စစ်ကောင်စီရဲ့ ရိက္ခာတင်ယာဥ်တစ်စီးကို အေအေက သိမ်းပိုက်ခဲ့ပြီးနောက် နိုဝင်ဘာ ၁၀ ရက်နေ့က သွားလာခွင့်ပိတ်ပင်ထားတဲ့ စစ်တွေ-ပုဏ္ဏားကျွန်းလမ်းပိုင်းကို ဒီဇင်ဘာ ၃ ရက်နေ့ နေ့လည်ပိုင်းက ပြန်သွားလာခွင့်ပြုလိုက်ပြီလို့ ပုဏ္ဏားကျွန်း မြို့ခံတွေက ပြောပါတယ်။

စစ်တွေ- ပုဏ္ဏားကျွန်း လမ်းပိုင်း ဒီနေ့ နေ့လယ် ၂ နာရီကတည်းက ပြန်ဖွင့်ပေးလိုက်တာလို့ ပုဏ္ဏားကျွန်းမြို့ခံတဦးက ပြောပါတယ်။

"ဂိတ်တွေကိုတော့ နေ့လယ် ၂ နာရီလောက်ကတည်းက ဖွင့်ပေးလိုက်တယ်လို့ သိရတယ်။ အခုတော့ သွားလာမှုတွေက ပုံမှန်တော့ ရှိနေကြပါပြီ။ မနက်ဖြန်ဆိုတော့ စစ်တွေနဲ့ တခြားမြို့တွေကို ဒီကားလမ်းအတိုင်း သွားကြတော့မှာထင်တယ်။ ဒီနေ့ကတော့ နေလယ်ပိုင်းမှ ဆိုတော့ အသွားအလာက ပုဏ္ဏားကျွန်းမြို့သားတွေပဲ ရှိကြသေးတယ်။ လမ်းဖွင့်လိုက်တော့ လမ်းပန်းဆက်သွယ်ရေးအတွက် ကောင်းသွားတာပေါ့။ လမ်းပိတ်ထားတုန်းက စစ်တွေတခေါက်သွားဖို့အတွက် ဘုတ်တွေနဲ့သွားကြရတယ်။ ကုန်တွေကိုလည်း ဘုတ်တွေနဲ့ပဲ တင်ရကြတယ်။ အခုတော့ ကားတွေနဲ့ လွတ်လွတ်လပ်လပ်သွားလို့ရပြီးပေါ့။"

စစ်တွေ- ပုဏ္ဏားကျွန်းကားလမ်းပိုင်းကို ရက်ရှည်ကြာပိတ်ထားခဲ့တာကြောင့် ကုန်တင်ကားတွေပေါ်မှာ ပါလာတဲ့ ကုန်စိမ်းတွေနဲ့ ငါးတွေရဲ့ ကာလတန်ဖိုး သိန်းရာနဲ့ချီ ဆုံးရှုံးခဲ့ကြတယ်လို့ ယာဥ်မောင်းတွေက ပြောပါတယ်။

စစ်တွေ - ပုဏ္ဏားကျွန်း ကားလမ်းကို ပိတ်ထားခဲ့တာကြောင့် ရခိုင်နဲ့ ပြည်မဘက်ကို ပြေးဆွဲနေကြရတဲ့ ခရီးသယ်တင်ယာဥ်တွေလည်း ရပ်နားနေခဲ့ကြရပါတယ်။

စစ်တွေ- ပုဏ္ဏားကျွန်းလမ်းပိုင်းကို စစ်တွေမြို့ဘက်က တပ်ထိပ်ဂိတ်မှ ပိတ်ထားခဲ့တာဖြစ်ပြီး ပုဏ္ဏားကျွန်းမြို့မှာတော့ မြို့မရဲစခန်းရှေ့က ပိတ်ထားခဲ့တာပါ။

စစ်တွေဘက်က တပ်ထိန်းဂိတ်ကို ပြီးခဲ့တဲ့ ရက်ပိုင်းကတည်းက ပါဒလိတ်ကျေးရွာအထိ ဖွင့်ပေးခဲ့ပြီး ပုဏ္ဏားကျွန်းဘက်မှ ဂိတ်ကို ဒီနေ့မှ ပြန်လည်ဖွင့်ပေးလိုက်တာဖြစ်ပါတယ်။

စစ်ကောင်စီနဲ့ အေအေ တို့ နိုဝင်ဘာ ၂၆ ရက်နေ့ကတည်းက လူသားချင်းစာနာထောက်ထားမှုဆိုင်ရာ ယာယီအပစ်အခတ်ရပ်စဲလိုက်ပြီးနောက် စစ်ကောင်စီက ပိတ်ပင်ထားတဲ့ ကုန်းလမ်းရေလမ်းတွေကို ပြန်လည်ဖွင့်ပေးနေတာလည်းဖြစ်ပါတယ်။

