ပဲခူးတိုင်း၊ ဖြူးမြို့နယ် လယ်ယာစိုက်ပျိုးရေးဘဏ်ကို မနေ့ ဇန်နဝါရီ ၁၈ ရက် ည ၇ နာရီလောက်မှာ ပြတင်းပေါက်ကနေ လက်ပစ်ဗုံးနဲ့ ပစ်ခတ်တိုက်ခိုက်ခဲ့လို့ Non CDM ဘဏ်ဝန်ထမ်း အမျိုးသမီးတယောက် အပြင်းအထန် ဒဏ်ရာရရှိခဲ့တယ်လို့ ဖြူးမြို့နယ် ပ.က.ဖ အဖွဲ့ထံက သိရပါတယ်။

မြို့နယ်ထဲက တောင်သူလယ်သမားတွေ စီးပွားရေး ကျပ်တည်းနေတဲ့အချိန်မှာ စိုက်ပျိုးရေးဘဏ်ဝန်ထမ်းတွေအနေနဲ့ စစ်ကောင်စီနဲ့ ပူးပေါင်းပြီး မိုးရာသီ စိုက်ပျိုးစရိတ် ချေးငွေတွေကို ခြိမ်းခြောက်တောင်းခံနေတာကြောင့် ပထမအကြိမ် သတိပေးတဲ့အနေနဲ့ တိုက်ခိုက်ခဲ့တာလို့  ဖြူးမြို့နယ် ပ.က.ဖ တာဝန်ခံ ဗိုလ်ထိန်လင်းက ဒီဗွီဘီကိုပြောပါတယ်။

“အဲဒီဘက်ဝန်ထမ်းတွေအနေနဲ့ စီးပွားရေးအကျပ်အတည်း ဖြစ်နေတဲ့ တောင်သူလယ်သမားတွေဆီကနေ ချေးငွေတွေကို ဆက်လက်ပြီး အတင်းအဓမ္မ ခြိမ်းခြောက် တောင်းခံတာတွေ ပြုလုပ်ပါက ထပ်မံတိုက်ခိုက်သွားမယ်။”

အခုအချိန်ဟာ ပြည်သူတရပ်လုံး စီးပွားရေးအကျပ်အတည်းနဲ့ ရင်ဆိုင်နေရတာဖြစ်သလို ဖြူးမြို့နယ်ထဲမှာ လောင်းကစားဝိုင်းတွေ ပြုလုပ်နေကြတယ်လို့ သတင်းရထားပြီး အရေးယူသွားမှာဖြစ်လို့ မိဘပြည်သူတွေအနေနဲ့ အဲဒီလောင်းကစားဝိုင်းတွေကို မပြုလုပ် မသွားလာကြဖို့ကိုလည်း သတိပေးထားပါတယ်။

ဧရာဝတီတိုင်း၊ ဇလွန်မြို့မှာ နိုဝင်ဘာ ၂၅ ရက် ဒီမနက်အစောပိုင်းက စစ်ကောင်စီ လက်အောက်ခံ စိုက်ပျိုးရေးဘဏ်ရှေ့ ဗုံးပေါက်ကွဲခဲ့တယ်လို့ ဒေသခံတွေက ပြောပါတယ်။

လမ်းမတော်မြောက်ရပ်ကွက်မှာရှိတဲ့ စိုက်ပျိုးရေးဘဏ်ရှေ့မှာ မနက် ၆ နာရီ ၁၀ မိနစ်လောက်က ဗုံးပေါက်ကွဲခဲ့တာဖြစ်ပြီး လူထိခိုက်တာ မရှိဘူးလို့ ဆိုပါတယ်။

ဒေသခံတဦးက “စိုက်ပျိုးရေးဘဏ်ရှေ့မှာ ဖြစ်သွားတာ၊ ပေါက်တာတော့ တလုံးပဲ၊ သတိပေးတဲ့အနေနဲ့ လုပ်တာဖြစ်နိုင်တယ်။ ခဏနေတာနဲ့ ရဲတွေရော စစ်သားတွေရော ရောက်လာတာပဲ” လို့ ဒီဗွီဘီကို ပြောပါတယ်။

ဗုံးပေါက်ကွဲပြီးနောက်ပိုင်းမှာ စစ်ကောင်စီတပ်သားတွေက လမ်းကို ပိတ်ဆို့စစ်ဆေးခဲ့တယ်လို့ ဆိုပါတယ်။

စိုက်ပျိုးရေးဘဏ် ဗုံးပေါက်ကွဲတာနဲ့ ပတ်သက်ပြီး ဘယ်အဖွဲ့အစည်းကလုပ်တယ်ဆိုတာ အတိအကျ မသိရသေးဘူးလို့ ဒေသခံတွေက ပြောပါတယ်။

ဗုံးပေါက်ကွဲခဲ့တဲ့ စိုက်ပျိုးရေးဘဏ်ဟာ ဒုတိယအကြိမ် ပေါက်ကွဲတာဖြစ်ပြီး ၂၀၂၂ ခုနှစ် မတ်လ ၂၈ ရက်ကလည်း ဗုံးပေါက်ကွဲမှု ဖြစ်ပွားခဲ့သေးတယ်လို့ ဆိုပါတယ်။