ကရင်ပြည်နယ်၊ မြဝတီမြို့အခြေစိုက်၊ စစ်ကောင်စီလက်အောက်ခံ နယ်ခြားစောင့်တပ် BGF အတွင်းရေးမှူး ဗိုလ်မှူးကြီး စောချစ်သူဟာ ဇွန် ၅ ရက် ဒီနေ့မနက်  ၁၀ နာရီလောက်က စစ်ရှောင်ပြည်သူနဲ့ ဖလူးကျေးရွာ ဘုရားကျောင်းမှာတွေ့ဆုံခဲ့တယ်လို့ ဒေသခံရွာသားတွေထံက သိရပါတယ်။

တွေ့ဆုံပွဲမှာ  BGF ၊ DKBA နဲ့ အမည်မဖေါ်လိုတဲ့ တခြားအဖွဲ့အစည်းတွေလည်း ပါဝင်ပြီး တက်ရောက်လာတဲ့ စစ်ရှောင်ပြည်သူနဲ့ ရွာသားတချို့ကို ဆန်အိတ် ၄၀၀ အိတ်ကျော်နဲ့ တခြားစားသောက်ပစ္စည်းတွေ လှူဒါန်းပေးအပ်သွားတယ်လို့ တက်ရောက်သူ တဦးက ပြောပါတယ်။

၂၀၂၁ ခုနှစ် ဒီဇင်ဘာ ၁၄ ရက် စစ်ကောင်စီ ကျူးကျော်ဝင်ရောက်တိုက်ခိုက်မှုကြောင့် တိုက်ပွဲစတင် ခဲ့ရာ ငြိမ်းချမ်းရေးမြို့သစ်ဖြစ်တဲ့ လေးကေ့ကော်မြို့နဲ့ ပတ်ဝန်းကျင်ကျေးရွာတွေမှာ စစ်ဘေးရှောင်ရွာသားတွေ ပြန်လည် နေထိုင်နိုင်ဖို့ ခက်ခဲနေဆဲဖြစ်ပါတယ်။

မကွေးတိုင်း ဆိပ်ဖြူမြို့နယ်က ရှားလှကျေးရွာ ပြည်သူတွေကို ဧပြီ ၂၂ ရက်နေ့ နေ့လယ်ပိုင်းမှာ လူငယ်တော်လှန်ရေးတပ်ဦး YRF တပ်ဖွဲ့က ဆန်ရိက္ခာတွေ လှူဒါန်းထောက်ပံ့ပေးခဲ့ကြပါတယ်။ 

ဆိပ်ဖြူမြို့နယ် ရှားလှကျေးရွာမှာ ဧပြီ ၂၂ ရက်နေ့ နေလယ်ပိုင်းက မီးဘေးသင့်အိမ်ထောင်စု ၄၆ စုအတွက် တအိမ်ထောင်ကို ဆန် ၈ ပြည်စီ ထောက်ပံ့ လှူဒါန်းပေးခဲ့တယ်လို့ YRF ခေါင်းဆောင် ဗိုလ်နားပေါက်က ဒီဗွီဘီကို ပြောပါတယ်။

“ကျနော်တို့ တပ်ဖွဲ့အနေနဲ့ ပြည်သူလူထုကို ယခုလို လှူဒါန်းရတာဟာ နိုင်ငံတဝန်းမှာရှိတဲ့ ပြည်သူ့ကာကွယ်ရေးတပ်တွေအနေနဲ့ တပ်ရင်းတရင်း ထောင်မယ်ဆိုရင် စစ်အာဏာရှင်ပြုတ်ကျရေးအတွက် ပြည်သူ့ရဲ့ အထောက်ပံ့နဲ့ ရပ်တည်ကြရတာ ဖြစ်လို့ အခုလို လှူဒါန်းပေးတာ။ ကျနော်တို့ တော်လှန်ရေးလုပ်တယ်ဆိုတာက တိုက်ခိုက်ဖို့ တခုတည်းမဟုတ်ဘဲ ပြည်သူ့ကာကွယ်ရေးတပ်မတော်ဆိုပေမယ့် ပြည်သူရဲ့လိုအပ်ချက်တွေကို ဖြည့်ဆည်းပေးရမယ်လို့ ခံယူထားပါတယ်။”

