ထိုင်းနိုင်ငံမှာ နှစ်သစ်ကူး သင်္ကြန်ကာလကို ဧပြီ ၁၂ မှ ၁၅ ရက်အထိ သတ်မှတ်ထားပေမဲ့ ကန်ကျနပူရီခရိုင်၊ ဆန်ခလပူရီရှိ မွန်တိုင်းရင်းသားအများဆုံးနေထိုင်ရာ မွန်တံတားအနီးတဝိုက်မှာတော့ ဧပြီ ၉ ရက်ကတည်းက လူစည်ကားနေပြီလို့ ဒေသတွင်း ထိုင်းသတင်းမှာ ဖော်ပြပါတယ်။ 

အဝေးမှာအလုပ်သွားလုပ်တဲ့ ဒေသခံတွေက သင်္ကြန်ကာလ အိမ်ပြန်တာရှိသလို တချို့ကလည်း တမင်သက်သက်မွန်တံတားကိုအလည်လာတာကြောင့် လူစည်ကားနေကြောင်း၊ အဲဒီမွန်တံတားမှာ သံဃာတော်တွေ ဆွမ်းလောင်းဖို့ အလှူစာ ၁ စုံ ဘတ် ၉၀ နဲ့ပြင်ဆင်ရောင်းချနေပြီး မွန်၊ ကရင်၊ မြန်မာရိုးရာဝတ်စုံတွေကိုလည်း အခမဲ့ငှါးရမ်းကာ ဓာတ်ပုံတွေရိုက်နိုင်တာကြောင့် ခရီးသွားဧည့်သည်တွေကြား ရေပန်းစားနေပါတယ်။

ဥတ္တမနုဆွန် ခေါ် မွန်တံတားဟာ ကန်ကျနပူရီခရိုင်၊ ဆန်ခလပူရီမြို့နယ် နောင်လူးအုပ်စု ဘန့်ဝမ်းရပ်ကွက်ထဲမှာ တည်ရှိပြီး သစ်တွေနဲ့ချည်း တည်ဆောက်ထားတာပါ။ အရှည် ၈၅၀ မီတာကျော်ရှည်လျားပြီး ထိုင်းနိုင်ငံမှာ အရှည်လျားဆုံးဖြစ်ကြောင်း၊ ကမ္ဘာပေါ်မှာတော့ မြန်မာပြည်က ဦးပိန်တံတားပြီးရင် ဒုတိယအရှည်ဆုံး သစ်သား တံတားလို့ ဆိုပါတယ်။

တံတားကို ဆရာတော်ဦးဥတ္တမရဲ့ စီစဉ်ကွပ်ကဲမှုနဲ့ လွန်ခဲ့တဲ့ နှစ်ပေါင်း ၄၀ နီးပါးက ကာလွေမြစ်ပေါ်မှာတည်ဆောက်ခဲ့ပြီး တံတားပေါ်ကနေ သန့်ရှင်းလတ်ဆတ်စွာ လေညှင်းခံကာ မွန်ရိုးရာယဉ်ကျေးမှုတွေကိုလည်း လေ့လာနိုင်တာကြောင့် ခရီးသွား ဧည့်သည် အလည်အ ပတ်များတဲ့နေရာတစ်ခုလည်းဖြစ်ပါတယ်။

ဒီမတိုင်ခင်ရှေ့က မီးခိုးမြူတွေရှိခဲ့ပေမယ့် ခုရက်ပိုင်းမှာ မိုးရွာလာတာကြောင့် PM 2.5 မြူမှုန်သိပ်သည်းမှုလျော့နည်းသွားပြီး ကောင်းကင်မှာ ကြည်လင်နေပါတယ်။

ဒီနှစ်မွန်သင်္ကြန်မှာလည်း မွန်ရိုးရာဓလေ့အတိုင်း သံဃာတော်တွေကို ဆွမ်းလောင်းတာ၊ ဘုရားဆင်းတုတော် ရွှေဆိုင်းပူဇော်တာ၊ ဘုရားရေသပ္ပါယ်တာ၊ သက်ကြီးပူဇော်တာ၊ မွန်ရိုးရာအကပဒေသာနဲ့ ရေကစားမဏ္ဍပ်တွေရှိမယ်လို့ ကန်ကျနပူရီခရီးသွားလုပ်ငန်း သတင်းမှာ ဖော်ပြပါတယ်။ 

