သီတင်းကျွတ် လပြည့်ကျော် ၁ ရက်နေ့တိုင်း နှစ်စဥ် ကျင်းပပြုလုပ်မြဲဖြစ်တဲ့ ပေါက်ခေါင်း မြို့နယ်လုံးဆိုင်ရာ ဆွမ်းဆန်စိမ်းလောင်းလှူပွဲကို လုံခြုံရေး တင်းကျပ်ပြီး စစ်ကောင်စီက ဦးဆောင်ကျင်းပခဲ့တယ်လို့ ဒေသခံတယောက်က ပြောပါတယ်။

ဆွမ်းဆန်စိမ်းလောင်းလှူပွဲကို ရှေးယခင်နှစ်ပေါင်းများစွာကတည်းက ၁၂ ပွဲဈေးသည်များ၊ ဇာတ်သဘင်များနဲ့  နှစ်စဥ် စည်ကားသိုက်မြိုက်စွာ ကျင်းပခဲ့တာလို့ ပေါက်ခေါင်းမြို့ခံတယောက်က ပြောပါတယ်။ 

“အခုနှစ်ကတော့ စစ်ကောင်စီက ဦးစီးပြီးလုပ်တာဆိုတော့ ရဲတွေ၊ စစ်သားတွေ၊ သေနတ်တွေနဲ့ စောင့်နေတော့ ကျက်သရေမရှိဘူးပေါ့။ နောက် သူတို့လုံခြုံရေးချထားတဲ့ သတ်မှတ်ထားတဲ့ လမ်းကြောင်းအတိုင်းသာ ဆွမ်းခံရပြီး၊ ကုန်ဈေးနှုန်းကလည်း ကြီးတာကြောင့်  အရင်တုန်းက အမြဲလောင်းနေတဲ့ အိမ်တွေတောင် မလောင်းနိုင်ကြတော့၊ ဆွမ်းဆန်စိမ်း သိပ်မရကြပါဘူး။ အရင်နှစ်တွေတုန်းက ထော်လာဂျီတွေ၊ ကားတွေနဲ့သယ်ပြီး ပြန်ကြတာ၊ အခုနှစ်က ကျောင်းတိုင်းလည်း မကြွကြဘူး” လို့ ပြောပါတယ်။

ဆွမ်းဆန်ခံတဲ့ ဘုန်းကြီးကျောင်းသားကြီးတဦးက “လူတွေကလည်း အဆင်မပြေကြပါဘူး။ နောက် စစ်ကောင်စီက လုပ်တာဆိုတော့ တချို့ကျောင်းတွေ ကြွတောင်မကြွပါဘူး၊ တချို့ရပ်ဝေးကျေးရွာတွေက ကြွတဲ့ ဘုန်းတော်ကြီးတွေဆို  စရိတ်တောင်မကာမိဘဲ ပြန်ကြရတယ်။ အရင်ကဆိုရင် ကျနော်တို့ ဆန်အိတ်တွေ ထမ်းပြန်ရတာ။ ခုတော့ ဆွမ်းဆန်က ကြက်ကျွေးဖို့လောက်တောင် မရဘူး” လို့ ပြောပါတယ်။

နှစ်စဥ် ဆွမ်းလောင်းနေသူတယောက်က  “ဒီနှစ်က ကုန်စျေးနှုန်းကကြီး၊ အလုပ်အကိုင်က မကောင်း၊ အလုပ်တွေက မရှိကြနဲ့ ဒီကြားထဲ တတ်နိုင်သလောက်လေး လောင်းဖို့ကျ ခါတိုင်းလို ကိုယ့်အိမ်​​ရှေ့မှာတင် လောင်းလို့မရဘူးလေ။ သူတို့ သတ်မှတ်တဲ့နေရာ သွားရဦးမယ်။ အစစ်အဆေးခံရဦးမယ်ဆိုတော့ မလောင်းဖြစ်တော့ပါဘူး” လို့ ပြောပါတယ်။

