ပါကစ္စတန်အရှေ့ပိုင်း ပန်ဂျပ်ပြည်နယ်ရဲ့ ဂျာလားပူရ် ပီးဝါလာ ခရိုင်အနီးမှာ ခရီးသည်တင် ဘတ်စ်ကားတစီး လောင်စာဆီသယ်ယာဉ်နဲ့ တိုက်မိခဲ့ပြီး အနည်းဆုံး လူ ၂၀ လောက် မီးလောင်သေဆုံးကာ ၆ ယောက် ဒဏ်ရာရရှိခဲ့ကြောင်း ပြည်တွင်းမီဒီယာတွေမှာ ဖော်ပြပါတယ်။
သတင်းတွေအရ ဩဂုတ် ၁၆ ရက် မနက်အစောပိုင်းမှာ ယာဉ်တိုက်မှုဖြစ်ကာ ယာဉ်နှစ်စီးလုံး မီးလောင်ခဲ့ပြီး ခရီးသည် ၁၈ ယောက် အခင်းဖြစ်နေရာမှာတင် သေဆုံးခဲ့ပါတယ်။
အဲဒီနောက် မော်တော်ယာဉ် လမ်းစည်းကမ်းရဲတပ်ဖွဲ့နဲ့ ကယ်ဆယ်ရေးအဖွဲ့တွေ ရောက်ရှိလာပြီး ကယ်ဆယ်ရေးလုပ်ငန်း စတင်ဆောင်ရွက်ခဲ့ကြောင်း ဒေသခံမီဒီယာတွေက ပြောပါတယ်။
ကယ်ဆယ်ရေးအတွင်း ဒဏ်ရာရရှိသူ ၈ ယောက်ကို ဆေးရုံပို့ဆောင်ခဲ့ပြီး သူတို့ထဲက ၂ ယောက်ဟာ ဆေးကုသမှုခံယူနေစဉ် ဒဏ်ရာတွေကြောင့် သေဆုံးသွားခဲ့တယ်လို့ ဆိုပါတယ်။
ဘတ်စ်ကား အပျက်အစီးတွေထဲကနေ လူသေအလောင်း ၁၈ လောင်းကို ထုတ်ယူရရှိထားတယ်လို့ ဆိုပါတယ်။
ယာဉ်မောင်းတယောက်နဲ့ ယာဉ်နောက်လိုက်အကူတယောက် အပါအဝင် လူ ၂၆ ယောက်ဟာ ပန်ဂျပ်ပြည်နယ်ရဲ့ မြို့တော် လာဟိုးကနေ နိုင်ငံတောင်ပိုင်းက ဆိပ်ကမ်းမြို့ ကရာချိကို ဘတ်စ်ကားနဲ့ ခရီးသွားနေတာဖြစ်ကြောင်း ကယ်ဆယ်ရေးသမားတွေက မီဒီယာတွေကို ပြောပါတယ်။
ပါကစ္စတန်မှာ ယာဉ်မတော်တဆမှုတွေ မကြာခဏ ဖြစ်ပွားလေ့ရှိပြီး အဓိကအားဖြင့် ထိန်းသိမ်းမှုညံ့ဖျင်းတဲ့ မော်တော်ယာဉ်တွေ၊ ပျက်စီးနေတဲ့ လမ်းတွေနဲ့ လမ်းဘေးကင်းရေး အစီအမံတွေ ပေါ့ဆမှုကြောင့် ဖြစ်ပွားလေ့ရှိပါတယ်။
မကွေးတိုင်း၊ ပခုက္ကူ-ကျောက်ထုလမ်းမှာ အကြမ်းဖက်စစ်ကောင်စီရဲ့ ကျောက်ထု အမြောက်တပ်ကို လောင်စာဆီပို့ဆောင်နေတဲ့ ဆီသယ်ယာဉ် ၁ စီးကို နိုဝင်ဘာ ၂၁ ရက်နေ့၊ နေ့လယ် ၂ နာရီဝန်းကျင်မှာ ကျောက်ထုပြည်သူ့ကာကွယ်ရေးတပ်ဖွဲ့ (Kyaukhtu PDF) က မီးရှို့ဖျက်ဆီးလိုက်တယ်လို့ သိရပါတယ်။
“အဲဒီကားက ကျောက်ထုက လေတပ်နဲ့ အမြောက်တပ်ဆီ ပို့နေတဲ့ကား။ ဒီတခေါက်မှာ စစ်ဆေးကြည့်တော့ အမြောက်တပ်ကိုဆီ ပို့သွားမှာဆိုလို့ မီးရှို့ဖျက်ဆီးလိုက်တာပါ။ ကားမောင်းသမားကလည်း စစ်ကောင်စီတပ်ဖွဲ့ထဲက မိသားစုဝင်ပဲ။ ဒါပေမဲ့ သတိပေးစကားပြောပြီး ပြန်လွှတ်ပေးလိုက်ပါတယ်” ကျောက်ထူး PDF သတင်းပြန်ကြားရေးတာဝန်ခံက အတည်ပြုပြောပါတယ်။
မကွေးတိုင်းအတွင်းက ထီးလင်း-ကျောက်ထု နယ်စပ်လမ်းပိုင်း၊ ကျောက်ထု-ဆာကြားလမ်းပိုင်းရဲ့ နေရာတချို့မှာ တိုက်ပွဲတွေ ဆက်လက်ဖြစ်ပေါ်နိုင်လို့ ပြည်သူတွေအနေနဲ့ သေရေးရှင်ရေးကိစ္စကလွဲပြီး လမ်းပေါ်မထွက်ကြဖို့ ကျောက်ထု PDF က အသိပေးထုတ်ပြန်ထားပါတယ်။
ကျောက်ထု၊ ထီးလင်း၊ ဂန့်ဂေါ၊ ကလေး၊ ပေါက်၊ ယောနဲ့ ဆောမြို့နယ်တွေမှာ ဒေသခံ ပြည်သူ့ကာကွယ်ရေးတပ်ဖွဲ့တွေရဲ့ တိုက်ခိုက်မှုကြောင့် အကြမ်းဖက်စစ်ကောင်စီတပ်တွေ အထိနာပြီး သေဆုံးထိခိုက်ပျက်စီးမှုတွေ များပြားနေသလို အကြမ်းဖက်စစ်ကောင်စီဘက်ကလည်း စစ်ကောင်စီတပ်သားအင်အားတွေ တိုးမြှင့်ချထားနေတာတွေရှိနေတယ်လို့ ဒေသခံတွေဆီကသိရပါတယ်။
တောင်ပေါ်ဒေသယောနယ်က ပြည်သူလူထုတွေ စားနပ်ရိက္ခာရှားပါးမှုကို အခွင့်ကောင်းယူပြီး အကြမ်းဖက်စစ်ကောင်စီနဲ့ပူးပေါင်းကာ ကုန်ပစ္စည်းတွေကို ဈေးတင်ရောင်းချနေတဲ့ စီးပွားရေးလုပ်ငန်းရှင်တွေကိုလည်း ထိရောက်စွာအရေးယူသွားမှာဖြစ်ကြောင်း ယော-ကျောက်ထု ပြည်သူ့ကာကွယ်ရေးတပ်ဖွဲ့က သတိပေးချက်ထုတ်ပြန်ထားတယ်လို့ သိရပါတယ်။
