အာကာသဂြိုဟ်တုလွှတ်တင်မှုသမိုင်းမှာ အကြီးမားဆုံး ဒုံးပျံကိုအသုံးပြုပြီး အင်္ဂါဂြိုဟ်သွား စီမံကိန်းထဲကတခုဖြစ်တဲ့ Spaceship အာကာသယာဉ်မကြီးကို လွှတ်တင်တဲ့ စမ်းသပ်ချက်တခုကို SpaceX  အာကာသနည်းပညာထိပ်တန်းကုမ္ပဏီက ဧပြီ ၂၀ ရက်မှာ ပြုလုပ်ခဲ့ပါတယ်။​

ဒါပေမဲ့ ဒီစမ်းသပ်ချက်ဟာ မူရင်းရည်မှန်းထားတဲ့ မိနစ် ၉၀ ကြာပျံသန်းမှုအပြီး ဟာဝိုင်ယီကျွန်းနားက ပစိဖိတ်သမုဒ္ဒရာထဲမှာပြုတ်ကျသွားရမယ့်အစား ပျံတက်ပြီး ၄ မိနစ်အကြာ ကမ္ဘာပတ်လမ်းထဲမရောက်ခင် အမြင့် ၂၄ မိုင်မှာ တနာရီမိုင် ၁၃၀၀ နှုန်းနဲ့ ပျံတက်နိုင်ခဲ့ပြီးနောက်မှာတော့ တွန်းတင်ပေးတဲ့ဒုံးပျံနဲ့ အာကာသယာဉ် ခွဲထွက်မှု မအောင်မြင်ခဲ့ပဲ အလိုလျောက်စနစ်နဲ့ ဖေါက်ခွဲဖျက်စီးပစ်လိုက်ရပါတယ်။

ဒါပေမဲ့ Launch Pad ဒုံးပျံပစ်စင်ကနေ ကမ္ဘာ့အကြီးမားဆုံးဒုံးပျံနဲ့ စံချိန်တင်အလေးချိန် တန်ချိန် ၅၀၀၀ လောက်ပမာဏကို အောင်မြင်စွာလွှတ်တင်နိုင်ခဲ့တဲ့အတွက် ဂုဏ်ပြုချီးကျူးတဲ့အကြောင်း SpaceX ရဲ့ CEO ဘီလီယံနာ သူဌေးကြီး အီလွန်မတ်စ်က တွစ်တာမှာရေးသားခဲ့ပါတယ်။

စိတ်လှုပ်ရှားစရာ စမ်းသပ်ချက်ဖြစ်ပြီး လာမယ့်လပိုင်းမှာ နောက်ထပ် ဒုံပျံစမ်းသပ်လွှတ်တင်ဖို့ လေ့လာစရာတွေအများကြီး ရရှိခဲ့တယ်လို့ အီလွန်မတ်စ်က ပြောပါတယ်။ ပေ ၄၀၀ လောက်ရှည်လျားပြီး တန်ချိန် ၅၀၀၀ လောက်သယ်ဆောင်ထားရတဲ့ အကြီးမားဆုံးဒုံးပျံနဲ့ အကြီးမားဆုံးအာကာသယာဉ်ဟာ အာကသထဲရောက်သွားနိုင်ဖို့က အောင်မြင်ဖို့ ၅၀ ရာနှုန်းပဲခန့်မှန်းထားပြီး ဒုံးပျံပစ်စင်မှာ ပေါက်ကွဲမသွားတာက အောင်မြင်မှုတခုပဲလို့ သူကပြောပါတယ်။ 

SpaceX ကုမ္ပဏီဟာ အခုစမ်းသပ်နေတဲ့ အာကာသယာဉ်မကြီး Spaceship ကို လာမယ့်နှစ်ပိုင်းမှာစတင်ဖို့ စီစဉ်ထားတဲ့ NASA ရဲ့ လကမ္ဘာပါတ်ခရီးစဉ်အပြင် ခရီးသည် ၁၀၀ ကျော် တင်ဆောင်နိုင်မယ့် ၆ လတာခရီးစဉ် အင်္ဂါဂြိုဟ်သွားစီမံကိန်းအတွက်ပါ အသုံးပြုဖို့ ရည်ရွယ်ထားတာဖြစ်ပါတယ်။

Spaceship ကို အာကာသထဲအရောက်ပို့ဆောင်ပေးမယ့် ကမ္ဘာ့အကြီးမားဆုံး Super Heavy - gargantuan ဟာ အကြိမ်ကြိမ်ထပ်မံသုံးစွဲနိုင်တဲ့ လွန်းပျံယာဉ်ဒုံးပျံဖြစ်ပြီး မီသိန်းနဲ့ အောက်ဆီဂျင်ဓါတ်ငွေ့အရည်သုံး အင်ဂျင် ၃၃ လုံးပါဝင်ပါတယ်။

