သြစတြေးလျနိုင်ငံရဲ့ အထင်ကရလေကြောင်းလိုင်းဖြစ်တဲ့ ကန်းတက်စ် အဲဝေးစ် လေကြောင်းလိုင်းဟာ သူ့ရဲ့ ဘဏ္ဍာရေးအကြီးအကဲ ဗနက်ဆာ ဟဒ်ဆန်ကို အမှုဆောင်အရာရှိချုပ်အဖြစ် မေလ ၂ ရက်က ခန့်အပ်ခဲ့ပါတယ်။
သူဟာ ရာစုနှစ်သက်တမ်းရှိတဲ့ လေကြောင်းလိုင်းကို ဦးဆောင်တဲ့ ပထမဆုံး အမျိုးသမီး ဖြစ်လာခဲ့တာပါ။
ဟဒ်ဆန်ဟာ ဩစတြေးလျကုမ္ပဏီကြီးတခုရဲ့ သက်တမ်းအကြာဆုံး လက်ရှိ အမှုဆောင်အရာရှိချုပ် ဖြစ်လာပြီး ကမ္ဘာ့လေကြောင်းလုပ်ငန်းမှာ ၁၅ နှစ်ကြာ လုပ်ကိုင်ခဲ့တဲ့ အလန်ဂျွိုက်စ်ဆီကနေ နိုဝင်ဘာလမှာ တာဝန်လွှဲပြောင်းရယူမှာလည်း ဖြစ်ပါတယ်။
“နိုဝင်ဘာလမှာ ဒီအခန်းကဏ္ဍကို လျှောက်လှမ်းခွင့်ရတာ ဂုဏ်ယူဝမ်းမြောက်မိသလို အခွင့်အလမ်းသာမက ကျွန်ုပ်တို့ရဲ့ အနာဂတ်အတွက်ပါ အရမ်းစိတ်လှုပ်ရှားမိပါတယ်” လို့ ဟဒ်ဆန်က စီအီးအိုအဖြစ် သတ်မှတ်ထားတဲ့ ပထမဆုံး သတင်းစာရှင်းလင်းပွဲမှာ သတင်းထောက်တွေကို ပြောခဲ့ပါတယ်။
ကန်းတက်စ်ဥက္ကဋ္ဌ ရစ်ချတ် ဂွိုင်ဒါက ဟဒ်ဆန်ဟာ ကိုဗစ် အကျပ်အတည်းအတွင်း ဘဏ္ဍာရေးနဲ့ ဘဏ္ဍာငွေအစုစုကို ကိုင်တွယ်ရာမှာ ထူးချွန်ခဲ့ပြီး လေကြောင်းလိုင်းဟာ အလုပ်အတွက် ဆန်ခါတင်စာရင်းဝင်ထားတဲ့ ကမ္ဘာတဝန်း ကိုယ်စားလှယ်လောင်း ၄၀ နီးပါးထက် သာလွန်တယ်လို့လည်း ပြောခဲ့ပါတယ်။
ဟဒ်ဆန်ဟာ လွန်ခဲ့တဲ့ ၂၈ နှစ်က ကန်းတက်စ်ကို အလုပ်ဝင်ခဲ့ပြီး ဘဏ္ဍာရေး အမှုဆောင်အရာရှိချုပ်၊ ဖောက်သည်ဆက်ဆံရေး အရာရှိချုပ်နဲ့ အမေရိကန်နဲ့ နယူးဇီလန်အတွက် အကြီးတန်းဒုတိယဥက္ကဋ္ဌ အပါအဝင် အကြီးတန်းရာထူးများစွာကို ထမ်းဆောင်ခဲ့ပါတယ်။
တိုယိုတာမော်တာကော်ပိုရေးရှင်း အမှုဆောင်အရာရှိချုပ် (စီအီးအို) အကီယို တိုယိုဒါဟာ သူ့အဖိုး တည်ထောင်ခဲ့တဲ့ကုမ္ပဏီရဲ့ အကြီးအကဲနေရာကနေ နုတ်ထွက်တော့မှာဖြစ်ပြီး ဇိမ်ခံကား ထုတ်လုပ်ရေးဌာန အကြီးအကဲဖြစ်သူကို ရာထူးလွှဲပြောင်းပေးမှာဖြစ်တယ်လို့ ဂျပန်ကား ထုတ်လုပ်ရေးကုမ္ပဏီက ဇန်နဝါရီ ၂၆ ရက်မှာ အတည်ပြုပါတယ်။
တိုယိုတာကုမ္ပဏီဟာ လျှပ်စစ်ကားတွေထုတ်လုပ်ရေးဘက်ကို ရုန်းကန်နေရတာကြောင့်လို့ ဆိုပါတယ်။
တိုယိုတာကုမ္ပဏီရဲ့ ဇိမ်ခံကားအမှတ်တံဆိပ် Lexus ရဲ့ ဥက္ကဋ္ဌ အသက် ၅၃ နှစ်အရွယ် ကိုဂျီ ဆာတို ဟာ လာမယ့်ဧပြီ ၁ ရက်နေ့ကစလို့ အမှုဆောင်အရာရှိချုပ်အဖြစ် တာဝန်ယူသွားမှာဖြစ်ပြီး တိုယိုဒါ ကတော့ ဥက္ကဋ္ဌအဖြစ် ဆက်ရှိနေဦးမှာပါ။
တိုယိုဒါဟာ ဒီအပြောင်းအလဲတွေကို တိုယိုတာတိုင်းမ်စ် ချန်နယ်ရဲ့ အင်တာနက်ပေါ် ထုတ်လွှင့်တဲ့ ဗီဒီယိုကနေ ကြေညာခဲ့တာပါ။
ဆာတိုဟာတိုယိုတာကုမ္ပဏီရဲ့ သဘောတရားတွေကို ကောင်းကောင်းနားလည်သူ ဖြစ်တဲ့အတွက် အခုလို ရွေးချယ်ခဲ့တာလို့ သူက ဆိုပါတယ်။
တိုယိုတာကုမ္ပဏီ တည်ထောင်သူရဲ့ အသက် ၆၆ နှစ်အရွယ် မြေးဖြစ်သူ တိုယိုဒါ ဆီကနေ ဘယ်သူ ဆက်ခံမလဲ ဆိုတာဟာ ရင်းနှီးမြှုပ်နှံသူတွေအတွက် အာရုံစိုက်စရာ ကိစ္စရပ်တစ်ခု ဖြစ်လာတာ ကြောင့် ဒီအပြောင်းအလဲ ကြေညာလိုက်ချိန်မှာ အံ့အားသင့်ခဲ့ကြပါတယ်။
