မေ ၁၁ ရက်ညက ယှဉ်ပြိုင်ခဲ့တဲ့ ကမ္ဘောဒီးယားဆီးဂိမ်း ခမာဖိုက်(Kun Khmer) လက်ဝှေ့ပြိုင်ပွဲ ၈၁ ကီလိုတန်း ဗိုလ်လုပွဲမှာ မြန်မာကိုယ်စားပြု လက်ဝှေ့သမား ထွန်းထွန်းမင်းက အိမ်ရှင်ကမ္ဘောဒီးယား လက်ဝှေ့သမား ပရွမ်ဆမ်နန်းကို အမှတ်နဲ့ရှုံးနိမ့်သွားပြီး ဒုတိယ ငွေတံဆိပ်ဆုသာရရှိခဲ့ပါတယ်။

ဆီးမီးဖိုင်နယ်ပွဲတုန်းက ဗီယက်နမ် လက်ဝှေ့သမား ငုယင်ဗန်ချိန်းကို အနိုင်ယူခဲ့တဲ့ ထွန်းထွန်းမင်းနဲ့ ပွဲထိုးသတ်ခြင်းမရှိဘဲ ဗိုလ်လုပွဲမှာ စောင့်ဆိုင်းနေတဲ့ ပရွမ်ဆမ်နန်းတို့ ပထမ ရွေတံဆိပ်ဆုအတွက်အကြိတ်အနယ် ယှဉ်ပြိုင်ခဲ့ကြတာဖြစ်ပါတယ်။

၃ ချီထိုးသတ်ခဲ့ရာတွင် အရှုံးအနိုင်မပေါ်လို့ ဒိုင်တွေရဲ့အမှတ်အရ ပရွမ်ဆမ်နန်းက ၃ ချီမှာ ၁၀ မှတ် စီ အမှတ်ပြည့်ရရှိခဲ့ပေမဲ့ ထွန်းထွန်းမင်းက ၉ မှတ်စီသာရရှိခဲ့လို့  ၃၀-၂၇မှတ်နဲ့ ကမ္ဘောဒီးယား လက်ဝှေ့သမားက ရွှေတံဆိပ်ဆုရရှိသွားတာပါ။  

ပရွမ်ဆမ်နန်းဟာ ၂၀၂၃ခုနှစ်အတွင်း မြန်မာရိုးရာလက်ဝှေ့ချန်ပီယံဟောင်း ဒေးဗစ်လူဒပ်စ်(ခ) ဒေဝ နဲ့ ဆလိုဗက်ကီးယားနိုင်ငံမှာ  ယှဉ်ပြိုင်ထိုးသတ်သွားဖို့ အစီအစဉ် ရှိပါတယ်။

ကမ္ဘောဒီးယား ဆီးဂိမ်းဘောလုံးပြိုင်ပွဲမှာ ဆီမီးဖိုင်နယ်အဆင့်ကို တက်လှမ်းနိုင်ခဲ့တဲ့ မြန်မာအမျိုးသား ယူ-၂၂ ဘောလုံးအသင်းနဲ့ အမျိုးသမီးအသင်းတွေကို ကျပ်သိန်း ၁၅၀၀ စီ ဆုချီးမြှင့်လိုက်ပါတယ်။

ဆုကြေးတွေကို မြန်မာနိုင်ငံဘောလုံးအဖွဲ့ချုပ် နာယက ဦးတေဇနဲ့ ဥက္ကဋ္ဌ ဦးဇော်ဇော်တို့က စုပေါင်း ချီးမြင့်ခဲ့တာလို့သိရပြီး ပြိုင်ပွဲမစတင်ခင်ကတည်းက တစ်ပွဲအနိုင်ရရှိမယ်ဆိုရင် ဆုကြေး ကျပ်သိန်း၃၀၀ ချီးမြှင့်မယ်လို့ ကတိပေးခဲ့တာ ဖြစ်ပါတယ်။

မြန်မာအမျိုးသားအသင်းက အုပ်စုပွဲစဉ်လေးပွဲကစားခဲ့ရမှာ သုံးပွဲအနိုင်ရခဲ့လို့ ကျပ်သိန်း ၉၀၀ ရရှိခဲ့ပြီး ဆီမီးဖိုင်နယ်တက်ခဲ့တဲ့အတွက် ထပ်ဆောင်း ဂုဏ်ပြုငွေ ကျပ်သိန်း ၆၀၀ လည်းရရှိမှာဖြစ်လို့ စုစုပေါင်း ကျပ်သိန်း ၁၅၀၀ ဆုကြေးရရှိခဲ့တာပါ။

