မကွေးတိုင်း ဆိပ်ဖြူမြို့နယ်မှာ သြဂုတ် ၃ ရက်မနက်ပိုင်းက စစ်ကောင်စီတပ်သားတွေ လိုက်ပါလာတဲ့ ကားကို ဒေသကာကွယ်ရေးတပ်ဖွဲ့တွေက ၂ ကြိမ်မိုင်းဆွဲ တိုက်ခိုက်ခဲ့လို့ စစ်ကောင် စီဘက်က ၄ ယောက် သေဆုံးကာ အများအပြားဒဏ်ရာ ရခဲ့တယ်လို့ ဆိပ်ဖြူဘာမထီ ပြောက်ကျား တပ်ဖွဲ့က သြဂုတ် ၅ ရက်မှာထုတ်ပြန်ပါတယ်။
ဖလံမရွာနားမှာ သြဂုတ် ၃ ရက် မနက် ၉ နာရီလောက်မှာ စစ်ကောင်စီတပ်အင်အား ၅၀ လောက်ဟာ ဖောကား ၂ စီးနဲ့ တက်လာချိန် ဆိပ်ဖြူဘာမထီပြောက်ကျားအဖွဲ့နဲ့ ချောက်ပကဖတို့ ပူးပေါင်းမိုင်းဆွဲခဲ့တာလို့ ဆိပ်ဖြူဘာမထီ ပြောက်ကျားတပ်ဖွဲ့မှ တပ်ခွဲမှူး ကိုပိုင်က ပြောပါတယ်။
ဒါအပြင် ဖလံမရွာနဲ့ အိုင့်ကြီးရွာကြားမှာ မနက် ၁၁ နာရီလောက်က အိမ်စီးကား တစီးအပါဝင် စစ်ကောင်စီတပ်အင်အား ၃၀ လောက် ခြေလျင် စစ်ကြောင်းထိုးလာလို့ နောက်တကြိမ် မိုင်းဆွဲ တိုက်ခိုက်ခဲ့ရာမှာ စစ်ကောင်စီတပ်ဖွဲ့ဝင် ၄ ယောက်လောက် သေဆုံးကာ အများအပြားဒဏ်ရာရခဲ့တယ်လို့ ကိုပိုင်က ဆက်ပြောပါတယ်။
“စစ်(...)အလောင်းတွေကိုတော့ ကားပေါ်ကို ထမ်းတင်သွားတာ။ မှန်ဘီလူးနဲ့ အဝေးက လှမ်းကြည့် လို့ မြင်ရတာ။ ဒဏ်ရာရသူတွေကိုလည်း တွဲခေါ်သွားတာတွေ့ရတယ်။”
စစ်ကောင်စီတပ်က ဖလံဖရွာဘက်ကနေ အိုင့်ကြီးရွာနားကို လက်နက်ကြီးတွေနဲ့ ၃ ချက်လောက်ပစ်ခတ်ခဲ့ပေမဲ့ မပေါက်ကွဲခဲ့ဘူးလို့ သိရပါတယ်။
စစ်ကောင်စီတပ်တွေဟာ ဆိပ်ဖြူမြို့နယ်ကို ဇူလိုင် ၇ ရက်ကတည်းက စစ်ကြောင်းတွေ ဆက်တိုက်ထိုးနေပြီး ဆက်သွယ်ရေးဖုန်းလိုင်းနဲ့ အင်တာနက်လိုင်းတွေ ဖြတ်တောက်ထားလို့ သတင်းထုတ်ပြန်တာ နောက်ကျခဲ့ရတယ်လို့ ဆိုပါတယ်။
အခုလို မိုင်းဆွဲတိုက်ခိုက်ခံရတာနဲ့ ပတ်သက်ပြီး ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း ထိခိုက်သေဆုံးတဲ့ အခြေနေကို သတင်းထုတ်ပြန်တာ မတွေ့ရသေးပါဘူး။
မကွေးတိုင်း၊ ဆိပ်ဖြူမြို့နယ်မှာ ဖေဖော်ဝါရီ ၂ ရက်မှ ၄ ရက်အထိ စစ်ကောင်စီတပ်တွေနဲ့ ပေါက်တောင်ပိုင်းPDFတပ်တွေအကြား တိုက်ပွဲဖြစ်ပွားပြီး စစ်ကောင်စီဘက်က တပ်သား ၇ ယောက်သေဆုံးခဲ့တယ်လို့ ဒေသခံ SPPDF တပ်ဖွဲ့ကနေ သိရပါတယ်။
ဆိပ်ဖြူမြို့နယ် ရှားလှကျေးရွာကို ဖေဖော်ဝါရီ ၂ ရက်နေ့မှာ စစ်ကောင်စီတပ်တွေ ရှောင်တခင်ဝင်ရောက်လာတာကြောင့် ရာနဲ့ချီတဲ့ ဒေသခံရွာသားတွေ တိမ်းရှောင်ချိန်မရဘဲ အဖမ်းခံခဲ့ရပါတယ်။
ရှားလှရွာမှာတပ်စွဲထားတဲ့ စစ်ကောင်စီတပ်တွေကို ဖေဖော်ဝါရီ ၃ ရက် မနက်ပိုင်းမှာ တစ်ကြိမ် ညနေပိုင်းမှာတစ်ကြိမ် SPPDF တပ်ရင်း(၂)က ဗိုလ်နားပေါင်း ဦးဆောင်တဲ့ အဖွဲ့က လက်နက်ကြီးနဲ့ သွားရောက်ပစ်ခတ်တိုက်ခိုက်ခဲ့ပြီး ဖမ််းဆီးခံရွသားတွေကို ကယ်ထုတ်ခဲ့တာလို့ ဆိုပါတယ်။
SPPDF ရဲ့ ပြန်ကြားရေးတာဝန်ခံက “ဖေဖော်ဝါရီ ၄ ရက် မနက်ပိုင်းမှာ ကျနော်တို့ SPPDF က စစ်ကာင်စီတပ်တွေကို မိုင်းဆွဲတိုက်ခိုက်ခဲ့သလိုရွာထဲမှာ အင်အားနည်းနည်းချန်ပြီး ရွာပြင်ထွက်တဲ့အချိန်မှာ ဒေသခံပြည်သူ ၁၀၀ ကျော်လောက်ကို ဝင်ရောက်ကယ်ထုတ်နိုင်ခဲ့ပြီး ၁၅ မိနစ်လောက် နှစ်ဖက်အပြန်လှန်တိုက်ပွဲ ဖြစ်ပွားခဲ့တယ်”လို့ ပြောပါတယ်။
အဲဒီတိုက်ပွဲမှာ စစ်ကောင်စီတပ်ဘက်က ၇ ယောက်သေဆုံးပြီး အများအပြားဒဏ်ရာရရှိသွားကာ SPPDF ဘက်က ရဲဘော်တစ်ယောက် ဒဏ်ရာရရှိခဲ့ပေမယ့် မစိုးရိမ်ရဘူးလို့ ဆိုပါတယ်။
SPPDF တပ်ဖွဲ့က စစ်ကောင်စီတပ်တွေ သတ်ဖြတ်သွားတဲ့ အဘွားကို တစ်ယောက်ကိုလည်း ကောင်းကောင်းမွန်မွန် သင်္ဂြိုဟ်ပေးခဲ့ပြီး ဒေသခံရွာသား ၁၀၀ ကျော်ကို ဘေးလွတ်ရာသို့ ပို့ဆောင်ပေးခဲ့တယ်လို့ ပြောပါတယ်။
နှစ်ဖက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။
