ကချင်ပြည်နယ်၊ ပူတာအိုမြို့နယ် ဆွမ်ပီယန်ကျေးရွ ာပြည်သူတွေဟာ စစ်ကောင်စီတပ်က ရွာထိပ်မှာတပ်စွဲပြီး ရွာအလယ်မှာ စစ်ဆေးရေးဂိတ်ပြုလုပ်ကာ ရွာပတ်ဝန်းကျင် ၂ မိုင်ထက်ကျော်ပြီး သွားလာခွင့် ပိတ်ပင်တာတွေကြောင့် အခက်အခဲတွေနဲ့ ရင်ဆိုင်နေရပါတယ်။
ဆွမ်ပီယန်ကျေးရွာက ပြန်သူတွေဟာ တောင်ယာလုပ်ငန်းလုပ်ကိုင်သူတွေ ဖြစ်တာကြောင့် စစ်ကောင်စီတပ်သားတွေက စစ်ဆေးမေးမြန်းတာ၊ သွားလာခွင့်ပိတ်ပင်တာတွေကြောင့် ဝမ်းရေးအတွက် တောင်ယာလုပ်ငန်းတွေ လုပ်ကိုင်ဖို့ အခက်အခဲဖြစ်နေတယ်လို့ ရွာသားတဦးက ပြောပါတယ်။
“အခုက အရမ်းစစ်တယ်၊ တနေရာကို သွားမယ်ဆိုလည်း မေးတယ်၊ တောင်ယာ သွားမယ် ဆိုရင်လည်း ဘယ်နှယောက်သွားမှာလဲ၊ ဘယ်နှရက်ကြာမှာလဲ၊ ဘာသွားလုပ်မှာလဲနဲ့ စုံနေတာပဲ။ ပြီးတော့ ရွာပတ်လည် ၂ မိုင်ထက်ပိုပြီး သွားလို့မရဘူးတဲ့၊ တောင်ယာတွေက ရွာနဲ့ အဝေးကြီးမှာလေ၊ အဲဒီလိုဆိုတော့ သွားမလုပ်ရဘူး၊ ရွာနဲ့နီးတဲ့ တောင်ယာတွေပဲ လုပ်နေကြတာ၊ အခုက ထမင်းဟင်းချက်ဖို့ ထင်းမရှိရင်တောင် တောထဲသွားပြီ ထင်းခွေဖို့ ခက်နေတယ်။”
ဆွမ်ပီယန်ကျေးရွာက ပြည်သူတွေဟာ ဖေဖော်ဝါရီ ၁ ရက်နေ့က ရွာပတ်ဝန်းကျင်တွေမှာဖြစ်တဲ့ တိုက်ပွဲတွေကြောင့် တောတောင်တွေမှာ ၂ လကျော် တိမ်းရှောင်နေခဲ့ရပြီး မတ် ၂၁ မှာ ဘာသာရေးခေါင်းဆောင်တွေ၊ WMR နဲ့ PCG တွေရဲ့ အကူအညီနဲ့ နေရပ်ပြန်ပြီး နေထိုင်နေတာပါ။
နေရပ်ပြန်ပြီး နေထိုင်နေပေမဲ့ တောင်ယာစိုက်ပျိုးဖို့အတွက် ခုတ်ထွင်ရှင်းလင်းတဲ့အချိန်တွေမှာ တိမ်းရှောင်နေရတာကြောင့် လာမယ့်နှစ် စားဝတ်နေရေးအတွက် အခက်အခဲ ဖြစ်လာနိုင်တယ်လို့ ရွာခံတဦးက ပြောပါတယ်။
“အများစုက တောင်ယာလုပ်ကြတာ၊ တောင်ယာစိုက်ဖို့ ခုတ်ထွင်ရှင်းလင်းမယ့်အချိန်မှာ တိုက်ပွဲကြောင့် ပြေးနေရတယ်၊ တောင်ယာခုတ်တာ နောက်ကျပါတယ်ဆိုမှ မိုးရွာတာက ပြန်စောနေတော့ မီးရှို့ဖို့က အဆင်မပြေ၊ အဲဒီအထဲ တောင်ရွာကို ပြန်သွားလို့မရဆိုတော့ ဒီနှစ် တောင်ယာတောင် စိုက်နိုင်မလား မသိတော့ဘူး၊ မစိုက်နိုင်ရင်တော့ နောက်နှစ် စားဝတ်နေရေး အတွက် အခက်အခဲတွေ ဖြစ်တော့မှာ” လို့ ပြောပါတယ်။
လက်ရှိအချိန် စစ်ကောင်စီတပ်သားတွေက ရွာထိပ်နဲ့ ရွယ်အလယ်မှာ တပ်စွဲထားဆဲဖြစ်တယ်လို့ သိရပါတယ်။
အခုတလော ရွာပတ်ဝန်းကျင်တွေ ပူတာအိုကနေ ဆင်းလာတဲ့ စစ်ကောင်စီတပ် အင်အား ၅ဝ ဝန်းကျင်က ရွာပတ်ဝန်းကျင်တွေမှာ သွားလာလှုပ်ရှားနေပြီး တိုက်ပွဲတွေ ပြန်လည်ဖြစ်ပေါ်လာမှာကိုလည်း စိုးရိမ်နေကြပါတယ်။
