စစ်ကိုင်းတိုင်း၊ ထီးချိုင့်မြို့နယ်ရှိ မြတောင်လမ်းဆုံဂိတ်ကို စက်တင်ဘာ ၂၃ ရက် မနက် ၆ နာရီခွဲလောက်က မိုင်းဆွဲတိုက်ခိုက်ခဲ့ရာမှာ ဂိတ်တာဝန်ကျ စစ်ကောင်စီတပ်သား နှစ်ယောက်သေဆုံးပြီး တယောက် ခြေထောက်ပြတ်ကာ အပြန်အထန် ဒဏ်ရာရသွားတယ်လို့ ဒေသခံ ပြောက်ကျားတပ်ဖွဲ့က ပြောပါတယ်။
Special.9-HPDF အဖွဲ့တာဝန်ရှိသူက "ဂိတ်တဲထဲမှာ လမ်းကြေးကောက်ဖို့ စောင့်နေတဲ့ (စခ..) နှစ်ယောက်ကတော့ တစ်စစီ လိုက်မကောက်ရရင် ကံကောင်းပဲ။ ဂိတ်အပြင်က (စခ..)ကတော့ ခြေထောက်ပြတ်ထွက်သွားတယ်လို့သိရတယ်။ တခြားနေရာတွေလည်း ထိထားပြီး ရှောနိုင်ခြေများပါတယ်။ မိုင်းနှစ်လုံးဆွဲပြီး ရှယ်ကြွေးလိုက်တယ်။ မိုင်းကလည်း မထိမှာမပူရဘူး။ ဂိတ်တဲအထဲချပေးထားတာ မြွေဆိုရင်တောင် ထကိုက်တယ်။ သူတို့က ဂိတ်ကြေးကောက်ဖို့ပဲ လောဘတက်နေတာ" လို့ ပြောပါတယ်။
မိုင်းဆွဲတိုက်ခိုက်ခဲ့တဲ့ တော်လှန်ရေးရဲဘော်တွေ အထိအခိုက်မရှိ ပြန်လည်ဆုတ်ခွာနိုင်ခဲ့ပြီး လုံခြုံဘေးကင်းရာကို ပြန်လည်ရောက်ရှိခဲ့ပါတယ်လို့ HPDF တာဝန်ရှိသူက ပြောပါတယ်။
အကြမ်းဖက် စစ်အာဏာရှင်ကို အဆုံးထိ တော်လှန်တိုက်ခိုက်သွားမှာဖြစ်ပြီး ပြည်သူတွေအနေနဲ့ တတ်နိုင်သလောက် ကူညီထောက်ပံ့ပေးကြဖို့ Special.9-HPDF တာဝန်ရှိသူက ပြောပါတယ်။
ပခုက္ကူမြို့မြို့နယ်၊ ဧရာဝတီတံတားတောင်ဘက် စစ်တပ်ဂိတ်စခန်းအား စက်တင်ဘာ ၄ ရက်နေ့ မွန်းတည့် ၁၂ နာရီဝန်းကျင်က တိုက်ခိုက်ခဲ့ပြီး ဂိတ်အတွင်းက စစ်သား ၁ ဦး သေဆုံးကာ ၁ ဦး ဒဏ်ရာရခဲ့တယ်လို့ ပခုက္ကူမြို့ပြပြောက်ကျားတပ်ဖွဲ့ -၂ မှ ရဲဘော် ကိုရန်နောင်က ပြောပါတယ်။
စစ်ဆေးရေးဂိတ်အတွင်းက စစ်သားတွေကို လက်လုပ်သေနတ်တွေနဲ့ပစ်ခတ်ရာမှ အပြန်အလှန် ပစ်ခတ်မှု ဖြစ်ပွားခဲ့တာလို့ ကိုရန်နောင်က ပြောပါတယ်။
“ကျနော်တို့ သုံးယောက်မှာ ပစ္စတိုနှစ်လက်၊ လက်ပစ်ဗုံး နှစ်လုံးပဲ ပါတယ်ဗျ။ လက်နက်အင်အား မလောက်လို့ ကျနော်တို့ ထွက်ပြေးခဲ့ရတာ။ တယောက်ဆို လိုက်ပစ်ခံရတာ၊ သေနတ် မလောက်တော့ သေနတ်က ပစ်တယ်၊ ပစ်တော့ ကျည်က တတောင့်ပဲ ထွက်တယ်။ နောက်ထပ် ထပ်ပစ်မယ်လုပ်တော့ ကျည်က မထွက်တော့ဘူး။ အဲဒီတော့ ထွက်ပြေးရတော့တာ။”
ပစ်ခတ်မှုဖြစ်ချိန်မှာ ဂိတ်စခန်းထဲက စစ်သား ၁ ဦး လဲကျသေဆုံးခဲ့ပြီး ၁ ဦး ထိခိုက်ဒဏ်ရာရခဲ့ကာ စစ်သားတွေရဲ့ မောင်းပြန် G3 လက်နက် ၂ လက်ကို ရယူနိုင်ခဲ့တယ်လို့ ဆိုပါတယ်။
ပခုက္ကူမြို့ပြပြောက်ကျားတပ်ဖွဲ့ ၂ မှာ လက်နက်အင်အား မလုံလောက်တာကြောင့် မောင်းပြန်သေနတ်ရရှိဖို့ အသက်စွန့်ပြီး လုပ်ဆောင်ခဲ့ရတာလို့ ပြောပါတယ်။
စစ်ကောင်စီတပ်က လိုက်လံပစ်ခတ်တာကြောင့် ထွက်ပြေးချိန်မှာ ၄၅ သိန်းတန် ပစ္စတိုသေနတ် တလက် ကျန်ခဲ့ပြီး ပစ္စတိုကျည်အတောင့် ၂၀ နဲ့ ဆိုင်ကယ် ၂ စီး ကျန်ခဲ့တယ်လို့လည်း ပြောပါတယ်။
