စစ်ကိုင်းတိုင်း၊ ကနီမြို့နယ် ချင်းတွင်းမြစ်အတွင်း သွားလာနေတဲ့ စစ်ကောင်စီ မော်တော် ၁၃ စီး ပစ်ခတ်ခံခဲ့ရတယ်လို့ ဒေသခံတွေက ပြောပါတယ်။
အဆိုပါ စစ်ကောင်စီတပ် မော်တော်ဖလပ်ခွံတွေက အောက်တိုဘာ ၃ ရက်နေ့ မနက်ခင်းကနေ မုံရွာ မင်းဒေါင့်ဆိပ်ကမ်းကနေ ထွက်ခွာလာပြီး ကျောက်မော်ရွာဆိပ်ကကနေ စတင်ကာ ဒေသခံပြည်သူကာကွယ်ရေးအဖွဲ့တွေနဲ့ စတင်တိုက်ပွဲဖြစ်ပွားခဲ့တာလို့ သိရပါတယ်။
“အဲဒီလိုဖြစ်ပြီး စစ်ကောင်စီ မော်တော်တစီး မီးစွဲလောင်ကာ စက်ပျက် မျောသွားသေးတယ်။ အဲဒီစက်ပျက်မီးစွဲသွားတဲ့ မော်တော်ကို အခြားမော်တော်တွေနဲ့ တွဲပြီးအထက်ဆန် ခေါ်သွားတာ မြင်လိုက်ရတယ်။ အဲဒါပြီးတော့ သူတို့ ရေဘုတလင်အောက်ဘက် ဆိပ်ကမ်းမှာ ညအိပ်သွားတယ်” လို့ ဒေသခံတဦးက ပြောပါတယ်။
ပြည်သူ့ကာကွယ်ရေး B21 အဖွဲ့ တာဝန်ရှိသူက “ပစ်ကြတာတော့ အဖွဲ့ပေါင်းစုံပါပဲဗျ။ စစ် (-) သေတာရယ်၊ ထိခိုက်တာ အများအပြား ရှိနိုင်တယ်။ မနက်ပိုင်း သူတို့ ထွက်လာတဲ့ အချိန်ကတည်းကနေ ပြည်သူ့ကာကွယ်ရေးတွေက ပစ်နေကြတာ။ အခုလည်း ဒီနေ့ အောက်တိုဘာ ၄ ရက်နေ့ ညနေခင်း ၃ နာရီအချိန်မှာ ကျနော်တို့အဖွဲ့တွေက ကနီမြို့နယ်၊ ငါးဖျတ်ရွာဆိပ်ကမ်းကနေ စောင့်ပြီး ပစ်ခတ်တာတွေ လုပ်ခဲ့တယ်။ စစ်ကောင်စီ အကျအဆုံးကတော့ လောလောဆယ် မသိရသေးဘူးဗျ။ ကျနော်တို့အဖွဲ့ကတော့ အကျအဆုံး မရှိခဲ့ဘူး” လို့ ပြောပါတယ်။
စစ်ကောင်စီတပ်တွေဘက်ကလည်း မြစ်ကမ်းဘေးကို ပြန်လည်ပစ်ခတ်တာတွေ ပြုလုပ်ခဲ့ပေမဲ့ ပြည်သူ့ကာကွယ်ရေးအဖွဲ့တွေရဲ့ တိုက်ပွဲအတွေ့အကြုံ များလာပြီး မောင်းပြန်လက်နက်တွေပါ ကိုင်ဆောင်လာနိုင်တာကြောင့် စစ်ကောင်စီတပ်တွေ ဒီတခေါက် ချင်းတွင်းမြစ်ကို ဆန်တက်နေရာမှာ အကျအဆုံး အများအပြားနဲ့ ရင်ဆိုင်ရမယ်လို့ ဒေသခံတွေက ပြောပါတယ်။
