တွေမှာ ပိတ်ဆို့ရှာဖွေဖမ်းဆီးနေသလို မြစ်ထဲထိပါ ငါးဖမ်းခွင့်တွေပိတ်ပြီး ရှာဖွေတာတွေပြုလုပ်လာတာပါ။

ခုလိုမျိုး စစ်ကောင်စီတပ်ဖွဲ့ဝင်တွေ ပိတ်ဆို့ရှာဖွေဖမ်းဆီးလာတဲ့အပေါ် မြို့ပြပြောက်ကျားတပ်ဖွဲ့ ဝင်တွေအနေနဲ့ လုပ်ရကိုင်ရ ခက်ခဲသွားတာမျိုး မရှိပေမဲ့ ဒေသခံတွေကို စစ်ကောင်စီက အရင်ကထက်ပိုပြီး စွပ်စွဲဖမ်းဆီးလာနိုင်တယ်လို့ ပုသိမ်မြို့ပြပြောက်ကျားတပ်ဖွဲ့က သတိပေးထား ပါတယ်။