ဒီနေ့ မတ်လ ၈ ရက် ကျင်းပတဲ့ တက္ကသိုလ်ဝင်စာမေးပွဲကို ကယားပြည်နယ်ရဲ့ မြို့နယ်လေးခုမှာ စာစစ်ဌာန ၄ ခုသာ ဖွင့်လှစ်နိုင်ပြီး ဝင်ရောက်ဖြေဆိုသူ အရေအတွက်က ၉၀၀ ကျော်ပဲရှိတယ်လို့ ပညာရေးဌာန အသိုက်အဝန်းက သိရပါတယ်။

ကယားပြည်နယ်မှာ လွိုင်ကော်မြို့၊ ရှားတောမြို့၊ ဖရူဆိုမြို့၊ ဒီးမော့ဆိုမြို့၊ မယ်ဆယ်မြို့၊ ဘော်လခဲမြို့၊ ဖားဆောင်းမြို့နယ်ဆိုပြီး မြို့နယ် ၇ ခုအထိ ရှိပါတယ်။

ဒါပေမဲ့ လွိုင်ကော်၊ ဘောလခဲ၊ ဖားဆောင်း၊ မယ်ဆယ် အစရှိတဲ့ မြို့နယ် ၄ ခုမှာပဲ စာစစ်ဌာနတွေ ဖွင့်လှစ်နိုင်ပြီး အရင်နှစ်ကလည်း စာစစ်ဌာန ၄ ခုသာ ဖွင့်လှစ်နိုင်ခဲ့သလို တက္ကသိုလ်ဝင်စာမေးပွဲကို ဖြေဆိုဖို့ စာရင်းပေးထားသူ ၉၉၅ ဦးအနက် ကျောင်းသားကျောင်းသူပေါင်း ၉၂၁ ဦး ဝင်ရောက်ဖြေဆိုပြီး ပျက်ကွက်သူ ၇၄ ဦးရှိတယ်လို့ ပြည်နယ်ပညာရေးမှူးရုံး တာဝန်ရှိသူတဦးက ပြောပါတယ်။

၂၀၂၀ ပြည့်နှစ်အထိ ကယားပြည်နယ်မှာ တက္ကသိုလ်ဝင်စာမေးပွဲဖြေဆိုဖို့ စာစစ်ဌာနပေါင်း ၂၀ ကျော်အထိ ဖွင့်လှစ်ခဲ့သလို ဝင်ရောက်ဖြေဆိုသူ ဦးရေဟာ တပြည်နယ်လုံးဆိုရင် ၈,၀၀၀ နီးပါးအထိ ရှိခဲ့ပေမဲ့ အာဏာသိမ်းပြီးနောက်ပိုင်း ကရင်နီတပ်တွေရဲ့ နယ်မြေစိုးမိုးနိုင်မှုတွေ များပြားလာတာနဲ့အတူ စစ်ကောင်စီကပြုလုပ်တဲ့ စာမေးပွဲ ၂ ကြိမ်လုံးကို စာစစ်ဌာန ၄ ခုအထိပဲ ဖွင့်လှစ်နိုင်ခဲ့တာ ဖြစ်ပါတယ်။

အာဏာသိမ်းစစ်ခေါင်းဆောင် မင်းအောင်လှိုင်ကတော့ လာမယ့်ပညာသင်နှစ်မှာ တနိုင်ငံလုံးမှာရှိတဲ့ အခြေခံပညာကျောင်းတွေ ဖွင့်လှစ်နိုင်ဖို့ ကြိုးစားသွားမယ်လို့ ကြုံးဝါးထားပါတယ်။

ရန်ကုန်မြို့ရှိ ဆေးရုံတွေမှာ ဆေးဝါးကုသမှုခံယူနေရတဲ့ ၂၀၂၂-၂၀၂၃ ခုနှစ် တက္ကသိုလ်ဝင် စာမေးပွဲဖြေဆိုမယ့် ကျောင်းသား ‌ကျောင်းသူတွေအနေနဲ့ ဆေးရုံလေးခုမှာ စာမေးပွဲဖြေဆိုခွင့်ရမယ်လို့ ပညာရေးအသိုက်အဝန်းကနေ သိရပါတယ်။

ရန်ကုန်တိုင်းအတွင်းရှိ မြို့နယ်အသီးသီးက ကျန်းမာရေးမကောင်းလို့ ဆေးဝါးကုသမှု ခံယူနေရတဲ့ ကျောင်းသားကျောင်းသူတွေအနေနဲ့ ရန်ကုန်ပြည်သူ့ဆေးရုံကြီး၊ မြောက်ဥက္ကလာပ အထွေထွေရောဂါကုနဲ့ သင်ကြားရေးဆေးရုံကြီး၊ ဗဟိုအမျိုးသမီးဆေးရုံကြီးနဲ့ ဝေဘာဂီအထူးကုဆေးရုံကြီးတို့မှာ စာမေးပွဲဖြေဆိုရမယ်လို့ ပညာရေးဝန်ထမ်းတဦးက ဒီဗွီဘီကို ပြောပါတယ်။

“စာမေးပွဲမတိုင်မီကတည်းက ဆေးရုံတက်နေရတဲ့ ကလေးတွေရှိတယ်။ သူတို့တက်နေတဲ့ ဆေးရုံက ဆေးလူမှုဆက်ဆံရေးဌာနမှာ စာရင်းပေးပြီး ဖြေရမှာ။”

