မွန်ပြည်နယ်၊ သံဖြူဇရပ်-ရေး ကားလမ်းမှာ နိုဝင်ဘာ ၁ ရက်က စစ်ကောင်စီတပ်ဖွဲ့ဝင်တွေ ၂ ကြိမ်ဆက်တိုက် တိုက်ခိုက်ခံရပြီး ၉ ယောက်သေဆုံးကာ ၅ ယောက် ဒဏ်ရာရခဲ့တယ်လို့ မွန်ပြည်နယ် တောင်ညိုပြောက်ကျားတပ်ဖွဲ့က ထုတ်ပြန်ပါတယ်။
သံဖြူဇရပ်-ရေး ကားလမ်းမှာ အောက်တိုဘာ ၁ ရက် မွန်းလွဲ ၃ နာရီလောက်က ကင်းချဖို့လာတဲ့ စစ်ကား ၂ စီး ဝဲခမိရွာနဲ့ ရွာသာအေးရွာကြားမှာ ကားပေါ်ကနေဆင်းပြီး ခြေလျင်ချီတက်လာတုန်း မွန်ပြည်နယ် တောင်ညိုပြောက်ကျားတပ်ဖွဲ့က ချုံခိုတိုက်ခဲ့ရာ စစ်ကောင်စီတပ်ဖွဲ့ဝင် ၄ ယောက် သေဆုံးပြီး ၃ ယောက် ဒဏ်ရာရခဲ့တယ်လို့ ဆိုပါတယ်။
တရက်တည်းမှာပဲ သံဖြူဇရပ်ကနေ ရေးမြို့ဘက်ကို ထွက်ခွာလာတဲ့ စစ်ကား ၆ စီးပါ ယာဉ်တန်းကို ည ၇ နာရီလောက်က ရွာသာအေးရွာနဲ့ ပိန္နဲတောရွာအကြားမှာ မွန်ပြည်နယ် တောင်ညိုပြောက်ကျားတပ်ဖွဲ့က ထပ်မံ ချုံခိုတိုက်ခဲ့ရာ စစ်သား ၅ ယောက် သေဆုံးပြီး ၂ ယောက် ဒဏ်ရာရခဲ့တယ်လို့ သိရပါတယ်။
သံဖြူဇရပ်-ရေး ကားလမ်းမှာ စစ်ကောင်စီယာဉ်တန်းတွေ မကြာခဏ တိုက်ခိုက်ခံရလေ့ရှိပြီး စစ်ကောင်စီဘက်က အထိအခိုက် အကျအဆုံး များပြားနေတယ်လို့ ဒေသခံပြောက်ကျားတပ်တွေက ပြောပေမဲ့ သီးခြားအတည်ပြုနိုင်ခြင်းမရှိပါဘူး။
သံဖြူဇရပ်-ရေး ကားလမ်းမှာ အဆိုပါ တိုက်ပွဲတွေကြောင့် ဒီနေ့အထိ အရပ်သား ၃ ယောက် သေဆုံးခဲ့ပြီး ၃ ယောက်ထက်မနည်း ထိခိုက်ဒဏ်ရာ ရရှိခဲ့ပါတယ်။
သံဖြူဇရပ်-ရေး ကားလမ်းမှာ သွားလာကြတဲ့ ခရီးသွားတွေ သတိရှိကြဖို့၊ စစ်ကောင်စီကားနဲ့ အတူမသွားလာကြဖို့ မွန်ပြည်နယ် တောင်ညိုပြည်သူ့ပြောက်ကျားတပ်ဖွဲ့က တိုက်တွန်းထားပါတယ်။
အဆိုပါဖြစ်စဉ်တွေနဲ့ပတ်သက်ပြီး စစ်ကောင်စီဘက်က လတ်တလော သတင်းထုတ်ပြန်တာမျိုး မရှိသေးပါဘူး။
မွန်ပြည်နယ်၊ သံဖြူဇရပ်- ရေးကားလမ်းပေါ်မှာ ကား လေးစီးပါ စစ်ကောင်စီတပ်ရဲ့ ယာဉ်တန်းကို ဇူလိုင် ၁ ရက်မနက်က မွန်ပြည်နယ် တောင်ညိုပြည်သူ့ပြောက်ကျားတပ်ဖွဲ့က ကြားဖြတ် ချုံခိုတိုက်ခိုက်ခဲ့ပါတယ်။
သံဖြူဇရပ်မြို့ကနေ ရေးဘက်သို့ မောင်းနှင်လာတဲ့ စစ်ကောင်စီတပ်ရဲ့ ကား လေးစီးဟာ အေးကမ္ဘာရွာနဲ့ ဘေးလမိုင်းကြားမှာ ပထမအကြိမ် ဗုံးခွဲတိုက်ခိုက်ခံရပြီး ကား တစီး ပျက်စီးခဲ့သလို ထိခိုက်ဒဏ်ရာရသူတွေလည်းရှိတယ်လို့ မွန်ပြည်နယ်တောင်ညို ပြည်သူ့ပြောက်ကျားတပ်ဖွဲ့က ပြောပါတယ်။
ကျန်တဲ့ကား သုံးစီးဟာလည်း ဆက်လက် မောင်းနှင်လာစဉ် အောင်သာယာနဲ့ ကနင်ကမော့ရွာကြားမှာ ထပ်မံချုံခိုပစ်ခတ်တိုက်ခိုက်ခံရကာ စစ်ကောင်စီဘက်က အနည်းဆုံး သုံးယောက် သေပြီးထိခိုက်ဒဏ်ရာရသူတွေမှာလည်း အများပြား ရှိခဲ့တယ်လို့ ဆိုပါတယ်။
စစ်ကောင်စီတပ်ကို ပစ်ခတ်နေချိန်မှာ ခရီးသွားပြည်သူတွေအနေနဲ့ သတိရှိကြဖို့နဲ့ စစ်ကောင်စီကားနဲ့အတူ ခရီးမသွားလာကြဖို့ မွန်ပြည်နယ်တောင်ညိုပြည်သူ့ပြောက်ကျားတပ်ဖွဲ့က တိုက်တွန်းထားပါတယ်။
ရေး - သံဖြူဇရပ် ကားလမ်းပိုင်းမှာ စစ်ကောင်စီတပ်တွေ မကြာခဏ ချုံခိုတိုက်ခိုက်ခံရလေ့ရှိတာ ကြောင့် ဘေးပတ်ဝန်းကျင် ရွာတွေမှာ စစ်ကောင်စီဘက်က အန္တရာယ်ပြုလာမှာကို ကြောက်ရပြီး ပစ်ခတ်မှုတွေ ထပ်မံဖြစ်လာမှာကိုလည်း စိုးရိမ်ရတယ်လို့ ဒေသခံရွာသားတဦးက ပြောပါတယ်။
အဆိုပါဖြစ်စဉ်တွေနဲ့ ပတ်သက်ပြီး စစ်ကောင်စီပြန်ကြားရေးက သတင်းထုတ်ပြန်တာ မရှိသေးပါဘူး။
