ဆော်ဒီအာရေဗျနဲ့ ရေနံရောင်းချသူနိုင်ငံများအသင်း (အိုပက်) အဖွဲ့ဝင် တခြားနိုင်ငံတွေဟာ သူတို့ရဲ့ ရေနံထုတ်လုပ်မှုကို ကိုယ်တိုင်ရဲ့ သဘောဆန္ဒအရ လျှော့ချမယ်လို့ ကြေညာလိုက်ကြပါတယ်။

ဆော်ဒီအစိုးရကတော့ မေလကနေ ၂၀၂၃ နှစ်ကုန်ပိုင်းထိ နေ့စဉ် ရေနံစိမ်းစည် ငါးသိန်း ထုတ်လုပ်မှု လျှော့ချမယ်လို့ အစိုးရမီဒီယာက ထုတ်ပြန်ပါတယ်။

ရုရှားဒုဝန်ကြီးချုပ်ကလည်း ရုရှားအစိုးရဟာ ၂၀၂၃ နှစ်ကုန်ပိုင်းအထိ ရေနံစိမ်းစည် တရက် ငါးသိန်း ဆက်လက်လျှော့ချပြီး ထုတ်လုပ်သွားမယ်လို့ ပြောပါတယ်။

အာရပ်စော်ဘွားများပြည်ထောင်စု၊ ကူဝိတ်၊ အီရတ်၊ အိုမန်နဲ့ အယ်လ်ဂျီးရီးယားနိုင်ငံတွေကလည်း အလားတူ အချိန်အတွင်း ရေနံစိမ်းထုတ်လုပ်မှု လျှော့ချသွားမယ်လို့ ပြောပါတယ်။

အာရပ်စော်ဘွားများပြည်ထောင်စု (ယူအေအီး) က ရေနံစိမ်းစည် တရက်ကို ၁၄၄,၀၀၀၊ ကူဝိတ်က ၁၂၈,၀၀၀၊ အီရတ်က ၂၁၁,၀၀၀ ၊ အိုမန်က ၄၀,၀၀၀ နဲ့ အယ်လ်ဂျီးရီးယားက ၄၈,၀၀၀ စီ လျှော့ချထုတ်လုပ်မယ်လို့ အသီးသီး ကြေညာခဲ့ပါတယ်။

ဆော်ဒီ စွမ်းအင်ဝန်ကြီးဌာနကတော့ သူ့နိုင်ငံဟာ ရေနံစျေးကွက်တည်ငြိမ်ရေး ပံ့ပိုးဖို့ ရည်ရွယ်ချက်နဲ့ ကြိုတင်ကာကွယ်တဲ့အနေနဲ့ ကိုယ့်သဘောဆန္ဒနဲ့ကိုယ် လျှော့ချ ဖြတ်တောက်တာလို့ ကြေညာချက်ထုတ်ပြန် ပြောပါတယ်။

ကမ္ဘာ့ဖလား အုပ်စု စီ အဖွင့်ပွဲစဉ်အဖြစ် နာမည်ကြီး အာဂျင်တီးနားနဲ့ ဆော်ဒီအာရေဗျတို့ ဒီနေ့ညနေက ယှဉ်ပြိုင်ရာ ဆော်ဒီအာရေဗျက ၂ ဂိုး ၁ ဂိုးနဲ့ အနိုင်ရသွားပါတယ်။

အာဂျင်တီးနားအသင်းဟာ တိုက်စစ်မှူး မက်ဆီ ဦးဆောင်ပြီး ဒီမာရီယာ၊ လော်တာရိုမာတီနက်ဇ်၊ ဂိုမက်ဇ်၊ ဒီပေါလ်၊ အော်တာမန်ဒီ၊ ရိုမဲရိုး စတဲ့ အဓိက ကစားသမားတွေနဲ့ ပွဲထွက်ခဲ့ပေမဲ့လည်း ဆော်ဒီအာရေဗျအသင်းရဲ့ မာမာထန်ထန် တုံ့ပြန်ကစားပုံကြောင့် အခက်တွေ့ခဲ့ရတာပါ။

အဖွင့်ဂိုးကိုတော့ အာဂျင်တီးနားရခဲ့တာဖြစ်ပြီး ပွဲချိန် ၁၀ မိနစ်မှာပဲ မက်ဆီက ပယ်နယ်တီကတဆင့် သွင်းယူပေးခဲ့ပါတယ်။ အဲ့ဒီနောက်ပိုင်း အာဂျင်တီးနားတို့ ဂိုးတွေထပ်ရခဲ့ပေမဲ့ လူကျွံဘောအဖြစ် သတ်မှတ်ခဲ့တာကြောင့် ဂိုးအဖြစ်ကနေ ပယ်ဖျက်ခံခဲ့ရတာပါ။

ဆော်ဒီအာရေဗျအတွက် ချေပဂိုးနဲ့ အနိုင်ဂိုးကိုတော့ ပွဲချိန် ၄၉ မိနစ်နဲ့ ၅၃ မိနစ်တွေမှာ သွင်းယူခဲ့ပါတယ်။

ဒီ့နောက် အာဂျင်တီးနားတို့ ချေပဂိုးရဖို့ မာတီနက်ဇ်၊ ဖာနန်ဒက်ဇ်၊ အယ်ဗာရက်ဇ်၊ အကူညာတို့ကို လူစားထည့်သွင်းခဲ့ပေမဲ့ ဆော်ဒီဂိုးသမား လက်စွမ်းပြ ကာကွယ်နိုင်ခဲ့တာကြောင့် ပွဲအဖြေကို မပြောင်းလဲနိုင်ဘဲ ရှုံးနိမ့်ခဲ့တာ ဖြစ်ပါတယ်။

အဖွင့်ပွဲမှာ ရှုံးနိမ့်ခဲ့တဲ့အတွက် အာဂျင်တီးနားတို့ နောက်တဆင့်တက်ဖို့ ရုန်းကန်ရဖွယ်ရှိပြီး ပိုလန်၊ မက္ကဆီကိုတို့နဲ့ပွဲတွေမှာ မဖြစ်မနေ အနိုင်ကစားဖို့ လိုအပ်နေပါတယ်။

အုပ်စု စီ ဒုတိယပွဲစဉ်အဖြစ် ပိုလန်နဲ့ မက္ကဆီကိုတို့ မြန်မာစံတော်ချိန် ည ၁၀ နာရီခွဲမှာ ယှဉ်ပြိုင်ရမှာ ဖြစ်ပါတယ်။