ဧရာဝတီတိုင်း၊ ဇလွန်မြို့နယ်၊ တောင်ပိုတရာကျေးရွာအုပ်စုထဲက သရွတ်ဝကျေးရွာမှာ တက္ကသိုလ် ဒုတိယနှစ်ကျောင်းသူအား သတ်ဖြတ်ခဲ့သူကို ဖမ်းဆီးရမိပြီလို့ ဇလွန်မြို့မရဲစခန်းက သိရပါတယ်။
နိုဝင်ဘာ ၁ ရက် ညနေပိုင်းက အသက် ၁၉ နှစ်ရွယ် စာရင်းငှားလုပ်နေသူ အမျိုးသားက အသက် ၂၀ ရှိ အလုပ်ရှင်သမီးဖြစ်သူကို ရည်းစားစကားပြောရာမှ ငြင်းဆိုခံရတဲ့အပြင် အလုပ်ရှင် ဖခင်ဖြစ်သူနဲ့ တိုင်ပြောမယ်လို့ ပြောရာကနေ ကြောက်လန့်ပြီး လူသတ်မှု ကျူးလွန်ခဲ့တယ်လို့ ဇလွန်မြို့မရဲစခန်း တာဝန်ရှိသူက ပြောပါတယ်။
သေဆုံးသူ အမျိုးသမီးဟာ ဟင်္သာတတက္ကသိုလ်မှာ ဒုတိယနှစ်တက်နေသူဖြစ်ပြီး ပြစ်မှုကျူးလွန်သူက ကတ်ကြေးနဲ့ ၂၆ ချက်တိတိ ထိုးသွင်းသတ်ဖြတ်ခဲ့တဲ့အပြင် သေဆုံးသူအမျိုးသမီး ဝတ်ဆင်ထားတဲ့ နားကပ်၊ လက်စွပ်၊ ဖုန်း ၂ လုံးနဲ့ ငွေ ၅ သိန်းခွဲကိုလည်း ယူဆောင်သွားခဲ့တယ်လို့ သိရပါတယ်။
ပြစ်မှုကျူးလွန်သူဟာ အရင်တည်းက ခိုးမှုကျူးလွန်ခဲ့တဲ့ မှတ်တမ်းရှိခဲ့သူဖြစ်ပြီး ဖြစ်စဉ်ဖြစ်ပွားခဲ့တဲ့နောက် သံသယတရားခံအနေနဲ့ စောင့်ကြည့်ရာကနေ သူနေထိုင်ခဲ့တဲ့ အိမ်မှာ သွေးစွန်းအဝတ်အစားတွေ တွေ့ခဲ့ရပြီး ယူဆောင်သွားတဲ့ ရွှေထည်ပစ္စည်းနဲ့ ဖုန်းတွေကိုလည်း သိမ်းဆည်းရမိခဲ့တယ်လို့ သရွတ်ဝကျေးရွာ အုပ်ချုပ်ရေးမှူးက ပြောပါတယ်။
ဖြစ်စဉ်နဲ့ပတ်သက်လို့ ပြစ်မှုကျူးလွန်သူကို ရာဇသတ်ကြီး ဥပဒေပုဒ်မ ၃၀၂၊ ၃၉၂ တို့နဲ့ အမှုဖွင့် အရေးယူထားတယ်လို့ သိရပါတယ်။
တနင်္သာရီတိုင်း လောင်းလုံးမြို့နယ်၊ ညောပြင်ကျေးရွာက အသက် ၂၁ နှစ်ရှိ တက္ကသိုလ်ကျောင်း သူ မနွယ်သရဖီစိုးကို အောက်တိုဘာ ၇ ရက်မနက်ပိုင်းမှာ ပျူစောထီးအဖွဲ့က ဖမ်းဆီး လိုက်တယ်လို့ နီးစပ်သူတွေက ပြောပါတယ်။
ထားဝယ်တက္ကသိုလ် သမိုင်းမေဂျာအထူးပြု ဒုတိယနှစ်ကျောင်းသူ မနွယ်သရဖီစိုးဟာ ရွာကနေ ထားဝယ်ကို ဆိုင်ကယ်နဲ့အသွား ကျောက်နီမော်ကျေးရွာမှာ ပျူစောထီးအဖွဲ့ဝင်တွေရဲ့ စစ်ဆေး ဖမ်းဆီးခံလိုက်ရတာပါ။
မနွယ်သရဖီစိုးနဲ့ နီးစပ်တဲ့ ရွာခံအမျိုးသမီးတဦးကတ " သူက ထားဝယ်ကို အလုပ်ကိစ္စနဲ့ သွားတာ။ ဘာလို့ ဖမ်းတာလဲဆိုတာတော့ သေချာမသိရဘူး။ အခုထိတော့ ကျောက်နီမော်က ပျူစောထီးစခန်းမှာပဲ ရှိသေးတယ်။ လက်ဝတ်လက်စားတွေတော့ ပျူစောထီးတွေ ယူထားတယ် လို့ ကြားတယ်" လို့ ပြောပါတယ်။
ထားဝယ်-ရှင်မော် ကားလမ်းမပေါ်မှာရှိတဲ့ ကျောက်နီမော်ကျေးရွာမှာ စစ်ဆေးရေး ဂိတ်ချထားတာမျိုး မရှိပေမဲ့ စစ်ကောင်စီက လက်နက်တပ်ဆင်ပေးထားတဲ့ ပျူစောထီးတွေက လမ်းသွား လမ်းလာတွေကို နေ့တိုင်းနီးပါး စစ်ဆေးလေ့ရှိတယ်လို့ ဒေသခံတွေက ပြောပါတယ်။
စက်တင်ဘာ ၂၉ ရက်ကတော့ ဆက်ကြေးကောက်ပြီးပြန်လာတဲ့ ကျောက်နီမော်ကျေးရွာက ပျူစောထီးအဖွဲ့ဝင်တွေကို လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ဝင်တွေ တိုက်ခိုက်ခဲ့လို့ ပျူစောထီးအဖွဲ့ဝင် ၂ ဦးသေဆုံးပြီး ကာဘိုင်သေနတ်တလက်၊ လက်လုပ်သေနတ်အတိုတလက်၊ ကျည်အိမ် ၄ ခုနဲ့ ကျည်ဆန်အချို့လည်း သိမ်းဆည်းရမိခဲ့ပါတယ်။
ကျောက်နီမော်ကျေးရွာမှာ ဦးချစ်စန်းမောင် ဦးဆောင်တဲ့ ပျူစောထီးအဖွဲ့ဝင် ၁၅ ဦးလောက်ဟာ ရွာထဲမှာပဲ စခန်းချနေထိုင်ပြီး လမ်းသွားလမ်းလာတွေကို စစ်ဆေးဖမ်းဆီးတာ၊ ဆက်ကြေး ကောက်တာတွေအပြင် နေအိမ်ဓားပြတိုက်တာတွေလည်း လုပ်ခဲ့ဖူးတယ်လို့ ဒေသခံတွေက ပြောပါတယ်။
