ပြုံယမ်းမှာ စစ်ရေးနှစ်ပတ်လည် အထိမ်းအမှတ်အဖြစ် ပြင်ဆင်နေချိန်မှာ မြောက်ကိုရီးယားခေါင်းဆောင် ကင်မ်ဂျုံအန်းက စစ်ရေးလေ့ကျင့်မှုတွေ တိုးချဲ့ပြီး နိုင်ငံရဲ့ စစ်ပြင်ဆင်ရေး အနေအထားကို မြှင့်တင်သွားမယ်လို့ အစိုးရပိုင် ရုပ်မြင်သံကြား KRT က ဖေဖော်ဝါရီ ၇ ရက်မှာ ကြေညာပါတယ်။

ကင်မ်က ဖေဖော်ဝါရီ ၆ ရက်နေ့မှာပြုလုပ်တဲ့ အာဏာရ အလုပ်သမားပါတီရဲ့ ဗဟိုစစ်ကော်မရှင် အစည်းအဝေးမှာ ဥက္ကဋ္ဌအဖြစ် တာဝန်ယူခဲ့ပြီး တာဝန်ရှိသူတွေက အခုနှစ်အတွက် “အဓိက စစ်ရေးနဲ့ နိုင်ငံရေးတာဝန်တွေ” နဲ့ “စစ်တည်ဆောက်ရေး ဦးတည်ချက်ဆိုင်ရာ ရေရှည်ပြဿနာများ” အကြောင်းတွေကို ဆွေးနွေးခဲ့ကြတယ်လို့ နိုင်ငံပိုင်မီဒီယာက ဆိုပါတယ်။

လက်ရှိအခြေအနေကို ရင်ဆိုင်ဖို့နဲ့ စစ်ပွဲအတွက် ကြိုတင်ပြင်ဆင်မှုတွေကို ပိုမိုတင်းကျပ်စွာ ပြီးပြည့်စုံအောင် လုပ်ဆောင်ဖို့တို့အတွက် ကိုရီးယား ပြည်သူ့တပ်မတော် KPA ရဲ့ စစ်ဆင်ရေးနဲ့ တိုက်ခိုက်ရေး လေ့ကျင့်မှုတွေကို အဆက်မပြတ်တိုးချဲ့ပြီး အရှိန်အဟုန် ပြင်းပြင်းနဲ့ ဆောင်ရွက်ရေး ကိစ္စတွေကို လေ့လာပြီး ဆွေးနွေးခဲ့ကြကြောင်း နိုင်ငံပိုင်မီဒီယာက ထည့်သွင်း အစီရင်ခံခဲ့ပါတယ်။

မြောက်ကိုရီးယားနိုင်ငံဟာ ဖေဖော်ဝါရီ ၈ ရက်မှာ ကျရောက်တဲ့ မြောက်ကိုရီးယား တပ်မတော် တည်ထောင်ခြင်း နှစ်ပတ်လည်နေ့ အထိမ်းအမှတ်အဖြစ် စစ်ရေးပြအခမ်းအနား ကျင်းပဖို့ ကျယ်ကျယ်ပြန့်ပြန့် မျှော်လင့်ထားပြီးတော့ အစည်းအဝေး လုပ်နေတာပါ။

စီးပွားရေးလုပ်ငန်းသုံး ဂြိုဟ်တုဓာတ်ပုံတွေကနေ ပြုံယမ်းမှာ မြောက်ကိုရီးယားတပ်တွေ လေ့ကျင့်နေပုံတွေကို ပြသထားပြီး ဆက်စပ်လှုပ်ရှားမှုတွေကိုလည်း စောင့်ကြည့်နေကြောင်း တောင်ကိုရီးယားက ပြောပါတယ်။

ထိုင်ဝမ်လေတပ်က တရုတ်နှစ်သစ်ကူး အားလပ်ရက်မတိုင်ခင် နှစ်စဉ်ပြုလုပ်တဲ့ စစ်ရေးလေ့ကျင့်မှုပြပွဲမှာ ထိုင်ဝမ်ကျွန်းရဲ့ လေပိုင်နက်ကို ကာကွယ်နိုင်ဖို့ စစ်ရေးဆိုင်ရာ ပြင်ဆင်မှုတွေကို ဇန်နဝါရီ ၁၁ ရက်မှာ သရုပ်ဖော်ပြသခဲ့ပါတယ်။

ပြသမှုအတွင်း ဒုတိယလေကြောင်းတပ်ဖွဲ့ဝင် မီရာ့ချ် တိုက်လေယာဉ် ၂,၀၀၀ ကျော်ဟာ ပျံတက်ခြင်းနဲ့ ဆင်းသက်ခြင်းဆိုင်ရာ နည်းပညာတွေကို အစုအဖွဲ့တရပ် အနေနဲ့ ထိုင်ဝမ်တောင်ပိုင်းမှာရှိတဲ့ စင်ချူး လေတပ်စခန်းမှာ သရုပ်ဖော်ပြသခဲ့တာပါ။

တရုတ်နိုင်ငံက ထိုင်ဝမ်ကျွန်းအနားက ရေပြင်နဲ့ မြေပြင်ပိုက်နက်တွေကို ပုံမှန် ဝင်ရောက်ကျူးကျော်နေတာနဲ့ ပတ်သက်ပြီး တိုက်လေယာဉ်မှူးတဦးဖြစ်တဲ့ ဒုတိယဗိုလ်မှူးကြီး ဝူဘုံယန်းက “အားလုံးသော ထိုင်ဝမ်တိုက်လေယာဉ်တွေဟာ သတိအနေအထားမှာ အမြဲရှိနေပါတယ်” လို့ သတင်းစာရှင်းလင်းပွဲမှာ ဖြေဆိုပါတယ်။

ထိုင်ဝမ်ကာကွယ်ရေးဝန်ကြီးဌာနကလည်း လေကြောင်းကာကွယ်ရေးဇုန်ကို ပျံသန်းဝင်ရောက်လာတဲ့ လေယာဉ် ၂၈ စင်း အပါအဝင် လွန်ခဲ့တဲ့ ၂၄ နာရီအတွင်း ထိုင်ဝမ်ကျွန်းတဝိုက် လှည့်လည်သွားလာနေတဲ့ တရုတ်လေယာဉ် ၅၇ စင်းနဲ့ ရေတပ်သင်္ဘော ၄ စင်းတို့ကို ရှာဖွေထောက်လှမ်းမိခဲ့တယ်လို့ ဇန်နဝါရီ ၉ ရက်က ပြောပါတယ်။

တရုတ်နိုင်ငံက ဒီမိုကရေစီနည်းကျ အုပ်ချုပ်နေတဲ့ ထိုင်ဝမ်ကျွန်းကို တရုတ်ပိုင်နက်တခုအဖြစ် ရှုမြင်ထားတာသလို စစ်ရေးအရရော နိုင်ငံရေးနဲ့ စီးပွားရေးအရပါ ဖိအားပေးနိုင်ဖို့ တိုးမြှင့်လုပ်ဆောင်နေပါတယ်။