စစ်ကောင်စီတပ်က နေအိမ်တွေကို မီးရှို့သွားတာကြောင့် ပြည်သူတွေဟာ တောတောင်ကြား၊ မိုးထဲလေထဲမှာ ဒုက္ခရောက်ပြီး ငတ်ပြတ်နေကြတာကြောင့် အခုလို ပြန်ပြီးကူညီပေးတာလို့ ဆိုပါတယ်။

“ကျနော်တို့ ဒုက္ခဖြစ်နေတဲ့ အချိန်မှာလည်း ပြည်သူတွေကြည့်မနေသလို ပြည်သူတွေ ဒုက္ခရောက်တဲ့ အချိန်မှာလည်း ကျနော်တို့ အဖွဲ‌ေစည်းတွေက ကြည့်နေလို့မရလို့ စစ်အာဏာရှင်ပြုတ်ကျရေးအတွက် ပြည်သူလူထုရဲ့ အကူညီတွေ အများကြီးလိုအပ်တာမို့ ထောက်ပံလှူဒါန်ပေးတာ” လို့ ဗိုလ်နားပေါက်က ပြောပါတယ်။

ရှားလှကျေးရွာမှာ အိမ်ထောင်စု လေးငါးဆယ်လောက်တော်တော်ဒုက္ခရောက်နေကြတာတာဖြစ်ပြီး အခုလို YRF တပ်ဖွဲ့က လာရောက်လှူဒါန်းပေးတာကြောင့် ကျေးဇူးအများကြီးတင်တယ်လို့ ရွာသားတယောက်က ပြောပါတယ်။

“အလှူရှင်တွေမရှိဘူးဆိုရင် ထမင်း ၃ နပ်ကို နပ်မှန်အောင်မစားကြရဘဲ တချို့ဆိုရင် တနပ်ပဲ စားကြရတယ်။ မီးဘေးသင့်တဲ့သူတွေရော၊ စစ်ဘေးရှောင်ပြည်သူတွေရော တောတွေထဲမှာ အဆင်ပြေသလိုပဲ နေနေကြရတယ်ဗျ။ တောတွေထဲမှာ အဆောက်ဦက ခိုင်ခိုင်မာမာဆောက်လို့ မရသလို မိုးကာလေးတွေနဲ့ တဲထိုးကာ နေနေကြရပြီး မိုးကာမတတ်နိုင်သူတွေလည်း သစ်ပင်ရိပ်တွေမှာ အဆင်ပြေသလိုနေထိုင်ကြရတယ်။” 

အခုလို လာရောက်လှူဒါန်းပေးတဲ့ လူငယ်တော်လှန်ရေးတပ်ဦးကိုလည်း ရွာသူရွာသားတွေကိုယ်စား အများကြီးကျေးဇူးတင်သလို ပြည်တွင်းပြည်ပက လှူဒါန်းမယ့် အလှူရှင်တွေကိုလည်း ပြည်သူ့ကာကွယ်ရေးတပ်ဖွဲ့တွေကနေတဆင့် ဒေသဆိုင်ရာယာယီအုပ်ချုပ်ရေးအဖွဲ့တွေကို လှူဒါန်းပေးကြဖို့ တောင်းဆိုထားပါတယ်။

ဆိပ်ဖြူမြို့နယ်မြောက်ပိုင်းနဲ့ ပေါင်မြို့နယ်တောင်ပိုင်းတို့မှာ ဧပြီ ၇ ရက်နေ့ကစတင်ပြီး ဒီနေ့အထိ ကျေးရွာ ၁၈ ရွာလောက်ကို စစ်ကောင်စီတပ်တွေ ဝင်ရောက်မီးရှို့တာကြောင့် ပြည်သူ ၁၈၀၀၀ လောက်ထွက်ပြေးနေရကာ စားနပ်ရိက္ခာ၊ အမိုးအကာ၊ အဝတ်အထည်နဲ့ ဆေးဝါး အကူညီတွေ အရေးပေါ်လိုအပ်နေတယ်လို့ သိရပါတယ်။