ဆွမ်းဆန်စိမ်းလောင်းပွဲကို ပေါက်ခေါင်းမြို့ ဗိုလ်ချုပ်ကျောက်ရုပ်ကနေ ဆေးရုံထောင့်အထိ နေရာသတ်မှတ်ပေးထားပြီး အောက်တိုဘာ ၁၀ ရက် နေ့လယ် ၁ နာရီလောက်က စတင်လောင်းလှူခဲ့တာပါ။

ဆွမ်းဆန်စိမ်းလောင်းလှူပွဲကို ကိုဗစ်-၁၉ ရောဂါကြောင့် တနှစ်ပဲ ပျက်ကွက်ခဲ့ဖူးပြီး ပြီးခဲ့တဲ့နှစ်ကလည်း ဘုရားဂေါပကတွေက ကိုယ့်အစီအစဉ်နဲ့ကိုယ် လုပ်ခဲ့ပေမဲ့ အခုနှစ်ကတော့ စစ်ကောင်စီက ဦးဆောင်လုပ်ခဲ့ကြတာပါ။

အရင်နှစ်တွေကတော့ ပွဲစျေးတန်းတွေ၊ ဇာတ်ပွဲတွေနဲ့ ၃ ရက်ကနေ ၅ ရက် တပတ်လောက် လုပ်ပြီး လပြည့်ကျော် ၁ ရက်နေ့ တရက်တည်းပဲ ဆွမ်းလောင်းလှူကြပါတယ်။ 

ပေါက်ခေါင်းတမြို့နယ်လုံးမှာ ဘုန်းကြီးကျောင်းပေါင်း ၁၀၀ ကျော်ရှိပြီး ဒီကနေ့ပွဲကို ကျောင်းအားလုံးရဲ့ သုံးပုံ နှစ်ပုံလောက်ပဲ ကြွကြတယ်လို့ စစ်ကောင်စီ ထွေအုပ်အသိုင်းအ၀ိုင်းကနေ သိရပါတယ်။

မန္တလေးမြို့မှာ စစ်ကောင်စီက ပြုလုပ်မယ့် ဆွမ်းဆန်စိမ်းလောင်းလှူပွဲကို မကြွရောက်ဘဲ ပြည်သူ့မျက်နှာကို ငဲ့ကာ သပိတ်မှောက်ပေးကြဖို့ သံဃသမဂ္ဂ ရဟန်းတော်တွေက မေတ္တာရပ်ခံ တိုက်တွန်းထားပါတယ်။

စစ်ကောင်စီလက်အောက်ခံ တိုင်းဒေသကြီးအစိုးရအဖွဲ့က မေ ၁၄ ရက် ကဆုန်လပြည့်နေ့မှာ သံဃာအပါး ၁၀,၀၀၀ ကျော် ဆွမ်းဆန်စိမ်းလောင်းလှူပွဲ ပြုလုပ်မှာဖြစ်ပြီး သံဃထုအနေဖြင့် သပိတ်မှောက် ဆန့်ကျင်ကြဖို့ တိုက်တွန်းလျှောက်ထားတယ်လို့ သံဃသမဂ္ဂ ရဟန်းတော်တပါးက မိန့်ပါတယ်။