အဲဒီထဲက အင်ဂျင်တချို့ မလည်ပတ်နိုင်တာကို လွှတ်တင်ပြီးမကြာခင်မှာပဲ သိရှိခဲ့ကြပါတယ်။ မူလအစီအစဉ်အရဆိုရင် ပေ ၂၃၀ လောက်ရှိတဲ့ super Heavy ဒုံးပျံဟာ တက္ကဆက်ပြည်နယ်တောင်ပိုင်း မက်ဆီကိုပင်လယ်ကွေ့နားကနေ လွှတ်တင်ပြီး ၂ မိနစ်ခွဲအကြာ ကမ္ဘာ့လေထုကိုဖြတ်သန်းပြီးတဲ့အခါ Spaceship အာကာသယာဉ်မကြီးနဲ့ အဆက်ဖြတ်ပြီး သမုဒ္ဒရာထဲကို ကျဆင်းမှာဖြစ်ပါတယ်။

ပေ ၁၈၀လောက်အရှည်ရှိတဲ့ Spaceship အာကာသယာဉ်မကြီးဟာ သူ့ရဲ့ သီးသန့်အင်ဂျင် ၆ လုံးနဲ့ ကမ္ဘာပတ်လမ်းမှာပျံသန်းပြီး မိနစ် ၉၀ အကြာမှာ ပင်လယ်ရေပြင်ဆီ ပြန်ကျဆင်းလာဖို့ အစီအစဉ်ဆွဲထားတာ ဖြစ်ပါတယ်။ 

အခုလိုဒေါ်လာသန်းပေါင်းရာနဲ့ချီ အဆုံးရှုံးခံပြီး စွမ်းစားရတဲ့ စမ်းသပ်ချက်မျိုးကို SpaceX လို ပုဂ္ဂလိက ကုမ္ပဏီကသာ လုပ်ဆောင်နိုင်ပြီး NASA အမေရိကန် အစိုးရအာကာသ အေဂျင်စီကတော့ လုပ်နိုင်စွမ်းမရှိပါဘူး။  

ဖေဖော်ဝါရီ ၂၇ ရက်က ဒုံးပျံတစီးစမ်းသပ်ချက်ဟာ ကင်းထောက်ဂြိုဟ်တုစနစ် တိုးတက်ရေးအတွက် စမ်းသပ်တာလို့ မြောက်ကိုရီးယားအစိုးရသတင်းဌာန KCNA က ဖေဖော်ဝါရီ ၂၈ ရက်မှာ ပြောပါတယ်။

မြောက်ကိုရီးယားကနေ ဒုံးပျံတစီး ပစ်လွှတ်ခဲ့တာကို ထောက်လှမ်းတွေ့ရှိအပြီး နောက်နေ့မှာ ခုလို ကြေညာတာပါ။ ဒါပေမဲ့ စမ်းသပ်ရာမှာသုံးတဲ့ ဒုံးပျံအမျိုးအစားကိုတော့ KCNA က အကျယ်တဝင့် ထုတ်မပြောပါဘူး။

ကိုရီးယားကျွန်းဆွယ်ကို အာကာသကနေ မြင်ရတဲ့ပုံကို ရိုက်ကူးထားတဲ့ ဓာတ်ပုံ ၂ ပုံကိုလည်း အစိုးရမီဒီယာက ထုတ်လွှင့်ပြသပါတယ်။ ဒါဟာ ဒီနှစ်အတွင်း ၈ ကြိမ်မြောက် ပစ်လွှတ်စမ်းသပ်တာ ဖြစ်ပြီး နျူကလီးယားလက်နက်ရှင် မြောက်ကိုရီးယားက ဒုံးကျည်တွေ စံချိန်တင် ပစ်လွှတ်တဲ့ ပထမဆုံးအကြိမ်လည်း ဖြစ်လာပါတယ်။

ဖေဖော်ဝါရီ ၂၇ ရက် စမ်းသပ်ချက်အရ ကင်းထောက်ဂြိုဟ်တုပေါ်မှာ တပ်ဆင်ထားတဲ့ ကင်မရာတွေဟာ ကမ္ဘာပေါ်က တိကျတဲ့ဧရိယာရဲ့ ဒေါင်လိုက်နဲ့ စွေစောင်းနေတဲ့ ပုံတွေကို ရိုက်ကူးပြီး အမြင့်ထိန်းချုပ်တဲ့ ကိရိယာတွေ သတင်းအချက်အလက် ထုတ်လွှင့်တဲ့စနစ်နဲ့ ပုံထွက် ကြည်လင်ပြတ်သားတဲ့ ဓာတ်ပုံရိုက်စနစ် အတိအကျ အလုပ်လုပ်ပုံကို အတည်ပြုရာမှာ ကူညီတယ်လို့ KCNA က ဆိုပါတယ်။

တောင်ကိုရီးယား အာဏာပိုင်တွေကတော့ ဒါဟာ နိုင်ငံတကာ လေဆိပ်ရှိရာ ပြုံယမ်းမြို့တော်နားက ဧရိယာတခုကနေ ပစ်လွှတ်လိုက်တဲ့ ပဲ့ထိန်းဒုံးကျည် ဖြစ်ပုံရတယ်လို့ ပြောခဲ့ပါတယ်။