ရခိုင်ပြည်နယ်၊ မောင်တော-အငူမော်ကားလမ်းတလျှောက် သြဂုတ်လ ၁၄ ရက်နေ့မနက်မှစပြီး စစ်ကောင်စီက အင်အားအလုံးအရင်းနဲ့ ထိုးစစ်ဆင်လာတာကြောင့် ဒေသခံ ၅၀၀ ကျော် ထွက်ပြေးနေကြတယ်လို့ ချိန်ခါလီကျေးရွာသားတဦးက ပြောပါတယ်။
“မနေ့က အငူမော်ကနေ ကမ်းထိုးစစ်ရေယာဥ်နဲ့ စစ်သား အင်အား ၁၀၀ ကျော် ခြေလျင်တက်လာတယ်။ ဒီနေလည်း အင်အား ၇၀ ကျော်အင်အားဖြည့်လာတယ်။ ဒါကြောင့် လမ်းတလျှောက် ကျေးရွာတွေက ရွာသူရွာသားတွေ တိုက်ပွဲပြင်းထန်လာမှကို ကြောက်လို့ မေယုတောင်ကိုကျော်ပြီး စေတီပြင်ကမ်းဘက်ကို ထွက်ပြေးနေကြရတယ်။”
မောင်တော-အငူမော် ကားလမ်း ရသေ့တောင်မြို့နယ် ချိန်ခါလီကျေးရွာအနီးမှာ သြဂုတ် ၁၃ ရက်နေ့က တိုက်ပွဲတွေ ပြင်းထန်စွာဖြစ်ပွားခဲ့ပြီး စစ်ကူလာတဲ့ စစ်ကောင်စီကားပါ မိုင်းဆွဲ တိုက်ခိုက်ခံခဲ့ရတာကြောင့် အခုလို စစ်အင်အားဖြည့်တင်းပြီး စစ်ဆင်ရေး ပြုလုပ်လာနေတာလည်း ဖြစ်ပါတယ်။
သြဂုတ် ၁၄ ရက်နေ့က ထွက်ပြေးနေကြရတဲ့ စစ်ဘေးဒုက္ခသည် ၃၀၀ ကျော်မှာ မေယုကမ်း အရှေ့ဘက် သံချောင်၊ သရက်ချောင်း၊ အောင်ဆိပ် စတဲ့ ကျေးရွာတွေရှိ ဘုန်းကြီးကျောင်းတွေမှာ ခိုလှုံနေကြရပြီး သြဂုတ် ၁၅ ရက် ဒီနေ့မှာလည်း သက်ကြီးရွယ်အိုတွေ အပါအဝင် စစ်ဘေးဒုက္ခသည် ၂၀၀ ကျော် စေတီပြင်ဘက်ကို မေယုတောင်ကျော်ပြီး ပြေးလာနေကြရတယ်လို့ စေတီပြင်ပရဟိတ္တလူငယ်များအသင်း တာဝန်ရှိသူတဦးက ပြောပါတယ်။
“မနေ့က ရောက်လာတဲ့ စစ်ဘေးရှောင်တွေကို ကျနော်တို့အဖွဲ့က အလှူရှင်တွေ လှူထားတဲ့ အခင်းဖျာတွေ အဝတ်အထည်တွေ စားနပ်ရိက္ခာတွေ ဒီနေ့သွားရောက်ထောက်ပံ့နေကြတာ။ ဒီနေ့ အခုညနေမှာလည်း နောက်ထပ် စစ်ဘေးဒုက္ခသည် ၂၀၀ ကျော်လောက် မယူတောင်ကျော်ပြီး လာနေကြတာ တွေ့ရတယ်။ သူတို့ပြောတာက သက်ကြီးရွယ်အိုတွေ မသွားလာနိုင်လို့ တောထဲမှာ ကျန်နေသေးတယ်လို့ ပြောတယ်။ ကျနော်တို့အဖွဲ့ ကူညီဖို့ ကြိုးစားနေကြတယ်။”
စစ်အင်အားအလုံးအရင်းတိုးချဲ့လာပြီး စစ်ဆင်ရေးပြုလုပ်နေတာကြောင့် ရသေ့တောင်မြို့နယ် မယူကမ်းအနောက်ဘက်မှ ချိန်ခါလီ၊ ဒုံးပိုက်၊ ကိုးတန်ကောက်၊ အောင်ဗလ၊ ကုန်တန်း စတဲ့ ကျေးရွာတွေက ဒေသခံဝွေဟာ မေယုတောင်ကို ကျော်ဖြတ်ပြီး မယူကမ်းအရှေ့ဘက် ကျေးရွာတွေကို ထွက်ပြေးနေကြရတာပါ။
