မွန်ပြည်နယ်၊ ကျိုက်ထိုမြို့နယ်၊ မုပ္ပလင်လမ်းဆုံရှိ စစ်ကောင်စီဂိတ်စခန်းမှာ မတ် ၃၁ ရက် ဒီမနက် ၅ နာရီခွဲလောက်က စစ်ကောင်စီတပ်နဲ့ ကေအန်အယ်လ်အေ ပူးပေါင်းတပ်ဖွဲ့တို့ကြား တိုက်ပွဲဖြစ်ပွားခဲ့တယ်လို့ ကျိုက်ထိုတော်လှန်ရေးအင်အားစုက ဒီဗွီဘီကို ပြောပါတယ်။
မုပ္ပလင်လမ်းဆုံမှာရှိတဲ့ စစ်ကောင်စီ ဂိတ်စခန်းကို ကရင်အမျိုးသားလွတ်မြောက်ရေးတပ်မတော် (KNLA) နဲ့ PDF ပူးပေါင်းအဖွဲ့က သွားရောက်တိုက်ခိုက်ခဲ့တာပါ။
စစ်ကောင်စီဂိတ်စခန်း တိုက်ခိုက်ခံရတာကြောင့် နှစ်ဘက် အပြန်အလှန် တိုက်ပွဲဖြစ်ပွားခဲ့ပြီး စစ်ကောင်စီဘက်က ၆ ဦး သေဆုံးခဲ့သလို ကေအန်အယ်လ်အေ ပူးပေါင်းအဖွဲ့က ၁ ဦး သေဆုံးပြီး ၃ ဦး ဒဏ်ရာရရှိခဲ့တယ်လို့ ကျိုက်ထိုတော်လှန်ရေးအင်အားစု တာဝန်ခံက ပြောပါတယ်။
နာရီဝက်ကြာ ဖြစ်ပွားခဲ့တဲ့ တိုက်ပွဲအတွင်း ခရီးသွားယာဉ်မောင်း ၂ ဦး သေနတ်ထိမှန်ဒဏ်ရာရခဲ့ပြီး အခုအခါမှာတော့ သူတို့ ၂ ဦးကို ကျိုက်ထိုမြို့နယ် ပြည်သူ့ဆေးရုံကို ပို့ဆောင်ထားတယ်လို့ လူမှုကယ်ဆယ်ရေးအဖွဲ့တွေထံက သိရပါတယ်။
မုပ္ပလင်လမ်းဆုံက စစ်ကောင်စီဂိတ်စခန်းဟာ စစ်တပ်နဲ့ ရဲအင်အား ၄၀ လောက်ချထားတဲ့ ဂိတ်စခန်းတခုဖြစ်ပြီး မကြာခဏဆိုသလို ကေအန်အယ်လ်အေ ပူးပေါင်းအဖွဲ့က တိုက်ခိုက်လေ့ရှိပါတယ်။
စစ်ကောင်စီဂိတ်စခန်း တိုက်ခိုက်ခံရတဲ့အတွက် ရန်ကုန်-မော်လမြိုင်ကားလမ်း ၁ နာရီကျော်ကြာ လမ်းပိတ်ဆို့မှု ဖြစ်ပေါ်ခဲ့ပါတယ်။
ကရင်ပြည်နယ်၊ သံတောင်ကြီးမြို့နယ်၊ လိပ်သိုမြို့အဝင် စစ်ကောင်စီ တပ်စခန်းအနီးမှာ မတ် ၁၁ ရက် မနက် ၈ နာရီလောက်က အမည်မသိ လက်နက်ကိုင်အဖွဲ့က မိုင်းဆွဲတိုက်ခိုက်ခဲ့ပြီး နှစ်ဖက် တိုက်ပွဲဖြစ်ပွားရာ စစ်ကောင်စီတပ်ဖွဲ့ဝင် ၁ ဦးသေဆုံးပြီး အရပ်သားယာဉ်မောင်း ၁ ဦး ထိမှန်ဒဏ်ရာ ရရှိခဲ့တယ်လို့ သိရပါတယ်။
