ထိုင်းနိုင်ငံ၊ ဘန်ကောက်၊ ဆိုင်မိုင်နယ်မြေထဲမှာ မတ် ၁၅ ရက်က စိတ်ကစဉ့်က လျားဖြစ်နေတဲ့ ရဲအရာရှိတဦးက သေနတ်နဲ့ ရမ်းသန်းပစ်ခတ်မှု ဖြစ်ပွားခဲ့ပြီးနောက် ထိုင်းနိုင်ငံတဝန်းက ရဲအရာရှိတွေကို စိတ်ကျန်းမာရေးစစ်ဆေးတော့မယ်လို့ မတ် ၁၇ ရက် ဘန်ကောက်ပို့စ်သတင်းမှာ ဖော်ပြပါတယ်။

ရဲအရာရှိတွေက တာဝန်ချိန်မှာ လူထုလုံခြုံရေးကို သေချာဂရုစိုက်နိုင်စေဖို့နဲ့ လုပ်ငန်းတာဝန်တွေကို စနစ်တကျဆောင်ရွက်နိုင်စေဖို့အတွက် စိတ်ကျန်းမာရေးစစ်ဆေးမှုတွေကို ကျပန်းစနစ်နဲ့ ဆောင်ရွက်သွားမှာဖြစ်ပြီး ပြည်သူတွေအနေနဲ့လည်း ရဲအရာရှိတွေ စိတ်ပိုင်းဆိုင်ရာ မူမမှန်ဘူး ယူဆပါက အကြံပြုချက်တွေ ပေးပို့နိုင်တယ်လို့ ရဲတပ်ဖွဲ့တာဝန်ရှိသူတွေက ပြောပါတယ်။ 

အသက် ၅၁ နှစ်အရွယ် ရဲအရာရှိ အမျိုးသားကို ၂၇ နာရီကြာ ပိတ်ဆို့တားဆီးခဲ့ရပြီး အဆိုပါပစ်ခတ်မှုကြောင့် နေအိမ် ၂၀ ကျော် ပျက်စီးသွားခဲ့ရကာ ကွန်မန်ဒိုရဲတပ်ဖွဲ့တွေနဲ့ ပစ်ခတ်ဖမ်းဆီးမှုမှာ အဆိုပါ ရဲအရာရှိ ဒဏ်ရာရပြီးနောက် သေဆုံးသွားခဲ့ပါတယ်။

အဲ့ဒီဖြစ်စဥ်အပြီးမှာ ထိုင်းနိုင်ငံထဲမှာရှိတဲ့ ရဲအရာရှိတွေအားလုံး စိတ်ကျန်းမာရေးစစ်ဆေးမှု ပြုလုပ်ရမယ်လို့ ထိုင်းရဲတပ်ဖွဲ့က ကြေညာခဲ့တာဖြစ်ပါတယ်။

ဓာတ်ပုံ-Bangkokpost

ထိုင်းနိုင်ငံမှာ သေနတ်ဝယ်ဖို့ ကြိုးစားသူတိုင်းအတွက် စိတ်ပိုင်းဆိုင်ရာ အကဲဖြတ်မှုတွေ လိုအပ်ပြီး မူးယစ်ဆေးစွဲနေသူတွေကိုလည်း ရှာဖွေဖော်ထုတ်ပြန်လည်ထူထောင်ရေးလုပ်ပေးဖို့ ဝန်ကြီးချုပ် ပရာယွတ် ချန်အိုချာက အောက်တိုဘာ ၁၂ ရက်မှာ ပြောပါတယ်။

“အစိုးရက ဒီကိစ္စကို ထိပ်တန်းဦးစားပေး ဧရာမကိစ္စအနေနဲ့ ချက်ချင်း အလေးပေး ဆောင်ရွက်နေပါတယ်”လို့ ဝန်ကြီးချုပ် ပရာယွတ်က ဗုဒ္ဓဟူးနေ့မှာ သတင်းထောက်တွေကို ပြောကြားခဲ့ပါတယ်။

သေနတ်လိုင်စင် လျှောက်ထားသူတွေနဲ့ ကိုင်ဆောင်ထားသူတွေအတွက် စိတ်ကျန်းမာရေး စစ်ဆေးမှုတွေကို ပုံမှန်လုပ်ဆောင်ဖို့ လိုအပ်ကြောင်းလည်း သူက ပြောပါတယ်။

ပရာယွတ်ဟာ မူးယစ်ဆေးစွဲသူတွေကို ရှာဖွေဖော်ထုတ်ဖို့နဲ့ ပြန်လည်ထူထောင်ရေး လုပ်ငန်းတွေအတွက် ၃ လ အချိန်ယူလုပ်ဆောင်ဖို့ ရဲတပ်ဖွဲ့နဲ့ တခြားအရာရှိတွေကို အမိန့်ပေးခဲ့ပါတယ်။

အစိုးရဟာ လက်နက်ကိုင်ဆောင်ထားတဲ့ တာဝန်ထမ်းဆဲ အစိုးရအရာရှိတွေနဲ့ လက်နက်ကိုင်ဆောင်သူ အငြိမ်းစား အစိုးရအရာရှိကြီးတွေ ၂ မျိုးလုံးအပေါ် အထူးသဖြင့် လူ့အဖွဲ့အစည်းအတွက် ‘အန္တရာယ်’ လက္ခဏာပြနေတဲ့သူတွေအပေါ် အချိန်အခါအလိုက် အကဲဖြတ်မှုတွေပြုလုပ်ဖို့ ကြိုးပမ်းနေကြောင်း ပြည်ထဲရေးဝန်ကြီး အနုဖုန် ပေါင်ချင်ဒါက ပြောပါတယ်။

ပြီးခဲ့တဲ့သီတင်းပတ်က မူးယစ်ဆေးကြောင့် အလုပ်ပြုတ်သွားတဲ့ ရဲတပ်ဖွဲ့ဝင်ဟောင်းတယောက်က ဓားနဲ့ သေနတ်ကိုသုံးပြီး ကလေး ၂၄ ယောက်နဲ့ သူကိုယ်တိုင် အပါအဝင် စုစုပေါင်း လူ ၃၇ ယောက်ကို သတ်ဖြတ် ကျူးလွန်ခဲ့ပြီးကတည်းက အစိုးရက တင်းကျပ်တဲ့ စည်းမျဥ်းစည်းကမ်းတွေကို ချမှတ်လိုက်တာလည်း ဖြစ်ပါတယ်။

အစပိုင်းကတော့ မူးယစ်ဆေးဝါးကြောင့်လို့ အပြစ်တင်နေကြပေမဲ့ သေနတ်သမားရဲ့ ရုပ်အလောင်းကို ခွဲစိတ်စစ်ဆေးခဲ့ရာမှာ လူသတ်မှုဖြစ်ပွားတဲ့နေ့က မူးယစ်ဆေးဝါး သုံးစွဲထားတဲ့လက္ခဏာ မပြကြောင်း ရဲတွေက ပြောပါတယ်။

သူတို့ရဲ့ စုံစမ်းစစ်ဆေးမှုတွေအရ ကျူးလွန်သူရဲ့ သောင်းကျန်းမှုဟာ သူ့အလုပ်ဆုံးရှုံးပြီး သူ့ဆက်ဆံရေး ပြိုကွဲမှုတွေကနေ လွန်လွန်ကဲကဲ စိတ်ဖိစီးမှုတွေကြောင့်လို့ ညွှန်ပြနေကြောင်း ရဲတွေက ပြောပါတယ်။