အင်ဒိုနီးရှားနိုင်ငံ၊ ဆူမာတြားကျွန်းမှာ ဧပြီ ၂၅ ရက်က ပြင်းအား ရစ်ချ်တာစကေး ၇ ဒသမ ၃ ရှိ အင်အားပြင်းငလျင်တခု လှုပ်ခတ်ခဲ့အပြီး ဆူနာမီသတိပေးချက် ၂ နာရီကြာ ထွက်ပေါ်လာခဲ့ပြီးနောက်မှာ ကျွန်းအနောက်ဘက်ရှိ ဒေသခံတွေကို ဘေးလွတ်ရာ ရွှေ့ပြောင်းခဲ့ရပါတယ်။
အဲဒီငလျင်ဟာ ဒေသစံတော်ချိန် မနက် ၃ နာရီလောက်က အနက် ၈၄ ကီလိုမီတာလောက်မှာ လှုပ်ခတ်ခဲ့တာဖြစ်ပြီး နောက်ဆက်တွဲငလျင် အများအပြားလည်း လှုပ်ခဲ့ကာ အဲဒီထဲက တခုဟာ ပြင်းအား ၅ အဆင့်ရှိကြောင်း အင်ဒိုနီးရှား ဘူမိရူပဗေဒ အေဂျင်စီ BMKG ရဲ့ အချက်အလက်တွေအရ သိရပါတယ်။
အနောက်ဆူမားတြားရဲ့ မြို့တော် ပါဒန်င်မှာ လူတွေဟာ မနက်စောစောမှာ ပစ္စည်းတွေ အနည်းအကျဉ်းလောက်နဲ့ ဆိုင်ကယ်စီးပြီး ဘေးကင်းဇုန်တွေဆီ ဦးတည်သွားကြပါတယ်။
နောက်တော့ ဆူနာမီသတိပေးချက်ကို ရုပ်သိမ်းလိုက်ပြီး ဒေသဆိုင်ရာ အာဏာပိုင်တွေအနေနဲ့ ရေဘေးသင့်ဒေသရှိ ဒေသခံတွေကို ကမ်းနဲ့ဝေးရာဆီ ပြောင်းရွှေ့နေထိုင်ကြဖို့ ချက်ချင်း ညွှန်ကြားပေးဖို့ တောင်းဆိုခဲ့ပါတယ်။
ဂျပန်နိုင်ငံ အရှေ့မြောက်ဘက်မှာ မတ် ၁၆ ရက် ညသန်းခေါင်က ပြင်းအားပမာဏ ၇ ဒသမ ၃ ရှိ အင်အားကြီးငလျင် လှုပ်ခတ်ခဲ့တာကြောင့် လူ ၁ ဦး သေဆုံးပြီး ၈၈ ဦး ဒဏ်ရာရခဲ့ပါတယ်။
ငလျင်ဗဟိုချက်ကနေ တိုကျို အရှေ့မြောက်ဘက် ကမ်းရိုးတမ်း မိုင် ၁၇၀ အထိ လှုပ်ခတ်ခဲ့ပြီး လူနေအိမ် ၂ သန်းကျော် မီးပြတ်တောက်သွားပါတယ်။
ဂျပန်ငလျင်စောင့်ကြည့်ရေးဌာနက ဖူကူရှီးမား ဒိုင်ချီ နျူကလီးယား လျှပ်စစ်ဓာတ်ပေါင်းဖိုနဲ့ တခြားဓာတ်ပေါင်းဖိုတွေ ပုံမှန်ရှိမရှိ အရေးပေါ်စောင့်ကြည့်ဖို့ သတိပေးထားပါတယ်။
အဆိုပါ ဓာတ်ပေါင်းဖိုတွေက ၂၀၁၁ ခုနှစ်မှာ ပြင်းအားပမာဏ ၉ ရှိတဲ့ ငလျင်ကြောင့် ဆူနာမီလှိုင်း ရိုက်ခတ်မှု ခံခဲ့ရတာပါ။
ဒီနေ့မှာ အစိုးရက ဆူနာမီလှိုင်း ၃ ပေကျော်ထိ မြင့်တက်မယ်လို့ သတိပေးချက် ထုတ်ပြန်ထားပြီး အချို့နေရာတွေမှာ ရေလှိုင်း ၈ လက်မလောက် မြင့်တက်လာနေပါတယ်။