မေ ၁၇ ရက်နေ့ နေ့လယ် ၁ နာရီဝန်းကျင်က ပူတာအို-ဆွမ်ပရာဘွမ်လမ်းမပေါ် မိုင်ကထောင် ကျေးရွာနားမှာ မြစ်ကြီးနားက တက်လာတဲ့ စစ်ကောင်စီတပ်ဖွဲ့တွေကို ကချင်လွတ်မြောက်ရေး တပ်မတော်သားတွေက စောင့်ကြိုတိုက်ခိုက်ခဲ့တယ်လို့ KIA နဲ့နီးစပ်တဲ့ သတင်းရင်းမြစ်တွေကနေ သိရပါတယ်။
ကချင်ပြည်နယ်၊ ပူတာအိုမြို့နယ်၊ ဆွမ်ပီယန်ကျေးရွာပတ်ဝန်းကျင်တွေမှာ ကချင်လွတ်မြောက်ရေးတပ်မတော် (KIA)၊ KPDF ပူးပေါင်းတပ်ဖွဲ့နဲ့ စစ်ကောင်စီတပ်တွေ မတ်လ ၄ ရက် ဒီကနေ့ တိုက်ပွဲဖြစ်ပွားတယ်လို့ ဒေသခံတွေကနေ သိရပါတယ်။
ဆွမ်ပီယန်ကျေးရွာထဲမှာ မနေ့ ညနေ ၄ နာရီက စတင်ပြီး တိုက်ပွဲဖြစ်ပွားခဲ့တာဖြစ်ပြီး ဒီနေ့မနက် မနက်အစောပိုင်း အချိန်ကလည်း တိုက်ပွဲဖြစ်ပွားခဲ့တယ်လို့ပြောပါတယ်။
ဆွမ်ပီယန်ကျေးရွာနားမှာ တိမ်းရှောင်နေတဲ့ပြည်သူတဦးက " ဒီမနက်အစာကြီး ၄ နာရီ၊ ၅ နာရီဝန်းကျင်ကနေ ချနေကြတာ ပစ်လိုက် နားလိုက်ပဲ၊ သုံးကြိမ်လောက်ရှိတယ်။ တော်တော်ပြင်းထန်တယ်။ အကြီးသံတွေကော အသေးသံတွေကော ပစ်သံတွေကြားရတယ်။ ရွာရဲ့အရှေ့အနောက်ဘယ်နေရာလို့တောင် ပြောလို့ မရဘူး၊ နေရာတိုင်းမှာပဲ"လို့ ပြောပါတယ်။
တိုက်ပွဲကြောင့် နှစ်ဖက်တပ်တွေ ထိခိုက်ဒဏ်ရာရတဲ့ အခြေအနေကိုတော့ မသိရသေးပါဘူး။ လက်ရှိအချိန်ထိ ဆွမ်ပီယန်ကျေးရွာမှာ စစ်ကောင်စီတပ်သားတွေက တပ်စွဲထားပြီး အချိန်မရွေးတိုက်ပွဲ ဖြစ်လာနိုင်တဲ့ အခြေအနေရှိတယ်လို့ ရွာခံတွေထံက သိရပါတယ်။
မတ်လ ၃ ရက် ညနေက စစ်ကောင်စီတပ်သားတွေ ရွာထဲဝင်ရောက် လာတဲ့ အချိန်ကစပြီးတိုက်ပွဲပြင်းထန်ခဲ့ပြီး အသက်၂၂နှစ်အတွက် လူငယ်တစ်ဦးကို စစ်ကောင်စီက တညလုံးဖမ်းဆီးထားပြီး မနက်ပိုင်းမှာ ပြန်လည်လွှတ်ပေးခဲ့ပါတယ်။
ဆွမ်ပီယန်ကျေးရွာက ပြည်သူတွေဟာ ဖေဖော်ဝါရီလဆန်းပိုင်းက ဖြစ်တဲ့ တိုက်ပွဲတွေကြောင့် စစ်ရှောင်စခန်းပုံစံ ရွက်ဖျင်တဲတွေနဲ့ ရွာအနီးက တောင်ယာတွေမှာ နေထိုင်နေပေမဲ့လက်နက်ကြီး ကျရောက်ပေါက်ကွဲတာကြောင့် ပိုမိုလုံခြုံတဲ့နေရာကို ထွက်ပြေးတိမ်းရှောင်ခဲ့ရလို့ လက်ရှိမှာ အမိုးအကာမရှိ တောတောင်ထဲမှာ အဆင်ပြေသလို နေထိုင်နေရတယ်လို့ သိရပါတယ်။
ဆွမ်ပီယန်ဒေသမှာ ဖေဖော်ဝါရီ ၁ ရက်နေ့က ဖြစ်ပွားခဲ့တဲ့ စစ်ကောင်စီ စခန်းသိမ်းတိုက်ပွဲကနေ ယနေ့ အချိန်ထိ တိုက်ပွဲတွေ ဖြစ်ပွားနေတာပါ။
ဆွမ်ပီယန် ကျေးရွာနားက ရှိတ်ကတ်တောင်ပတ်ဝန်းကျင်တွေမှာလည်း တိုက်ပွဲတွေ နေ့စဉ်နီးပါးဖြစ်ပွားနေပြီးတော့ KIA နဲ့ KPDFတွေ ပူးပေါင်းသိမ်းပိုက်ထားတဲ့ တပ်စခန်းကို စစ်ကောင်စီက ပြန်လည်ရယူဖို့ အပြင်းအထန် တိုက်ခိုက်နေတာဖြစ်ပါတယ်။