စစ်ကောင်စီ စစ်ဆင်ရေးကြောင့် သြဂုတ် ၁၄ ရက်မနက်မှစပြီး မောင်တော-အငူမော် ကားလမ်းအား ပိတ်ထားရတယ်လို့ သိရပါတယ်။
စစ်ကိုင်းတိုင်း ရေဦးမြို့နယ်အတွင်း ဖေဖော်ဝါရီ ၆ ရက်နဲ့ ၇ ရက်နေ့မှာ စစ်ကောင်စီတပ်က အင်အား အလုံးအရင်းနဲ့ မြေပြင်ရော လေကြောင်းရောပေါင်းပြီး ထိုးစစ်ဆင် တိုက်ခိုက်နေတာကြောင့် ဒေသခံထောင်နဲ့ချီ ထွက်ပြေးနေရပါတယ်။
စစ်ကောင်စီတပ်ရဲ့ ထိုးစစ်ကြောင့် တောင်ပြင်ငယ်ကျေးရွာနဲ့ ပလူဇဝရွာသားတွေ ထွက်ပြေးတိမ်းရှောင်နေရတာလို့ ဒေသခံတွေက ပြောပါတယ်။
“ကျနော်တို့ တောင်ပြင်ငယ်ရွာကို ဖေဖော်ဝါရီလ ၆ ရက်နေ့ညနေပိုင်းမှာ ဝင်ရောက်တိုက်ခိုက်တာ။ ပထမ ဂျက်လေယာဉ် ၃ စီးနဲ့လာပြီး စစ်သားတွေ လာချတယ်ဗျ။ နောက်တော့ M35 လို့ ပြောတာ ပဲ၊ အဲဒီလေယာဉ်နဲ့ ပစ်တော့တာပဲ။ အဝတ်တထည် ကိုယ်တခုနဲ့ ထွက်ပြေးခဲ့ရတယ်ဗျ။ ဖေဖော်ဝါရီ ၇ ရက်နေ့ကတော့ ကျနော်တို့ရွာနဲ့ သိပ်မဝေးတဲ့ ပလူဇဝကျေးရွာကို ထပ်ပြီး ဂျက်လေယာဉ် ၃ စီးနဲ့ စစ်သားလာတွေ လာချတယ်။ အဲလိုချပြီးမကြာဘူး၊ M35 လေယာဉ်နဲ့ ထပ်ပစ်တယ်ဗျ။ အပျက်အစီးနဲ့ အထိအခိုက် အကျအဆုံးကတော့ လောလောဆယ် ပြေးနေရတော့ နှစ်ရွာလုံး အတိကျမသိရသေးဘူးလို့” တောင်ပြင်ငယ်ကျေးရွာသားတဦးက ပြောပါတယ်။
အဆိုရွာနှစ်ရွာဟာ အိမ်ခြေ ၈၀၀ ကျော်ရှိကာ အခြား အောင်ရေတွင်းရွာ၊ အောင်သုခရွာ၊ သစ်ဖရွာ၊ ဂွေ့ငူရွာနဲ့ ပေါ့စမ်းအိုင်ရွာက ရွာသားတွေပါ ဘေးလွတ်ရာကို စစ်ဘေးရှောင်နေကြရတယ်လို့ ဆိုပါတယ်။
စစ်ကောင်စီက အခုလို စစ်အင်အားအလုံးအရင်းနဲ့ ဝင်ရောက်ပစ်ခတ်ရှာဖွေတာတွေ ဘာကြောင့် လုပ်ရတာဆိုတဲ့အကြောင်းရင်းကို မသိဘူးလို့ ဒေသခံတွေက ပြောပါတယ်။
အဲဒီကျေးရွာနှစ်ရွာကို စစ်ကောင်စီက ပိတ်ဆို့ရှာဖွေခံရတဲ့အထဲ ပရဟိတသင်ကြားပေးနေတဲ့ မူကြိုအရွယ်ကလေးငယ်တွေ ပိတ်မိနေကာ စစ်ကောင်စီက သတ်ဖြတ်မှာ စိုးရိမ်ကြောက်လန့်နေရတယ်လို့ ဆိုပါတယ်။
စစ်ကောင်စီက ရုတ်တရက် ထိုးစစ်ဆင်လာတာကြောင့် ရွာသားတွေ ဘာပစ္စည်း မယူလာနိုင်တာကြောင့် အစားအသောက်နဲ့ ဆေးဝါးတွေ အရေးပေါ်လိုအပ်နေတယ်လို့ သိရပါတယ်။