ဓာတ်ပုံ - ကန်ကျနပူရီသတင်း

ထိုင်းနိုင်ငံ အနောက်မြောက်ပိုင်း ကန်ကျနပူရီခရိုင် ဆန်ခလပူရီမြို့နယ်ရှိ ကမ္ဘာလှည့်ခရီးသွားဇုန်တခုဖြစ်တဲ့ မွန်တံတားအနီးမှာ မနေ့ညက နေအိမ်နဲ့ ဆိုင်ခန်းတွေ မီးလောင်သွားတယ်လို့ ကန်ကျနပူရီဒေသတွင်းသတင်းမှာ ဖော်ပြပါတယ်။ 

ဖေဖော်ဝါရီ ၁၆ ရက် ည ၁၀ နာရီကျော်က နောင်လူးအုပ်စု ဝမ်းကာ့ရပ်ကွက်ရှိ ဥတ္တမနုဆွန် ခေါ် မွန်တံတားအနီးမှာ မီးလောင်မှုဖြစ်ပွားကြောင်း တိုင်ကြားချက်ရတဲ့အတွက် မီးသတ်တပ်ဖွဲ့ ကယ်ဆယ်ရေးအဖွဲ့တွေနဲ့အတူ သွားရောက်အကူအညီပေးခဲ့တယ်လို့ ဆန်ခလပူရီ မြူနီစီပါယ်ဥက္ကဋ္ဌ နိုင်းဝိကျန်း ကွန်းချနရတ်က သတင်းထောက်တွေကို ပြောပါတယ်။ 

မီးလောင်တဲ့နေရာဟာ မွန်တံတားဘေးမှာရှိတဲ့ ဈေးဆိုင်ခန်းနဲ့ နေအိမ်တွေဖြစ်ကြောင်း၊ ခရီးသွားဧည့်သည်လည်ပတ်စရာနေရာတခု ဖြစ်တာကြောင့် မီးလောင်ခံရတဲ့ ဆိုင်ခန်းတွေဟာ လွယ်အိတ်၊ ဦးထုပ်၊ အဝတ်အထည်နဲ့ ဖဲန်ဆီအလှတန်ဆာဆင်ပစ္စည်းတွေ၊ ကော်ဖီဆိုင် နဲ့ အလှပြင်ဆိုင်တွေလို့ ဆိုပါတယ်။ 

မြို့နယ်မီးသတ်ဌာနက မီးသတ်ကား ၂ စီးနဲ့ တပ်မတော်သားတွေရော ပြည်သူတွေပါ မီးဝိုင်းငြိမ်းကြရာ ၁ နာရီခန့်အကြာမှာ မီးကိုထိန်းနိုင်ခဲ့ကြောင်း၊ ဒါပေမယ့် ဘေးချင်းကပ် ဈေးဆိုင်ခန်း ၅ ခန်းနဲ့ နှစ်ထပ်ပျဉ်ထောင်အိမ် ၁ လုံးတော့ မီးထဲပါသွားကြောင်း၊ ဆိုင်ထဲက အရောင်းပစ္စည်းနဲ့ နေအိမ်ပရိဘောဂအားလုံး ဆုံးရှုံးပြီး ထိခိုက်ဒဏ်ရာရသူတော့ မရှိဘူးလို့ ဆိုပါတယ်။ 

မီးလောင်ရတဲ့အကြောင်းရင်းမှာ ဝါယာရှော့ဖြစ်တယ်လို့ အကြမ်းဖျင်းသိထားပြီး အသေးစိတ်ကို သက်ဆိုင်ရာက စုံစမ်းစစ်ဆေးနေဆဲပဲလို့ သတင်းမှာ ဖော်ပြသွားပါတယ်။