ကယား(ကရင်နီ)ပြည်အတွင်းက စစ်အာဏာရှင် တော်လှန်ရေးအင်အားစုတွေ စိုးမိုးနယ်မြေတွေအတွင်းမှာ ကရင်နီပြည်ရဲတပ်ဖွဲ့ (KSP)နဲ့ ပူးပေါင်းအဖွဲ့က ဒီလပိုင်းအတွင်း မူးယစ်ဆေးဝါးတွေနဲ့ တရားခံတွေကို ဆက်တိုက်ဖမ်းဆီးရမိနေတယ်လို့ သတင်းထုတ်ပြန်ပါတယ်။
ကရင်နီပြည်ရဲတပ်ဖွဲ့၊ ကရင်နီအမျိုးသားကာကွယ်ရေးတပ်(KNDF)၊ KNDF- CDM တပ်ဖွဲ့ဝင်တွေနဲ့ ကျေးရွာတာဝန်ခံတွေ ပါဝင်တဲ့ ပူးပေါင်းအဖွဲ့ဟာ စိုးမိုးနယ်မြေအတွင်း မူးယစ်ဆေးဝါးသတင်းအရ ရှာဖွေရာမှာ ရောင်းဝယ်ဖောက်ကားသူ၊ လက်ဝယ်ထားရှိသူတွေနဲ့အတူ WY စာတန်းပါ ပန်းရောင်မူးယစ်စိတ်ကြွဆေးဝါးတွေ ဆက်တိုက်ဖမ်းမိနေတာပါ။
နိုဝင်ဘာ ၂၈ က KSP အမှတ်(၇)ရဲစခန်းအဖွဲ့ဝင်တွေက စိုးမိုးနယ်မြေအတွင်း မူးယစ်ဆေးဝါးနဲ့ ပတ်သက်ပြီး ရှောင်တခင်စစ်ဆေးစဉ် တရားခံနှစ်ဦးနဲ့အတူ WY စာတမ်းပါ ပန်းရောင်မူးယစ်ဆေးဝါး ၁၁၀ ပြားနဲ့ မူးယစ်ဆေးဝါးသုံးစွဲရာမှာ အသုံးပြုတဲ့ သက်သေခံ ပစ္စည်းတွေနဲ့အတူ ဖမ်းဆီးရမိခဲ့ပါတယ်။
ဒါ့အပြင် နိုဝင်ဘာ ၁၀ ရက်ကလည်း ကရင်နီပြည်ရဲ၊ ညောင်ပင်လုံခြုံရေးရဲကင်းနဲ့ ပူးပေါင်းအဖွဲ့ဟာ စိုးမိုးနယ်မြေအတွင်း မူးယစ်ဆေးဝါးသတင်းအရရှာဖွေရာမှာ WY စာတန်းပါ ပန်းရောင်မူးယစ်ဆေးဝါး ၂၅၈၀ ပြား ဖမ်းဆီးရမိခဲ့တယ်လို့ ထုတ်ပြန်ထားပါတယ်။
ကရင်နီပြည်ရဲတပ်ဖွဲ့အနေနဲ့ တရားဥပဒေစိုးမိုးရေး၊ လုံခြုံရေးလုပ်ငန်းစဉ်တွေကို ဆောင်ရွက်နေတဲ့အပြင် ဒေသတွင်း မူးယစ်ဆေးဝါးအန္တရာယ်လျှော့ချနိုင်ရေးအတွက် အသိပညာပေးဟောပြောပွဲလည်း လစဉ်ပြုလုပ်နေပါတယ်။
ကရင်နီပြည်ရဲတပ်ဖွဲ့ကို စစ်အာဏာသိမ်းမှုကို ဆန့်ကျင်သပိတ်မှောက်ခဲ့ကြတဲ့ အာဏာဖီဆန် CDM ရဲဝန်ထမ်းတွေနဲ့ ၂၀၂၁ ခုနှစ် သြဂုတ်လ ၂၅ ရက်နေ့မှာ စတင်အခြေပြုဖွဲ့စည်းခဲ့တာ ဖြစ်ပါတယ်။
KSP ရဲ့ တနှစ်ကျော်ကာလအတွင်း အမှုပေါင်း ၂၃၅ မှုကို နိုင်ငံတကာ လူ့အခွင့်အရေးစံချိန်စံညွှန်းတွေနဲ့အညီ အရေးယူဆောင်ရွက်နိုင်တယ်လို့ ထုတ်ပြန်ထားပါတယ်။