အလားတူ အမျိုးသမီးအသင်းဟာလည်း အုပ်စုပွဲစဉ် ၃ ပွဲမှာ ၂ ပွဲအနိုင်ရခဲ့လို့ ကျပ်သိန်း၆၀၀ ဆုကြေးရခဲ့သလို ဆီမီးဖိုင်နယ်တက်ခဲ့တဲ့အတွက် ဂုဏ်ပြုငွေ ကျပ်သိန်း ၉၀၀ လည်းရရှိခဲ့ပြီး စုစုပေါင်းကျပ်သိန်း ၁၅၀၀ ဆုကြေးရရှိ ခဲ့တာပါ။

အဲဒီလို ဆုကြေးတွေချီးမြှင့်ခဲ့တာက ကစားသမားတွေရဲ့စိတ်ပိုင်းဆိုင်ရာကို မြှင့်တင်ပေးနိုင်ပြီး ချီးမြှင့်ခဲ့တဲ့ ဘောလုံးအဖွဲ့ချုပ်နာယကနဲ့ ဥက္ကဋ္ဌတို့ကို ကျေးဇူးတင်ရှိကြောင်း ဘောလုံးအဖွဲ့ချုပ်ရဲ့ အင်တာဗျူးအစီအစဉ်မှာ ကစားသမားတွေဖြစ်ကြတဲ့ ဟိန်းထက်အောင်နဲ့ ခင်မာလာထွန်းတို့က ကျေးဇူးတင်စကားဆိုခဲ့ပါတယ်။

မြန်မာအမျိုးသားအသင်းနဲ့ အမျိုးသမီးအသင်းတွေဟာ ဆီးဂိမ်းဘောလုံးပြိုင်ပွဲ ဆီမီးဖိုင်နယ်မှာ ထိုင်းအသင်းတွေနဲ့ ထိပ်တိုက်တွေ့ဆုံနေတာဖြစ်ပါတယ်။ 

Photo -MFF

၃၂ ကြိမ်မြောက် ဆီးဂိမ်းပြိုင်ပွဲကို ကမ္ဘောဒီးယားနိုင်ငံမှာ  မေလ ၈ ရက်က ဆက်လက်ကျင်းပရာ အမျိုးသမီး မီတာ ၂၀၀ အပြေးပြိုင်ပွဲမှာ စင်ကာပူလက်ရွေးစင် ရှန်တီ ပါရီရာက အနိုင်ရပြီး ရွှေတံဆိပ် ဆွတ်ခူးခဲ့ပါတယ်။

သူဟာ မိုရိုဒေ့ါခ်တီကို အမျိုးသားအားကစားရုံမှာ ၂၂ ဒသမ ၆၉ စက္ကန့် စံချိန်ရရှိခဲ့ပြီး ဒီစံချိန်ဟာ သူ့ရဲ့ အရင်စံချိန်ဖြစ်တဲ့ ၂၂ ဒသမ ၈၉ စံချိန်ကို ချိုးဖျက်နိုင်ခဲ့သလို ၂၀၁၉ ခုက ဖိလစ်ပိုင်ဆီးဂိမ်းမှာ ခရစ်စတီးနား နော့တ်ရဲ့ ၂၃ ဒသမ ၀၁ စက္ကန့် စံချိန်ကိုလည်း ချိုးဖျက်နိုင်ခဲ့ပါတယ်။

၂၀၂၁ ခုနှစ်က ကစားပွဲတွေမှာတော့ ပါရီရာဟာ ၂၃ ဒသမ ၅၂ စက္ကန့်နဲ့ မီတာ ၂၀၀ အပြေးပြိုင်ပွဲမှာ ရွှေတံဆိပ်ဆုရရှိခဲ့ပြီး စင်ကာပူရဲ့ အပြေးဘုရင်မလို့ တင်စားခံရတဲ့ သူဟာ မတ်လနဲ့ ဧပြီလတွေမှာလည်း စံချိန်များစွာကို ချိုးခဲ့ပါတယ်။

ပြီးခဲ့တဲ့လက ဘရစ်စ်ဘိန်းမှာ ကျင်းပခဲ့တဲ့ ဩစတြေးလျ ပြေးခုန်ပစ်ဖွင့်ပွဲမှာ ပါရီရာက မီတာ ၂၀၀ အ‌မျိုးသမီး အပြေးပြိုင်ပွဲမှာ ၂၂ ဒသမ ၈၉ စက္ကန့်နဲ့ စံချိန်တင်ခဲ့ပြီး ဒီစံချိန်ဟာ ၂၀၂၃ ခုနှစ်မှာ အာရှအမျိုးသမီးတယောက်က သတ်မှတ်ထားနိုင်တဲ့ အမြင့်ဆုံးစံချိန် ဖြစ်ပါတယ်။

၃၂ ကြိမ်မြောက် အရှေ့တောင်အာရှ ဆီးဂိမ်း‌ပြိုင်ပွဲကို မေ ၅ ရက်ကနေ ၁၇ ရက်အထိ ကမ္ဘောဒီးယားနိုင်ငံမှာ ကျင်းပနေတာ ဖြစ်ပါတယ်။