စစ်ကောင်စီရဲ့ ခမရ ၆၀၃ တပ်စခန်းအနီး အမည်မသိ လက်နက်ကိုင်အဖွဲ့က မိုင်းဆွဲတိုက်ခိုက်ခဲ့လို့ တပ်စခန်းဂိတ်ထဲကနေ လက်နက်ငယ်တွေနဲ့ ပြန်လည် ပစ်ခတ်ခဲ့တဲ့အတွက် မိနစ်အနည်းငယ်ကြာ နှစ်ဖက် တိုက်ပွဲဖြစ်ပွားခဲ့တာပါ။
လိပ်သိုမြို့ဒေသခံတဦးက "ဒီမနက်ပိုင်းက မြို့အဝင် တပ်ဂိတ်မှာ မိုင်းဆွဲခံရပြီး မိနစ်အနည်းငယ်လောက် တိုက်ပွဲဖြစ်တယ်။ အဲဒီဂိတ်ကကောင်တွေက လက်နက်မရှိတဲ့ ပြည်သူကို စစ်ဆေးတာတွေက မိုက်ရိုင်းတာ ကြာနေပြီ။ ခရီးသွားတွေအတွက် စိတ်အနှောင့်အယှက် ဖြစ်ရတယ်။ ဒေသခံတွေအတွက် တပ်စခန်းဂိတ်တွေ မရှိလေကောင်းလေပဲ” လို့ ဆိုပါတယ်။
တိုက်ပွဲဖြစ်ပွားပြီးနောက် ခရီးသွားပြည်သူတွေကို စစ်ဆေးမေးမြန်းတာ၊ မော်တော်ဆိုင်ကယ်နဲ့ ကားတွေကို တားဆီးစစ်ဆေးတာတွေ ပိုမိုတင်းကျပ်လာသလို စစ်ကောင်စီတပ်တွေ အနီးဝန်းကျင်က ကျေးရွာတွေကို ဝင်ရောက်ပြီး အရပ်သားပြည်သူတွေကို ဖမ်းဆီးသတ်ဖြတ်တာ၊ နေအိမ်တွေ မီးရှို့မှာကို ဒေသခံတွေ စိုးရိမ်နေကြပါတယ်။
မတ် ၈ ရက် မနက်က သံတောင်ကြီးမြို့နယ် သောက်ရေခပ်ကျေးရွာနဲ့ သကွဲပလိုကျေးရွာ အကြားမှာ စစ်ကောင်စီတပ်ဖွဲ့ဝင်တွေအတွက် လစာနဲ့ ရိက္ခာပို့ကား ၅ စီးကို အမည်မသိ လက်နက်ကိုင်အဖွဲ့က ကြားဖြတ်တိုက်ခိုက်ခဲ့လို့ စစ်ကောင်စီတပ်ဖွဲ့ဝင် ၃ ဦးသေဆုံးပြီး အများအပြား ထိခိုက်ဒဏ်ရာ ရရှိခဲ့တဲ့အတွက် ကဆောပလိုအောက်ကျေးရွာကို စစ်ကောင်စီတပ်ဖွဲ့ဝင်တွေက ဝင်ရောက်ပြီး ဒေသခံရွာသားတဦးကို ပစ်သတ်ခဲ့သလို ကက်သလစ်ဘုရားကျောင်းပိုင်ဆိုင် ပစ္စည်းတွေနဲ့ နေအိမ် ၃ လုံးကို မီးရှို့ဖျက်ဆီးခဲ့ပါတယ်။
မတ် ၄ ရက် မနက်ပိုင်းက တောင်ငူ-လိပ်သို-လွိုင်ကော်လမ်းပေါ်က စစ်ကောင်စီရဲ့ လေလော်ဒေးတပ်စခန်းကို အမည်မသိ လက်နက်ကိုင်တွေရဲ့ ပစ်ခတ်တိုက်ခိုက်တာ ခံခဲ့ရသေးတယ်လို့ ဒေသခံတွေဆီက သိရပါတယ်။
