ရုရှားသမ္မတ ဗလာဒီမာပူတင်ဟာ ဇန်နဝါရီ ၄ ရက်က အသံထက်မြန်တဲ့ ဇာကွန် ခရုဇ်ဒုံးကျည်တွေ တပ်ဆင်ထားတဲ့ ဖရီးဂိတ်သင်္ဘောတစီးကို အတ္တလန္တိတ်သမုဒ္ဒရာဆီ  စေလွှတ်ခဲ့ပါတယ်။

ကာကွယ်ရေးဝန်ကြီး ဆာဂီလ် ရွှိုင်ဂူနဲ့ ဆိုဗီယက်ပြည်ထောင်စုရေတပ်ရဲ့ Admiral of the Fleet ဂတ်ရှ်ကို့ဗ်လို့ နာမည်ပေးထားတဲ့ ဖရီးဂိတ်သင်္ဘောရဲ့ စစ်ဦးစီးမှူး အစ်ဂေါ ခရော့ခ်မယ်လ် တို့နဲ့ ဗွီဒီယိုကွန်ဖရင့်မှာ ပူတင်က ဒီသင်္ဘောမှာ ဇာကွန်ခရုဇ်လို့ခေါ်တဲ့ အသံထက်မြန်တဲ့ လက်နက်တွေ တပ်ဆင်ထားတယ်လို့ ပြောခဲ့ပါတယ်။

ခုတကြိမ်မှာ သင်္ဘောမှာ မတူညီတဲ့ အသံထက်မြန်တဲ့ နောက်ဆုံးပေါ် ဒုံးကျည်စနစ် တပ်ဆင်ထားတယ်လို့ ပူတင်ကပြောပြီး ဒါဟာ “အသံထက်မြန်တဲ့ ပင်လယ်ကို အခြေခံတဲ့ စနစ်” ဖြစ်တယ်လို့လည်း ပြောခဲ့ပါတယ်။

ဂတ်ရှ်ကို့ဗ်သင်္ဘောဟာ အတ္တလန္တိတ်နဲ့ အိန္ဒိယသမုဒ္ဒရာ၊ မြေထဲပင်လယ်တို့ဆီ ဦးတည် ခုတ်မောင်းမယ်လို့ ရွှိုင်ဂူက ပြောခဲ့ပါတယ်။

“ဒီမှာ အခု ကျနော် ပထမဆုံးပြောချင်တာက ဒီ ထူးခြားတဲ့လက်နက် (Zircon အသံထက်မြန်တဲ့ ခရုဇ်ဒုံးပျံ) ကို ဖန်တီးပြီး အမြောက်အမြားထုတ်လုပ်ခဲ့တဲ့ ကာကွယ်ရေးစက်မှုလုပ်ငန်းက အထူးကျွမ်းကျင်သူတွေကို ကျေးဇူးတင်ချင်ပါတယ်။ ဒီ အားကောင်းတဲ့ လက်နက်ဟာ ရုရှားနိုင်ငံကို အလားအလာရှိတဲ့ ပြင်ပခြိမ်းခြောက်မှုတွေကနေ (မိမိကိုယ်ကို) စိတ်ချယုံကြည်စွာ ကာကွယ်နိုင်မှာဖြစ်ပြီး ကျွန်ုပ်တို့နိုင်ငံရဲ့ အမျိုးသားအကျိုးစီးပွားကို ထမ်းဆောင်ရာမှာ အထောက်အကူဖြစ်စေမယ်လို့ ယုံကြည်တယ်” လို့လည်း ပူတင်က ပြောပါတယ်။

ထိုင်းနိုင်ငံအနောက်ပိုင်း ပရကျုပ်ခီရီခန်ခရိုင်ရှိ ထိုင်းပင်လယ်အော်ထဲမှာ ဒီဇင်ဘာ ၁၈ ရက် ညက ဆုခိုထိုင်း အမည်ရှိ ထိုင်းရေတပ်ပိုင်သင်္ဘော တစီး နစ်မြှုပ်သွားခဲ့ပြီး ရေတပ်သားတွေကိုတော့ အသက်ရှင်လျက် ကယ်ဆယ်နိုင်ခဲ့ကာ ၅ ဦးကတော့ ဒဏ်ရာရသွားတယ်လို့  Thairath သတင်းမှာ ဖော်ပြပါတယ်။ 