စစ်ကောင်စီတပ်ရဲ့ ချင်းတွင်းမြစ်အတွင်းက ကမ်းဘေးနေတဲ့ ကျေးရွာတွေကို ပြန်လည်ပစ်ခတ်နေတာကြောင့် ချိုင်ကျေးရွာ၊ ဝက်ချောင်းကလေးကျေးရွာ၊ မုဌေါကျေးရွာ၊ နတ်ကြီးကျေးရွာ၊ ငါးဖျတ်ကျေးရွာ၊ ညောင်ပင်ဝန်းကျေးရွာ၊ ဝက်ချောင်းကြီးကျေးရွာက ဒေသခံ ထောင်နဲ့ချီ ဘေးလွတ်ရာကို ထွက်ပြေးနေကြရတယ်လို့လည်း သိရပါတယ်။
စစ်ကိုင်းတိုင်း ကသာခရိုင် ကသာမြို့နယ်အတွင်း ဧရာဝတီမြစ်ကြောင်းအတိုင်း အထက်ကို ဆန်တက်လာတဲ့ စစ်ကောင်စီရဲ့ ရိက္ခာတွေတင်လာတဲ့သင်္ဘော ၃ စီးကို မေ ၂၅ ရက် မွန်းလွဲပိုင်းမှာ ရှော့တိုက်ဒုံးနဲ့ ပစ်ခတ်တိုက်ခိုက်ခဲ့တယ်လို့ မြို့လှ PDF အဖွဲ့က သတင်းထုတ်ပြန်ခဲ့ပါတယ်။
ကသာမြို့ ဆိပ်ကမ်းကနေ ထွက်ခွာလာတဲ့ ရိက္ခာတင်သင်္ဘော ၃ စီးကို ကသာမြို့နယ် အထက်ဘက်၊ ဝဲကြီးရွာနဲ့ သံပုရာကုန်းကျေးရွာကြားမှာ မြို့လှ PDF မှ ဗိုလ်သာလိကာ ဦးဆောင်တဲ့ တပ်ဖွဲ့က ရှော့တိုက်ဒုန်း- ၂ လုံး၊ H – 22 မိုင်တဲမမ-လက်လုပ်ရှေ့ထွက်မိုင်း ၇ လုံးတို့နဲ့ ပစ်ခတ်တိုက်ခိုက်ခဲ့တယ်လို့ PDF အဖွဲ့ကဆိုပါတယ် ။
သင်္ဘော ၁ စီးမှာ လက်နက်ကျည်တွေ အများဆုံးထိမှန်ခဲ့ပြီး ရှေ့ဆက်မသွားနိုင်တာကြောင့် သင်္ဘော ၂ စီးနဲ့ ဘေးကနေတွဲပြီး မိုးတားလေးဆိပ်ကမ်းမှာ ဆိုက်ကပ်ထားရတယ်လို့ ထုတ်ပြန်ချက်မှာ ရေးသားဖော်ပြထားပါတယ်။
ဒါ့အပြင် မနက်ပိုင်း ၈ နာရီလောက်ကလည်း အဆိုပါ သင်္ဘော ၃ စီးရဲ့ ရှေ့ပြေးခြုံရေးယူဖို့ ရောက်လာတဲ့ စစ်ကောင်စီတပ် အင်အား ၁၀၀ ကျော်ကို ကသာမြို့နယ် မြေနုကျေးရွာအနီးမှာ မြို့လှ PDF အဖွဲ့က စောင့်ကြိုတိုက်ခိုက်ခဲ့ရာ နာရီဝက်နီးပါး နှစ်ဘက် အပြန်အလှန် တိုက်ပွဲဖြစ်ပွားခဲ့တယ်လို့ သိရပါတယ်။
နှစ်ဘက်တိုက်ပွဲအတွင်း ထိခိုက်ကျဆုံးမှု အခြေအနေကိုတော့ ဒီဗွီဘီက သီးခြားအတည်မပြုနိုင်သေးပါဘူး။