ထိုင်းနိုင်ငံမြောက်ပိုင်း ချင်းရိုင်းခရိုင်နဲ့ လမ်းပန်းခရိုင်မှာ တစ်နေ့တည်း စိတ်ကြွဆေးပြားအလုံးရေ ၅ သန်း ၁ သိန်းကျော်ဖမ်းဆီးရမိတယ်လို့ မယ်ဆိုင်ထိုင်းသတင်းမှာ ဖော်ပြပါတယ်။
မတ်လ ၁၇ ရက် မနက်စောစောပိုင်းက ချင်းရိုင်း - ချင်းမိုင်သွား အဝေးပြေးလမ်းမကြီးပေါ်မှာ မြောက်ပိုင်းမူးယစ်ဆေးဝါးနှိမ်နင်းရေးတပ်ဖွဲ့နဲ့ နယ်မြေခံရဲတပ်ဖွဲ့တို့ တာဝန်အရ ဖြတ်သန်းသွားလာတဲ့ကားတွေကို စစ်ဆေးရာမှာအဖြူရောင် ဟိုင်းလပ်စ်ကား ၁ စီးက ရပ်မပေးဘဲ မောင်းပြီးထွက်ပြေးသွားလို့ တာဝန်ရှိသူတွေကလည်း နောက်က လိုက်လံဖမ်းဆီးခဲ့တယ်လို့ ဆိုပါတယ်။
အဆိုပါကားဟာ လမ်းမကြီးပေါ်ကနေ မဲ့ဆွေမြို့နယ် ဝါဝီကျေးရွာတောလမ်းဘက်ကို မောင်းသွားပြီး တောတွင်းတစ်နေရာရောက်တော့ အရှိန်နဲ့လမ်းဘေးတောင်စောင်းပေါ်ကနေလိမ့်ကျသွားကြောင်း ၊ ကားမောင်းသမားကတော့ မှောင်ရိပ်ခိုပြီးထွက်ပြေးလွတ်မြောက်သွားတယ်လို့ တာဝန်ရှိက သတင်း ထောက်ကို ပြောပါတယ်။
ကားပေါ်မှာတော့ ဆာလာအိတ်ပေါင်း ၁၁ အိတ်တွေ့ရှိကြောင်း ၊ အထဲမှာ ၉၉၉ အမှတ်တံဆိပ် စိတ်ကြွဆေးပြား စုစုပေါင်း ၁၇၇၀၀၀၀ ( တစ်သန်းခုနှစ်သိန်းခုနှစ်သောင်း ) ပါရှိတယ်လို့ ဆိုပါ တယ်။
အဲဒီနေ့ မနက် ၁၁ နာရီလောက်မှာတော့ ထိုင်းမြောက်ပိုင်း လမ်းပန်းခရိုင် မဲ့ဖလစ် စစ်ဆေးရေးဂိတ်မှာ ချင်းမိုင်ဘက်ကနေ မောင်းနှင်လာတဲ့ ဟိုင်းလပ်ကားတစ်စီးပေါ်ကနေ စိတ်ကြွဆေးပြား ၃ သန်းကျော်ထပ်ဖမ်းမိခဲ့ပါတယ်။
ယာဉ်မောင်းသူမှာ အသက် ၂၃ နှစ်ရွယ် ချင်းမိုင်သားဖြစ်ပြီး အဆိုပါမူးယစ်ဆေးဝါးတွေကို ပါဆယ်ထုတ်တွေထဲထည့်ပြီး သယ်ဆောင်လာခဲ့တာပါ။
အဆိုပါကားပေါ်ကနေ စိတ်ကြွဆေးစုစုပေါင်း ၃.၄၀၀,၀၀၀ ဖမ်းဆီးရမိပြီး ဆက်လက်စစ်ဆေးနေဆဲလို့ ထိုင်းတာဝန်ရှိသူတွေက ပြောပါတယ်။
ကိုးကား- Mae Sai Press