မြောက်ဥက္ကလာပ အထွေထွေရောဂါကုနှင့် သင်ကြားရေးဆေးရုံကြီးနဲ့ အနီးတဝိုက်မှာ ဒီနေ့ မနက်ပိုင်းက စစ်ကောင်စီတပ်၊ ရဲနဲ့ မီးသတ်တွေ လုံခြုံရေးယူထားတယ်လို့ ကျောင်းသားမိဘတဦးက ဒီဗွီဘီကို ပြောပါတယ်။

“ကလေးတွေ စာမေးပွဲဖြေနေတဲ့အချိန် သေနတ်တွေနဲ့ စောင့်နေတာတော့ စိတ်ထဲ မလုံခြုံသလို ခံစားရတယ်။ ကလေးတွေအတွက်လည်း စိုးရိမ်တာတွေရှိတာပေါ့။ လုံခြုံရေးဆိုလည်း စာစစ်ဌာနနဲ့ မလှမ်းကမ်းမှာ စောင့်သင့်တယ်။”

ဒီနှစ် တက္ကသိုလ်ဝင်စာမေးပွဲမှာ စနစ်ဟောင်း သင်ရိုးဟောင်းရဲ့ နောက်ဆုံးစာမေးပွဲဖြစ်ကာ ကျရှုံးထားသူတွေနဲ့ မဖြေဆိုရသူတွေလည်း ပြန်လည်ဖြေဆိုနိုင်မှာဖြစ်ပြီး ဒီနှစ်ဖြေဆိုသူ ၁၈၀,၀၀၀ ကျော်ရှိတယ်လို့ ပညာရေးအသိုက်အဝန်းကနေ သိရပါတယ်။

၂၀၂၂ ခုနှစ် တက္ကသိုလ်ဝင်စာမေးပွဲမှာ ရန်ကုန်တိုင်းအတွင်းရှိ စာဖြေဌာန ၁၀၅ ခုမှာ ကျောင်းသား ၂၂,၂၉၂ ဦးနဲ့ ကျောင်းသူ ၁၅,၂၆၈ ဦး၊ စုစုပေါင်း ၃၇,၅၆၀ ဦး ဖြေဆိုခဲ့ပြီး တနိုင်လုံးအတိုင်းအတာအနေနဲ့ ၃၁၂,၂၉၉ ဦး ဖြေဆိုခဲ့ပါတယ်။

တောင်ကိုရီးယားကျောင်းသား ၅ သိန်းကျော်ဟာ နိုဝင်ဘာ ၁၆ ရက်က နှစ်စဉ် ခက်ခဲပင်ပန်းတဲ့ ကောလိပ်ဝင်ခွင့်စာမေးပွဲကို ဖြေဆိုခဲ့ကြပါတယ်။

အာရှရဲ့ စတုတ္ထအကြီးဆုံး စီးပွားရေးနိုင်ငံမှာ ကော်ပိုရိတ်အဖွဲ့အစည်းတွေရဲ့ အလုပ်အကိုင်တွေကလည်း အကန့်အသတ်နဲ့ရှိတာကြောင့် ဂုဏ်သိက္ခာကြီးမားတဲ့ တက္ကသိုလ်တခုခုကနေ ဘွဲ့တခုရရှိထားမှ အနိမ့်ဆုံးအားဖြင့် လုံခြုံစိတ်ချရမှု ရှိနိုင်မယ်လို့ ရှုမြင်ထားကြတာကြောင့် ပြိုင်ဆိုင်မှုပြင်းထန်ကြတဲ့ ဒီစာမေးပွဲဟာ အထက်တန်း ကျောင်းသူကျောင်းသား အများအပြားအတွက် ဘဝကိုပြဋ္ဌာန်းတဲ့ မှတ်တိုင်တခုလို့ သတ်မှတ်ထားကြတာပါ။

စာမေးပွဲမှာ ဘာသာစကားတွေကနေ သင်္ချာနဲ့ သိပ္ပံ ဘာသာရပ်တွေအထိ ပါဝင်ပါတယ်။

မိဘတွေနဲ့ ကျောင်းသားတချို့ကတော့ မကြာသေးခင်က လူပေါင်း ၁၅၆ ဦးထက်မနည်း သေဆုံးခဲ့တဲ့ ဟောလိုးဝင်းပွဲတော် ဖြစ်ရပ်ကြောင့် နဂိုထဲကမှ စိတ်ဖိစီးရတဲ့ ဘဝသတ်မှတ်ချက် စာမေးပွဲမှာ စိတ်ပိုင်းဆိုင်ရာ စိန်ခေါ်မှုတွေနဲ့ မသေချာ မရေရာမှုတွေ ထပ်တိုးလာတယ်လို့ ဆိုပါတယ်။

တောင်ကိုရီးယားဝန်ကြီးချုပ် ဟန် ဒွတ်ခ်ဆိုး ကတော့ စာမေးပွဲဖြေကြသူတွေဟာ စာမေးပွဲပြီးဆုံးခြင်း အထိမ်းအမှတ် စုဝေးကြလေ့ရှိတာကြောင့် လူစုလူဝေးများတဲ့ နေရာတွေမှာ လုံခြုံရေးအစီအမံတွေ ထပ်လုပ်ထားဖို့ တောင်းဆိုထားပါတယ်။