သီရိလင်္ကာနိုင်ငံ၊ ကိုလံဘိုမြို့မှာ ဆန္ဒပြနေတဲ့ ကျောင်းသားတွေကို ရဲတပ်ဖွဲ့က မျက်ရည်ယိုဗုံးတွေကို သုံးပြီး လူစုခွဲခဲ့ပါတယ်။
အရေးပေါ် အခြေအနေ ကြေညာထားတဲ့ စီးပွားရေးမြို့တော်မှာ တက္ကသိုလ်ကျောင်းသားတွေဟာ ဩဂုတ် ၁၈ ရက်က လမ်းတွေကို ပိတ်ဆို့ပြီး ဆန္ဒပြခဲ့ကြတာပါ။
သမ္မတ ဝစ်ကရမ်မက်ဆင်းဂ် နုတ်ထွက်ပေးဖို့ အုပ်ချုပ်ရေး အာဏာပေးထားတဲ့ သမ္မတ နေရာကို ဖျက်သိမ်းဖို့နဲ့ နိုင်ငံရေးအကျဉ်းသားတွေကို လွှတ်ပေးဖို့ တောင်းဆိုခဲ့ကြပါတယ်။
ဆန္ဒပြသမားတွေ စုရုံးနေတဲ့နေရာကို ရဲအင်အား အလုံးအရင်းနဲ့ ရောက်လာပြီး တချို့ကို ဖမ်းဆီးသွားတယ်လို့ ရိုက်တာသတင်းက ဆိုပါတယ်။
သီရိလင်္ကာမှာ ၁၉၄၈ နောက်ပိုင်း အဆိုးရွားဆုံး စီးပွားပျက်ကပ်ဆိုက်နေပြီး အရင်တပတ်ကတည်းက သမ္မတက နိုင်ငံတော် အရေးပေါ် အခြေအနေ ကြေညာထားပေမယ့် ဆန္ဒပြပွဲတွေကလည်း အခုအချိန်ထိ မရပ်သေးပါဘူး။
မတ်လက စတည်းက စတင်ခဲ့တဲ့ ဆန္ဒပြပွဲတွေကို လူငယ်တွေက ဦးဆောင်နေတာ ဖြစ်ပြီး၊ နိုင်ငံရေးစနစ်တခုလုံးကို ပြောင်းလဲဖို့ တောင်းဆိုနေတာလည်း ဖြစ်ပါတယ်။
ရန်ကုန်တိုင်း၊ သင်္ဃန်းကျွန်းမြို့နယ်မှာ မေ ၃၀ ရက်က စစ်အာဏာရှင်ဆန့်ကျင်ရေး ငြိမ်းချမ်းစွာဆန္ဒပြတဲ့ သပိတ်စစ်ကြောင်းကို စစ်ကောင်စီတပ်က ကားနဲ့တိုက်ပြီး အကြမ်းဖက် ဖမ်းဆီးခဲ့ပါတယ်။
ကျောင်းသားသမဂ္ဂအဖွဲ့ဝင်တဦးက “ခွေးပါးစပ်ထဲက တိုင်းပြည်ကို ရအောင်ပြန်ယူမယ်ဆိုတဲ့ စာသားပါ ပိုစတာကိုင်ဆွဲပြီး ကျောင်းသားသမဂ္ဂနဲ့ မဟာမိတ်အဖွဲ့တွေ ဆန္ဒပြချိန်မှာ စစ်ကောင်စီတပ်သားတွေ အိမ်စီးကားနဲ့နောက်ကဝင်တိုက်ဖမ်းဆီးခဲ့လို့ ကျောင်းသား ၅ ဦးထက်မနည်းဖမ်းဆီးခံခဲ့ရတာ”လို့ ဒီဗွီဘီကို ပြောပါတယ်။
အတည်ပြုလို့ရသလောက် အနည်းဆုံး ၅ ယောက်လောက်ပါသွားပြီး ဘယ်သူတွေ ပါသွားတယ်ဆိုတာတော့ မသိရသေးဘူးလို့ဆိုပါတယ်။
သပိတ်စစ်ကြောင်းကို အိမ်စီးကားနဲ့ နောက်ကဝင်တိုက်ပြီး ဖမ်းဆီးသွားတဲ့ ကျောင်းသားတွေကို ဘယ်နေရာကိုဖမ်းဆီးသွားတယ်ဆိုတာ ခုထိ မသိရသေးပါဘူး။
၂၀၂၁ ခုနှစ်၊ ဒီဇင်ဘာ ၅ ရက်နေ့ကလည်း စစ်အာဏာရှင်ဆန့်ကျင်ရေး ဆန္ဒပြသူတွေကို စစ်ကောင်စီ တပ်သားတွေက ကားနဲ့တိုက် ဖမ်းဆီးခဲ့ဖူးပါတယ်။
