ဖေဖော်ဝါရီ ၁ ရက်ကစပြီး တိုက်ပွဲတွေကြောင့် ဘေးလွတ်ရာ တောတွင်းထွက်ပြေးနေရတဲ့ ကချင်ပြည်နယ် ဆွမ်ပီယန်ရွာက စစ်ဘေးရှောင်ပြည်သူ အယောက် ၅၀၀ ကျော် စားရေးသောက်ရေး အခက်အခဲနဲ့ရင်ဆိုင်နေရတယ်လို့ ဆွမ်ပီယန်ရွာခံတဦးက ပြောပါတယ်။
"တချို့က မြစ်ကြီးနားဘက်ကို ထွက်ပြေးသွားတယ်။ ကျန်တဲ့ ရွာခံ ၅၀၀ ကျော်တယ်။ အိမ်ခြေက ၁၆၀ ကျော်ခန့်နေမယ်။ တိုက်ပွဲဖြစ်တဲ့ တပတ်လောက်မှာတော့ အကူညီတွေရပါတယ်။ အကူညီရတဲ့ ပစ္စည်းတွေနဲ့ မိုးကာတဲလေးဆောက်ပြီးနေကြတာ ခုတော့ ဘာအကူညီမရတော့ စားရေးသောက်ရေး အခက်ခဲဖြစ်လာတယ်” လို့ ပြောပါတယ်။
ရိက္ခာပြတ်လို့ ရွာမှာရိက္ခာလာယူတဲ့ ဆွမ်ပီယန်ရွာခံ လူငယ်နှစ်ဦးကိုလည်း စစ်ကောင်စီက ဖမ်းဆီးခြိမ်းခြောက်တာတွေလုပ်ခဲ့သလို ရွာခံတွေရဲ့ နေအိမ်ဖောက်ထွင်းခံရတာတွေလည်း ရှိနေတယ်လို့ ရွာခံတဦးက ပြောပါတယ်။
"လူငယ်နှစ်ဦးက မတ် ၇ ရက်မှာ အကူညီလည်း မလာတော့ စားသောက်ရေးအခက်ခဲဖြစ်လာလို့ ရိက္ခာသွားယူတာပါ။ စစ်ကောင်စီဘက်က ရွာကိုမ၀င်ဖို့ တားမြစ်တယ်လို့ ပြောတယ်။ ဒါပေမဲ့ စားစရာမရှိလို့ စားစရာလာယူတာပါ လို့ပြောပေမဲ့ မရဘူး၊ ဖမ်းဆီးပြီး နောက်တခါရွာကို မပြန်လာဖို့၊ ပြန်လာမယ်ဆိုရင် အကြောင်းကြားရမယ်ဆိုပြီး ခြိမ်းခြောက်မှုတွေ လုပ်နေတယ်။ ပြီးတော့ အိမ်တိုင်းလိုလို ဖောက်ထွင်းခံရတယ်။ တံခါးတွေအကုန်ပွင့်နေတယ်” လို့ ပြောပါတယ်။
ပူတာအိုမြို့နယ် ဆွမ်ပီယန်အုပ်စုက ဒေသခံပြည်သူတွေဟာ ဖေဖော်ဝါရီလကစတဲ့ စခန်းသိမ်းတိုက်ပွဲတွေကြောင့် ဘေးလွတ်ရာကို တိမ်းရှောင်နေရပြီး အရဲစွန့်ပြီး အိမ်ကိုပြန်နေတဲ့ ရွာခံတွေလည်း ရှိနေပါတယ်။
ပူတာအိုမှာ ကချင်လွတ်မြောက်ရေးတပ်မတော် (KIA)၊ ပြည်သူ့ကာကွယ်ရေးတပ် (PDF) ပူးပေါင်းတပ်ဖွဲ့နဲ့ စစ်ကောင်စီတို့အကြား ၂၀၂၂ ခုနှစ် ဖေဖော်ဝါရီလကစတင်ပြီး တိုက်ပွဲပြင်းထန်လာကာ စစ်ကောင်စီဘက်က လက်နက်ကြီး၊ လက်နက်ငယ် ပပစ်ခတ်မှုကြောင့် ဒေသခံပြည်သူ ၅ ဦး ဒဏ်ရာပြင်းထန်စွာရရှိခဲ့ပြီး သေဆုံးသူနှစ်ဦးထိ ရှိလာပြီဖြစ်ပါတယ်။
ကချင်ပြည်နယ်၊ ပူတာအိုမြို့နယ်၊ ဆွမ်ပီယန်ကျေးရွာမှာ မတ် ၄ ရက် မနက်ပိုင်းက စစ်ကောင်စီတပ်နဲ့ ကေအိုင်အေ၊ PDF ပူးပေါင်းတပ်ဖွဲ့တို့ တိုက်ပွဲ အပြင်းအထန် ဖြစ်ပွားနေပါတယ်။
စစ်ကောင်စီတပ်နဲ့ ကေအိုင်အေ၊ PDF ပူးပေါင်းတပ်ဖွဲ့တို့အကြား မနက် ၆ နာရီခန့်က နှစ်ဖက် လက်နက်ကြီး လက်နက်ငယ်တွေနဲ့ ပစ်ခတ်မှုဖြစ်ပွားပြီး နေအိမ် ၄ လုံး မီးလောင်ခဲ့တယ်လို့ ဒေသခံတွေက ပြောပါတယ်။
ဆွမ်ပီယန် ဒေသခံတဦးက “မနေ့ ညပိုင်းကတည်းက ဖြစ်နေတာ၊ နားပြီး ဒီမနက် ၆ နာရီလောက်မှာ လက်နက်ကြီး လက်နက်ငယ်တွေနဲ့ ပစ်နေတယ်၊ တိုက်ပွဲထပ်ဖြစ်ကြတယ်။ ခုချိန်ထိလည်း သေနတ်သံတွေ ကြားနေရတာပဲ။ ကျေးရွာထဲက နေအိမ် ၄ လုံးလည်း မီးလောင်သွားတယ်” လို့ ပြောပါတယ်။
ဖေဖော်ဝါရီလကစတင်ပြီး စစ်ရေးပြင်းထန်ခဲ့တဲ့ ဆွမ်ပီယန်ကျေးရွာကို စစ်ကောင်စီတပ်က မတ်လ ၁ ရက် ညနေပိုင်းက ဂျက်လေယာဉ်နဲ့ ဗုံးကြဲ တိုက်ခိုက်ခဲ့ပါသေးတယ်။
ဂျက်လေယာဉ်နဲ့ ဗုံးကြဲခဲ့တဲ့အတွက် ဆွမ်ပီယန်ကျေးရွာ၊ လုံရှာယန်ကျေးရွာနဲ့ အင်စီယန်ကျေးရွာတွေက ပြည်သူ ၆,၀၀၀ ကျော်ဟာ စစ်ဘေးလွတ်ရာ တောထဲနဲ့ တခြားဒေသတွေကို ထွက်ပြေး တိမ်းရှောင်နေကြရပါတယ်။