ရခိုင်ပြည်နယ်အစိုးရရဲ့ ခွင့်ပြုချက်မရသေးလို့ စစ်တွေ-ပုဏ္ဏားကျွန်းလမ်းနဲ့ စစ်တွေ-အငူမော် လမ်းတွေမှာ ခရီးသွားလာခွင့် မရသေးကြောင်း နယ်စပ်ကုန်သွယ်ရေးလုပ်နေကြတဲ့ ကုန်သည်ကြီးတွေနဲ့ ခရီးသည်ပို့ဆောင်ရေး ကားဂိတ်တာဝန်ရှိသူတွေဆီက သိရပါတယ်။

နယ်စပ်ကုန်သွယ်ရေးလုပ်နေတဲ့ ကုန်သည်တဦးက “အဲဒီလမ်းတွေဖွင့်ဖို့ နိုဝင်ဘာ ၂၈ ရက်နေ့ကတည်းက အစိုးရအဖွဲ့ရုံးမှာ အစည်းအဝေး ကျင်းပခဲ့ကြတယ်။ အစည်းအဝေးကို နိုဝင်ဘာ ၂၉ ရက်နေ့ကို ပြန်ချိန်းတယ်။ ၂၉ ရက်နေ့မှာလည်း အဲဒီလမ်းတွေ ပြန်ဖွင့်ဖို့ နှစ်ဖက် ဆွေးနွေးမှု ပြုလုပ်ရဦးမယ်လို့ စစ်ကောင်စီက ပြောတယ်။ ကျနော်တို့ ကုန်ကားတွေ ပုဏ္ဏားကျွန်းမှာ ပိတ်မိနေတာ တလပြည့်တော့မယ်။ ကုန်တွေအားလုံး ပျက်စီးသွားနိုင်တယ်” လို့ ပြောပါတယ်။

ရခိုင်ပြည်နယ်မှာ စစ်ကောင်စီတပ်နဲ့ ရက္ခိုင့်တပ်တော်တို့အကြား လူသားချင်းစာနာမှုဆိုင်ရာ ယာယီအပစ်အခတ် ရပ်ထားပေမဲ့ စစ်ကောင်စီတပ်က အကြောင်းပြချက်တွေနဲ့ လမ်းတွေ ပိတ်ထားတဲ့အတွက် ဒေသတွင်း စီးပွားရေး ထိခိုက်နစ်နာမှုတွေ ရှိနေပြီး ခရီးသွားပြည်သူတွေအတွက် အခက်အခဲ ဖြစ်နေပါတယ်။

မေယုသဇင် ခရီးသည်ပို့ဆောင်ရေးကားဂိတ်တာဝန်ရှိသူ​တဦးက “ကျနော်တို့က နိုဝင်ဘာ ၂၉ နဲ့ ၃၀ နေ့တွေမှာ ခရီးစဥ်ပြေးဆွဲဖို့ ကြော်ငြာခဲ့တယ်။ ကားလက်မှတ်တွေတောင် ရောင်းပြီးသွားပြီ။ လက်ရှိမှာ ပြည်နယ်အစိုးရအဖွဲ့က စစ်တွေ-ပုဏ္ဏားကျွန်းလမ်းနဲ့ စစ်တွေမြို့ဝင် တပ်ထိန်း စစ်ဆေးရေးဂိတ်တွေကို ဖွင့်မပေးတော့ ခရီးစဥ်တွေ ရပ်နားထားရပါတယ်” လို့ ပြောပါတယ်။

စစ်တွေ-ပုဏ္ဏားကျွန်း အဝေးပြေးကားလမ်းကို နိုဝင်ဘာ ၁၀ ရက်က စတင်ပြီး စစ်ကောင်စီတပ်က ပိတ်ဆို့ထားပြီး ကုန်တင်ကားတွေနဲ့ ခရီးသည်တင်ကား ၂၀၀ လောက် ပိတ်မိနေဆဲ ဖြစ်ပါတယ်။

ဂျပန်နိုင်ငံ နိပွန်ဖောင်ဒေးရှင်း ဥက္ကဋ္ဌ မစ္စတာဆာဆာကာဝါ ကြားဝင်စေ့စပ်ညှိနှိုင်းပေးတာကြောင့် စစ်ကောင်စီနဲ့ ရက္ခိုင့်တပ်တော်တို့ နိုဝင်ဘာ ၂၆ ရက်နေ့ကစပြီး လူသားချင်း စာနာထောက်ထားမှု ဆိုင်ရာ ယာယီအပစ်ရပ်ထားတဲ့အတွက် ၃ လလောက် ပိတ်ထားခဲ့တဲ့ စစ်တွေ-ရသေ့တောင်-ဘူးသီးတောင် ရေလမ်းကြောင်းနဲ့ စစ်တွေ-အငူမော်လမ်တွေကို ဖွင့်ပေးခဲ့ပါတယ်

ဒါပေမဲ့ စစ်တွေ-ပုဏ္ဏားကျွန်းလမ်းနဲ့ စစ်တွေမြို့ဝင် တပ်ထိန်းစစ်ဆေးရေးဂိတ်ကို ရခိုင်ပြည်နယ်အစိုးရအဖွဲ့က ဒီနေ့အထိ ပိတ်ထားတဲ့အတွက် စစ်တွေ-အငူမော်လမ်းမှာလည်း သွားလာလို့ မရသေးတာလည်း ဖြစ်ပါတယ်။