မန္တလေးတိုင်း၊ မဟာအောင်မြေမြို့နယ်၊ ၈၇ × ၈၉ လမ်းကြား၊ ၃၅ လမ်းပေါ်မှာ ဖေဖော်ဝါရီ ၂၃ ရက် ညနေက ဆိုင်ကယ်စီးလာတဲ့ အမျိုးသမီး ၁ ဦးကို လူငယ် ၂ ဦးက လုယက်ပြီး ဆိုင်ကယ်မောင်းနှင်ထွက်ပြေးရာ လုယက်ခံရသူ အမျိုးသမီးက အော်ဟစ်တဲ့အတွက် အနီးနားရှိ ပြည်သူတွေက ဝိုင်းဝန်းဖမ်းဆီးလိုက်တယ်လို့ ရပ်ကွက်အတွင်း နေထိုင်သူတွေထံက သိရပါတယ်။
မြင်တွေ့ခဲ့သူ အမျိုးသားတဦးက “လူငယ် ၂ ယောက်က အမျိုးသမီး ၁ ယောက်ဆီကနေ ပိုက်ဆံအိတ်လုပြေးတာ။ ပတ်ဝန်းကျင်က ဝိုင်းဖမ်းတာ၊ ဖမ်းတဲ့သူတွေကို ပြန်ရန်လုပ်တာနဲ့ ဝိုင်းပြီး ထိုးကြိတ်ပစ်လိုက်တာ ဒဏ်ရာတွေရသွားတယ်” လို့ ပြောပါတယ်။
လုယက်သူ လူငယ် ၂ ဦးကို ရဲတွေကဖမ်းသွားပြီး ဒဏ်ရာတွေရှိလို့ ဆေးရုံကိုခေါ်သွားတယ်လို့ အနီးနားရှိ မြို့ခံတွေထံက သိရပါတယ်။
မန္တလေးမြို့မှာ မကြာခဏ ဓားပြမှု၊ လုယက်မှုတွေ ဖြစ်ပွားနေပြီး လုယက်ခံရသူတွေ ထိခိုက်ဒဏ်ရာရကာ အသက်သေဆုံးတဲ့အထိ ဖြစ်နေပေမဲ့ စစ်ကောင်စီအဖွဲ့တွေနဲ့ ရဲတပ်ဖွဲ့ဝင်တွေကတော့ ထိထိရောက်ရောက် ဖမ်းဆီးအရေးယူနိုင်တာ မရှိဘူးလို့ မြို့ခံတွေက ဆိုပါတယ်။
ကချင်ပြည်နယ်၊ မြစ်ကြီးနားမြို့၊ စံပြဘောလုံးကွင်းရှေ့မှာ စက်တင်ဘာ ၂၀ ရက် ည ၈ နာရီခွဲလောက်က အမျိုးသမီးတယောက် လည်ပင်းညှစ်ခံရပြီး ဆိုင်ကယ်လုခံရတယ်လို့ ဆိုင်ကယ်ပိုင်ရှင်က ပြောပါတယ်။
“ကျမ ဘက်ထရီဒေါ်လာဆိုင်ကယ်လေး၊ ၈ နာရီခွဲလောက်က စံပြဘောလုံးကွင်းရှေ့နားမှာ သူငယ်ချင်းမလေးကို လည်ပင်းညှစ်၊ ဓားပြတိုက်ခံရပြီး အလုခံလိုက်ရပါတယ်။ သူငယ်ချင်းမလေးရဲ့ ဖုန်းနဲ့ လက်ပ်တော့ ပိုက်ဆံလည်းပါသွားတယ်။”
ဆိုင်ကယ်လု ဓားပြတိုက်သူနှစ်ယောက်က လမ်းရှေ့ကပိတ်ပြီး တယောက်က လည်ပင်းညှစ်နေချိန် ကျန်တယောက်က ပါတဲ့ပစ္စည်းတွေ အမြန်ယူဖို့ပြောပြီး လည်ပင်းညှစ်ခံရချိန် သတိမေ့ဟန်ဆောင်လိုက်မှ ထွက်ပြေးသွားတာဖြစ်ကြောင်း ပစ္စည်းလုခံရသူရဲ့ မိတ်ဆွေက ပြောပါတယ်။
“ဆိုင်ကယ်လုမခံရခင်ကတည်းက လမ်းမေးသလိုလိုနဲ့ နောက်ကလိုက်တယ်။ A Bar လမ်းခွဲကတည်းက လိုက်လို့ သူက ခဏရှောင်ပြီး ပြန်လာတဲ့အချိန် လမ်းမှာ 125 ဆိုင်ကယ်နဲ့ ပိတ်ရပ်ပြီး အလုခံရတာပါ။ ဆိုင်ကယ်ပြန်ရောင်းတာတို့ ရှိလာရင် အကြောင်းကြားပေးစေလိုပါတယ်။”
ဆိုင်ကယ်လုခံရတာနဲ့ပတ်သက်ပြီး ရပ်ကွက်အုပ်ချုပ်ရေးမှူး၊ နယ်ထိန်းတွေကို သတင်းပို့ထားပေမဲ့ အခုချိန်ထိ အကြောင်းမကြားသေးဘူးလို့ ဆိုင်ကယ်ပိုင်ရှင်က ပြောပါတယ်။
ကချင်ပြည်နယ်၊ မြစ်ကြီးနားမြို့မှာ ၂၀၂၂ ခုနှစ်အတွင်း အိမ်ဖောက်ထွင်းခံရမှုတွေ၊ မီးကြိုးဖြတ်ခိုးခံရမှု၊ လူသတ်မှုတွေနဲ့ ဆိုင်ကယ်ခိုးခံရမှုတွေ မကြာခဏ တွေ့ကြုံနေတာဖြစ်ပါတယ်။