"အဓိကကတော့ စကစနဲ့ မပူးပေါင်းဖို့ဘဲ။ ဘာလို့ဆို ဒီလိုလုပ်လို့ ရဟန်းသံဃာတွေက ကြွသွားမယ်၊ အလှူခံမယ်ဆိုရင် ဒါ စကစနဲ့ ပူးပေါင်းသလို ဖြစ်သွားမယ်လေ။ ဦးဇင်းတို့ မပူးပေါင်းစေလိုတာကလည်း ရဟန်းသံဃာတွေကို အလှူခံမရစေချင်လို့လည်း မဟုတ်ဘူးပေါ့နော်။ လာဘ်လာဘကိုလည်း တားမြစ်နေတာ မဟုတ်ဘူးပေါ့။ အဓိကက နိုင်ငံရေးအကျပ်အတည်းပေါ့၊ အားလုံးတွေ့မြင်နေရတာပဲ၊ ရဟန်းသံဃာတွေလည်း တွေ့မြင်နေရတာပဲ၊ ပြည်သူတွေကို အကြမ်းဖက်နေတယ်၊ သတ်နေတယ်၊ ရွာတွေကို မီးရှို့နေတယ်၊ အိုးအိမ်တွေကို ဖျက်ဆီးတယ်၊ နောက် အဖိုးတန်တဲ့ ပစ္စည်းတွေကို လုယက်နေတယ်၊ ဘယ်သူက လုယက်တယ်ဆို စစ်အုပ်စုနဲ့ ရဲတွေက လုယက်ပြီးတော့ လုပ်နေတာလေ၊ အကြမ်းဖက်နေတာပဲလေ။ ဒါတွေကို အကုန်လုံးမြင်တဲ့အချိန်မှာ သူတို့ကိုယ်သူတို့ သူတော်ကောင်းယောင်ဆောင်ပြီးတော့ ဘာသာရေးပွဲတွေ ဘာတွေ ကျင်းပနေတာက ဒါ ဟန်ဆောင်ပန်ဆောင် အလုပ်တွေပဲ။ တကယ်တမ်းကျ သူတို့စိတ်ထဲမှာက ဒါက ဘာသာနဲ့ သံဃာကို အသုံးချချင်လို့ပဲ။"

အာဏာသိမ်းစစ်ကောင်စီက သာသနာကို ကြည်ညိုယောင် ဟန်ပြအသုံးချနေမှုကို ပူးပေါင်းဆောင်ရွက်ခြင်း မပြုကြဘဲ သပိတ်မှောက် ငြင်းပယ်ကြဖို့ သံဃသမဂ္ဂ ဆရာတော်တပါးက မိန့်ပါတယ်။

"ဦးဇင်းတို့ကတော့ ပြည်သူ့တော်လှန်ရေးဆိုတော့ ပြည်သူတွေက နဂိုတည်းက အဆုံးသတ်ကိုပဲ ခံယူချက်နဲ့ လုပ်လာခဲ့တဲ့ တော်လှန်ရေးပဲလေ။ ဒီတော်လှန်ရေး ပြီးဆုံးတဲ့ထိတော့ ဦးဇင်းတို့ သံဃသမဂ္ဂက ဆက်ပြီး ပါဝင်လို့ရတဲ့နေရာက ပါဝင်ဆောင်ရွက်နေမှာပဲ၊ လုပ်နေကြမှာပဲ။ စကစကိုတော့ ဘာလုပ်ပေးပါ၊ ဘာညာပေါ့၊ နိုင်ငံရေးအဆင်ပြေအောင် တွေ့ဆုံခွင့် ဒါတွေကို ဦးဇင်းတို့က ပြောနေမှာမဟုတ်ဘူး။ အဓိကကတော့ ပြည်သူလူထုရဲ့ တော်လှန်ရေးမှာ ဦးဇင်းတို့ သံဃသမဂ္ဂအနေနဲ့ လုပ်လို့ရတဲ့အပိုင်းက ပူးပေါင်းဆောင်ရွက်သွားမှာပဲ။"

ကဆုန်လပြည့် (ဗုဒ္ဓနေ့) မှာ စစ်ကောင်စီလက်အောက်ခံ တိုင်းအစိုးရအဖွဲ့က သံဃာ ၁၀,၂၆၄ ပါးကို ဖိတ်ပြီး ဆွမ်း၊ ဆွမ်းဟင်း၊ လှူဖွယ်ပစ္စည်းနဲ့ နဝကမ္မဝတ္ထုငွေ လောင်းလှူပွဲကို ကျုံးဘေးပတ်လည်က လမ်းမကြီးတွေမှာ ပြုလုပ်ဖို့ စီစဉ်နေပါတယ်။ ကျုံးတဖက်ဆီကို သံဃာ ၂,၅၆၆ ပါးစီ ထားရှိမယ်လို့ သိရပါတယ်။