စစ်ကိုင်းတိုင်း၊ မုံရွာမြို့အဝင်က စစ်တပ်စစ်ဆေးရေးဂိတ်ကို ဒေသခံ တော်လှန်ရေး ပူးပေါင်းတပ်ဖွဲ့တွေက အလစ်အငိုက် ဝင်ရောက်တိုက်ခိုက်ခဲ့တာကြောင့် စစ်ကောင်စီတပ်သား ၂ ယောက် သေဆုံးခဲ့တယ်လို့ သိရပါတယ်။
မုံရွာမြို့အဝင် ရေဦးဆန်ဆိုင်ရှေ့မှာ တပ်စွဲထားတဲ့ စစ်ကောင်စီတပ်တွေကို ပစ်ခတ်တိုက်ခိုက်မှုကို တော့ ဧပြီ ၂၄ ရက်နေ့လည် ၂ နာရီလောက်မှာ Golden Eagle Force-Monywa ၊ Aung San Generation(မုံရွာခရိုင် တပ်ရင်း - ၁၃)၊ ပုဏ္ဏက ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့ကြ တာလို့ ထုတ်ပြန်ထားပါတယ်။
တိုက်ခိုက်မှု ရုပ်သံဗွီဒီယိုဖိုင်ကိုလည်း Golden Eagle Force-Monywa အဖွဲ့က မျှဝေထားခဲ့ပြီး စစ်ကောင်စီတပ်သား ၁ ယောက်ကတော့ လက်မောင်းထိသွားခဲ့ကာ တော်လှန်ရေး ပူးပေါင်းတပ်ဖွဲ့တွေဘက်ကတော့ အထိအခိုက်မရှိဘူးလို့ဆိုပါတယ်။
လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ် ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေး အတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြတာပါ။
ဒါ့အပြင် တိုင်းဒေသကြီးနဲ့ ပြည်နယ်တွေအနှံ့အပြား ဒေသခံ ပြည်သူ့ကာကွယ်ရေး တပ်တွေ၊ တိုင်းရင်းသား လက်နက် ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲ တွေ ပြင်းထန်နေကာ စစ်ကိုင်းတိုင်းကလည်း မြေပြင်တိုက်ပွဲတွေ ပြင်းထန်နေတဲ့ ဒေသတွေထဲ တခုအပါအဝင် ဖြစ်ပါတယ်။
တနင်္သာရီတိုင်း၊ ထားဝယ်မြို့နယ်၊ မောင်မယ်ရှောင်ရွာ၊ ထားဝယ်နည်းပညာတက္ကသိုလ်အနီး ဘုရားမဲ စစ်ကောင်စီစစ်ဆေးရေးဂိတ်ကို ထားဝယ်ပြောက်ကျားတော်လှန်ရေးတပ်ဖွဲ့ (DGRF) နဲ့ ပြည်သူ့ကာကွယ်ရေးပူးပေါင်းအဖွဲ့က အောက်တိုဘာ ၃၁ ရက် မနက် ၄ နာရီခွဲမှာ ၄၀ မမ အပါအဝင် လက်နက်ကြီး၊ လက်နက်ငယ်တွေနဲ့ သွားရောက်ပစ်ခတ် တိုက်ခိုက်ခဲ့တယ်လို့ DGRF အဖွဲ့က ထုတ်ပြန်ထားပါတယ်။
ဘုရားမဲအနီးနေထိုင်သူတယောက်က “အပြန်အလှန်ပစ်ခတ်သံတွေတော့ အတော်များများ ကြားရတယ်၊ လက်နက်ကြီးရော၊ အငယ်ရော အသံတွေအစုံပဲ” လို့ ပြောပါတယ်။
အဲဒီပစ်ခတ်တိုက်ခိုက်မှုမှာ စစ်ကောင်စီဘက်က ၂ ယောက်ကျဆုံးကာ ထားဝယ်ဘက်ကနေ စစ်ကူလာတဲ့ စစ်ကား ၄ စီးကိုလည်း မိုင်း ၂ လုံးဆွဲပြီး တိုက်ခိုက်ခဲ့တာကြောင့် ထိခိုက်ကျဆုံးမှုရှိနိုင်ပြီး အရေအတွက် အတိအကျ အတည်မပြုနိုင်သေးဘူးလို့ ထုတ်ပြန်ချက်မှာ ဖော်ပြထားပါတယ်။
ပူးပေါင်းတပ်ဖွဲ့တွေဘက်ကတော့ အထိအခိုက် အကျအဆုံးမရှိဘဲ ဆုတ်ခွာနိုင်ခဲ့တယ်လို့ သိရပါတယ်။
ထားဝယ်လမ်းပိုင်းမှာ ခရီးသွားခဲ့သူတယောက်က “ဘုရားမဲဂိတ်ကတော့ ဘာမှမဖြစ်ထားသလို ရှင်းထားတယ်။ ဒါပေမဲ့ မနေ့ အောက်တိုဘာ ၃၁ ရက်က ခရီးသည်တင် ယာဉ်တွေကို လမ်းလူကြုံလိုက်လာတဲ့ အမျိုးသားတွေ ပါလာတာမျိုး ရှိလားဆိုပြီး စစ်ဆေးတယ်” လို့ ပြောပါတယ်။
စစ်ကောင်စီတပ်တွေဟာ မောင်မယ်ရှောင်ရွာ ဘုရားမဲဘုရားကျောင်းအနီးက ရော်ဘာခြံတခုမှာ ပြီးခဲ့တဲ့နှစ်ကတည်းက လာရောက်ပြီး ယာယီစခန်းချ စစ်ဆေးရေးဂိတ်ဖွင့်နေတာ ဖြစ်ပါတယ်။
