တနင်္သာရီတိုင်း၊ လောင်းလုံးမြို့နယ်၊ သဗျာကျေးရွာအနီး ထားဝယ်-လောင်းလုံး ကားလမ်းမပေါ်မှာ မေလ ၁၇ ရက်၊ နေ့လယ် ၁ နာရီခွဲလောက်က စွန်ရဲအမည်ခံ ပျူစောထီးအဖွဲ့ဝင်တွေ စီးနင်းလာတဲ့ ကားတစီး ပစ်ခတ်တိုက်ခိုက်ခံခဲ့ရပြီး ထိခိုက်မှုရှိနိုင်တယ်လို့ ဒေသခံတွေကပြောပါတယ်။ 

လောင်းလုံးမြို့ခံတဦးကတော့ "ပစ်ခံရတာက လောင်းလုံးရဲစခန်းကို ဝင်လာတုန်း လမ်းမှာပစ်ခံရတာ၊ ပျူစောထီးတယောက် သေတယ်လို့တော့ကြားရတယ်၊ ပစ်ခံရပြီးတာနဲ့ လောင်းလုံးမြို့ပေါ်မှာတော့ ပျူစောထီးတွေရော ရဲတွေရော ပျာယာခတ်နေတာပဲ"လို့ ပြောပါတယ်။

လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ကတော့ အဲဒီပစ်ခတ်တိုက်ခိုက်မှုကို သူတို့တပ်ဖွဲ့နဲ့ Dawei Defense Team (DDT) တပ်ခွဲ(၃)တို့ ပူးပေါင်းလုပ်ဆောင်ခဲ့တာဖြစ်ပြီး ပစ်ခတ်မှုကြောင့် ပျူစောထီးအဖွဲ့ဝင်တယောက် ကားပေါ်ကနေ ပြုတ်ကျသွားတာ မြင်တွေ့ခဲ့ရတယ်လို့ ထုတ်ပြန်ထားပါတယ်။

ပစ်ခတ်တိုက်ခိုက်ခံရတဲ့ ပျူစောထီးအဖွဲ့ဝင်တွေဟာ လောင်းလုံးမြို့နဲ့ ၅ မိုင်လောက်ဝေးတဲ့ ပန္ဒလဲကျေးရွာမှာ စခန်းချနေထိုင်ကြတဲ့အဖွဲ့တွေဖြစ်ကြပြီး အင်အား ၁၅ ယောက် ရှိတယ်လို့လည်း သိရပါတယ်။

အဆိုပါ စွန်ရဲအမည်ခံ ပျူစောထီးအဖွဲ့ဝင်တွေဟာ ပြီးခဲ့တဲ့ ဧပြီလအတွင်းက ပန္ဒလဲရွာခံ ပြည်သူ ၄ ယောက်ကို ပစ်ခတ်သတ်ဖြတ်ခဲ့တဲ့အပြင်  ကျေးရွာအတွင်း ရမ်းကားနေလို့ လက်ရှိအချိန်ထိ ရွာခံပြည်သူအများစု နေအိမ်စွန့်ခွာ တိမ်းရှောင်နေကြရပါတယ်။

မေ ၁ ရက်ကလည်း ပန္ဒလဲကျေးရွာအတွင်း အဆိုပါ စွန်ရဲအမည်ခံ ပျူစောထီးအဖွဲ့ဝင်တွေနဲ့ ပြည်သူ့ကာကွယ်ရေးပူးပေါင်းတပ်တွေ တိုက်ပွဲဖြစ်ပွားခဲ့ပြီး နှစ်ဖက်ထိခိုက်မှုရှိခဲ့ပါတယ်။

တနင်္သာရီတိုင်း၊ ထားဝယ်ခရိုင်၊ လောင်းလုံးမြို့နယ်အတွင်း စစ်ကောင်စီက လက်နက်တပ်ဆင်ပေးထားတဲ့ စွန်ရဲအမည်ခံ ပျူစောထီးအဖွဲ့ဝင်တွေက ပြည်သူတွေကို မတရားသတ်ဖြတ် ခြိမ်းခြောက်တာတွေ ပြုလုပ်နေတယ်လို့ ဒေသခံတွေက ပြောပါတယ်။

စွန်ရဲအမည်ခံ ပျူစောထီးအဖွဲ့ဝင်တွေဟာ ဧပြီ ၂၈ ရက်ညက လောင်းလုံးမြို့နယ်၊ ပန္ဒလဲကျေးရွာအတွင်း ကျေးရွာရပ်မိရပ်ဖ ၃ ဦးကို နေအိမ်တွေအထဲထိ ဝင်ရောက်ပစ်ခတ် သတ်ဖြတ်ခဲ့ပြီး မေ ၃ ရက်၊ မနက် ၂ နာရီလောက်ကလည်း အသက် ၃၅ နှစ်အရွယ် အမျိုးသားတဦးကို ထားဝယ်-လောင်းလုံး ကားလမ်းမပေါ်မှာ လက်ပြန်ကြိုးတုပ် ပစ်ခတ်သတ်ဖြတ်ထားခဲ့တယ်လို့ သိရပါတယ်။

ဒါ့အပြင် လောင်းလုံးမြို့နယ်အတွင်း သပိတ်လှုပ်ရှားမှုတွေကို ဦးဆောင်နေတဲ့ ထားဝယ်ခရိုင် သပိတ်ကော်မတီဝင် ကိုမင်းလွင်ဦး အပါအဝင် သပိတ်လှုပ်ရှားမှုတွေမှာ ပါဝင်သူတွေရဲ့ မိသားစုဝင်တွေကို သတ်ဖြတ်မယ်ဆိုပြီး ခြိမ်းခြောက်နေကြောင်း ထားဝယ်ခရိုင် သပိတ်ကော်မတီက ထုတ်ပြန်ထားပါတယ်။

အဲဒီခြိမ်းခြောက်မှုနဲ့ ပတ်သက်ပြီး ထားဝယ်ခရိုင် သပိတ်ကော်မတီဝင်တဦးက "လူထုသပိတ်ဆိုတာက လုံးဝ အကြမ်းမဖက်တဲ့ လှုပ်ရှားမှုတခုပါ။ အဲဒီလို လှုပ်ရှားမှုမှာ ပါဝင်နေတဲ့သူတွေကို အခုလို ခြိမ်းခြောက်တာကတော့ တော်တော်ယုတ်မာ အောက်တန်းကျတဲ့ လုပ်ရပ်ပါပဲ။ ဒါတွေအကုန်လုံးက စစ်ကောင်စီရဲ့ စီမံချက်တွေပါပဲ" လို့ ပြောပါတယ်။

လောင်းလုံးမြို့နယ်၊ ပန္ဒလဲကျေးရွာမှာလည်း အဆိုပါ ပျူစောထီးအဖွဲ့ရဲ့ မတရားသတ်ဖြတ် ရမ်းကား ခြိမ်းခြောက်မှုတွေကြောင့် တရွာလုံးနီးပါး ထွက်ပြေးတိမ်းရှောင်နေကြရပါတယ်။

အင်အား ၁၅ ဦးလောက်ရှိတဲ့ စွန်ရဲအမည်ခံ ပျူစောထီးအဖွဲ့ကို စစ်ကောင်စီက လက်နက်တပ်ဆင်ပေးထားတာဖြစ်ပြီး အဲဒီအဖွဲ့ဝင်တွေဟာ ရဲစခန်း၊ စရဖရုံးတွေကို အမြဲဝင်ထွက် သွားလာနေကြတယ်လို့ ဒေသခံတွေက ပြောပါတယ်။