အဆိုပါသင်္ဘောမှာ ရေတပ်သားပေါင်း ၁၀၆ ဦးလိုက်ပါလာကြောင်း ၊ သူတို့ဟာ ပင်လယ်ပြင်မှာ ကင်းလှည့်စစ်ရေးလေ့ကျင့်နေစဉ် လှိုင်းကြီးလေထန်တာနဲ့ ကြုံခဲ့ရတယ်လို့ ဆိုပါတယ်။ 

ကြီးမားတဲ့လှိုင်းလုံးကြီးပုတ်ခတ်တာခံရပြီးတဲ့နောက် လျှပ်စစ်မီးပျက်သွားပြီး သင်္ဘောပေါ်က ယန္တယားရပ်တံ့သွားကြောင်း၊ စက်မထိန်းနိုင်တော့တဲ့အခါ သင်္ဘောဝမ်းထဲကိုရေတွေဝင်လာပြီး တိမ်းစောင်းစပြုချိန်  မိခင်တပ်ရင်းနဲ့ ကူညီကယ်ဆယ်ရေးအဖွဲ့တွေကို  အကြောင်းကြားခဲ့တယ်လို့ အမှတ် ၁ ရေကြောင်းတပ် တာဝန်ရှိသူ ဗိုလ်မှူး ဖိချိုင်း လေ့ချုဆကွန်းက သတင်းထောက်တွေကို ပြောပါတယ်။ 

အဲဒီနောက်တော်ဝင်ရေတပ်မှ သင်္ဘောကြီး ၃ စီး ၊ ရဟတ်ယာဉ် ၂ စီး အပြင် ကယ်ဆယ် ရေးလှေငယ်တွေနဲ့ ပါသွားရောက်ကူညီခဲ့ကြောင်း၊ တပ်သားပေါင်း ၄၃ ဦးကို ကနဦး ကယ် တင်နိုင်ခဲ့ပြီး သင်္ဘောကြီးကတော့ မနေ့နေ့ ည ၁၁ နာရီခွဲလောက်မှာ စုံးစုံးမြှုပ်သွားခဲ့တယ်လို့ ဆိုပါတယ်။

ရေထဲပြန့်ကြဲကူးခတ်နေတဲ့ တပ်မတော်သားတွေကို မုန်တိုင်းတွေကြားက တညလုံး ခက်ခက်ခဲခဲ ကူညီကယ်ဆယ်နေခဲ့ရာမှာ ဒီကနေ့မနက် ၄ နာရီ မိနစ် ၂၀ မှာ ၇၃ ဦး ကယ်ဆယ်နိုင်ခဲ့ပြီး အဲဒီထဲက ဒဏ်ရာရသူ ၅ ဦးကို ဘန်ဆဖန်းမြို့နယ်ဆေးရုံကြီးကို ပို့ဆောင်ထားတယ်လို့ တာဝန်ရှိသူက ပြောပါတယ်။ 

ကနေ့မနက်မှာ ကျန်ရှိနေတဲ့ ၃၃ ဦးကို ဆက်လက်ရှာဖွေကယ်ဆယ်နေပြီး  အားလုံး အသက်ဘေးမှကင်းလွတ်အောင် ဝိုင်းဝန်းကူညီကယ်ဆယ်ဖို့ ထိုင်းဝန်ကြီးချုပ် ပရယုဒ်ကျ န်အိုးချားက  ညွှန်ကြားထားပါတယ်။ 

တချို့သတင်းတွေမှာ ရေတပ်သားတွေအားလုံကိုကယ်ဆယ်နိုင်ခဲတယ်လို့ ရေးသားဖော်ပြပေမဲ့ ဒီမနက်ထပ်ထွက်လာတဲ့ သတင်းတွေမှာတော့ ရေတပ်သား ၁၀၆ ယောက်ထဲက ၇၈ ယောက်ကို ကယ်ဆယ်နိုင်ခဲ့ကာ ၂၈ ယောက် ပျောက်ဆုံးနေဆဲပဲလို့ ထိုင်းရေတပ်ရဲ့ပြောဆိုချက်ကို ကိုးကားပြီး Khaosod သတင်းမှာ ဖော်ပြပါတယ်။

အဆိုပါ စစ်သင်္ဘောကြီးမှာ အရှည် ၇၆ ဒသမ ၈ မီတာ၊ အကျယ် ၉ ဒသမ ၆ မီတာ၊ အနက် ၄ ဒသမ ၅ မီတာနဲ့ ရှိပြီး အမေရိကန်နိုင်ငံထုတ်ဖြစ်ကာ သက်တမ်း ၃၈ နှစ်ရှိပြီလို့ ဆိုပါတယ်။

ကိုးကား- Thairath