ဆော်ဒီကလပ် အယ်လ်နာဆာတိုက်စစ်မှူး စီရော်နယ်ဒိုဟာ ဖေဖော်ဝါရီလအတွက် အကောင်းဆုံးကစားသမားဆု ရရှိခဲ့ပါတယ်။
ပြီးခဲ့တဲ့ ဇန်နဝါရီအပြောင်းအရွှေ့မှာ မန်ယူအသင်းကနေ ပြောင်းရွှေ့လာတဲ့ ရော်နယ်ဒိုဟာ အယ်လ်နာဆာနဲ့ တလအတွင်းမှာ ၈ ဂိုးသွင်း ၂ ကြိမ် ဂိုးဖန်တီးနိုင်ခဲ့တာကြောင့် တလတာ အကောင်းဆုံး ရရှိခဲ့တာပါ။
ရော်နယ်ဒိုဟာ ဆော်ဒီကလပ်နဲ့ ၂ နှစ် စာချုပ်ချုပ်ဆိုထားပြီး တနှစ်လုပ်ခ ပေါင် ၁၇၃ သန်းအထိ ရရှိနေသူပါ။
သူဟာ ဆော်ဒီလိဂ်ပြိုင်ပွဲရဲ့ နာမည်အကြီးဆုံးကစားသမားဖြစ်သလို နိုင်ငံရဲ့ သံတမန်အဖြစ်နဲ့ပါ တာဝန်ယူ လုပ်ကိုင်နေတာပါ။
ရော်နယ်ဒိုဟာ ဆော်ဒီနိုင်ငံတည်ထောင်ခြင်း အထိမ်းအမှတ် အခမ်းအနားမှာ ဆော်ဒီရိုးရာဝတ်စုံ ဝတ်ဆင်ပြီး ကပြခဲ့ပါသေးတယ်။ ရော်နယ်ဒိုရဲ့ အယ်လ်နာဆာအသင်းဟာ ပွဲစဉ် ၁၈ အပြီးမှာ ဒုတိယနေရာက အသင်းကို ၂ မှတ်ဖြတ်ပြီး ဦးဆောင်နေပါတယ်။
အင်္ဂလန်မှာကစားတုန်းက ပွဲပယ်ပြစ်ဒဏ်တွေကြောင့် ရော်နယ်ဒိုဟာ ဆော်ဒီလိဂ်မှာ ၂ ပွဲဆက်တိုက် လွဲချော်တော့မှာ ဖြစ်ပါတယ်။
မန်ယူအသင်းက အဲဗာတန်ကို ရှုံးနိမ့်ခဲ့အပြီးမှာ အဲဗာတန်အသင်းပရိသတ် ကလေးငယ်တဦးဆီက ဖုန်းကို ရော်နယ်ဒိုက ရိုက်ချခဲ့တာပါ။
အဲဒီလိုလုပ်ဆောင်ခဲ့မှုကြောင့် အင်္ဂလန်အက်ဖ်အေက နိုဝင်ဘာ ၁၇ ရက်နေ့မှာ ၂ ပွဲပယ် ပြစ်ဒဏ်နဲ့ ဒဏ်ကြေးငွေ ၅၀,၀၀၀ ချမှတ်ခဲ့တာပါ။
ကမ္ဘာ့ဘောလုံးအဖွဲ့ချုပ်ရဲ့ စည်းမျဉ်းအရ အက်ဖ်အေတခုခုရဲ့ ပွဲပယ်ပြစ်ဒဏ်တွေဟာ မတူညီတဲ့ တခြားလိဂ်ပြိုင်ပွဲတွေမှာလည်း ဆက်လက်ကျခံရမယ်လို့ ပါရှိတာပါ။
ဒါကြောင့် ရော်နယ်ဒိုဟာ ဆော်ဒီကလပ် အယ်လ်နာဆာရဲ့ ပွဲစဉ် ၂ ပွဲဆက်တိုက် လွဲချော်မှာပါ။ အယ်လ်နာဆာအသင်း ပရိသတ်တွေဟာ ရော်နယ်ဒို ပွဲထွက်ကစားမယ်အထင်နဲ့ အိမ်ကွင်းလက်မှတ် ၂၈,၀၀၀ စလုံးကို ကြိုတင်ဝယ်ယူထားကြတယ်လို့ သိရပါတယ်။
