၂၀၂၀ တက္ကသိုလ်ဝင်စာမေးပွဲ အောင်မြင်သူတွေအတွက် တက္ကသိုလ်ပထမနှစ် (ပထမနှစ်ဝက်) သင်တန်းကို တနိုင်ငံလုံးမှာရှိတဲ့ တက္ကသိုလ်အသီးသီးမှာ နိုဝင်ဘာ ၂၁ ရက် ဒီနေ့ စတင်ဖွင့်လှစ်ခဲ့ပါတယ်။

၂၀၂၀ တက္ကသိုလ်ဝင်စာမေးပွဲ အောင်မြင်သူတွေအတွက် တက္ကသိုလ်ပထမနှစ် တက်ရောက်လိုသူတွေကို ကျောင်းအပ်နှံဖို့ ဒီလကုန်အထိ ကျောင်းအပ်လက်ခံပေးသွားမယ်လို့ စစ်ကောင်စီရဲ့ ပညာရေးဌာနက ကြေညာခဲ့ပြီး ၂၀၂၂ တက္ကသိုလ်ဝင်စာမေးပွဲ အောင်မြင်သူတွေအနက် ၇၅ ရာခိုင်နှုန်းဝန်းကျင်လောက်ကတော့ ကျောင်းအပ်ထားတယ်လို့ သိရပါတယ်။

၂၀၂၀ ခုနှစ်က တနိုင်ငံလုံးအတိုင်းအတာနဲ့ ကျောင်းသားကျောင်းသူ ၉၀၀,၀၀၀ ကျော် တက္ကသိုလ်ဝင်စာမေးပွဲကို ဝင်ရောက်ဖြေဆိုခဲ့ကြပြီး အဲ့ဒီအထဲက ၂၉၀,၀၀၀ ကျော် အောင်မြင်ခဲ့ကြပါတယ်။

စစ်တပ်အာဏာသိမ်းမှု အကျိုးဆက်တွေကြောင့် စာမေးပွဲအောင်မြင်ခဲ့တဲ့ ကျောင်းသားကျောင်းသူတွေအတွက် တက္ကသိုလ်ပထမနှစ်သင်တန်းတွေကို ဖွင့်လှစ်နိုင်ခဲ့ခြင်းမရှိဘဲ ၂ နှစ်အကြာမှသာ ပြန်လည်ဖွင့်လှစ်နိုင်ခဲ့တာလည်း ဖြစ်ပါတယ်။

အခုအချိန်အထိ ၂၀၂၀ တက္ကသိုလ်ဝင်စာမေးပွဲအောင်မြင်ပြီး ကျောင်းမအပ်ရသေးသူတွေဟာ ပဋိပက္ခဖြစ်ပွားရာဒေသက ကျောင်းသားကျောင်းသူတွေဖြစ်နိုင်ပြီး တချို့ကျောင်းသားကျောင်းသူတွေကတော့ စစ်အာဏာရှင်စနစ်လက်အောက်မှာ ပြုလုပ်တဲ့ ပညာရေးကို အယုံအကြည် မရှိတာကြောင့် ကျောင်းမအပ်ကြတာ ဖြစ်နိုင်တယ်လို့ ပညာရေးဌာနက အရာရှိတဦးက ပြောပါတယ်။

၂၀၂၀ တက္ကသိုလ်ဝင်စာမေးပွဲ အောင်မြင်သူတွေထဲက ငါးဘာသာဂုဏ်ထူးနဲ့ အောင်မြင်ခဲ့တဲ့ ကျောင်းသားတဦးကတော့ လက်နက်ကိုင်တော်လှန်ရေး တိုက်ပွဲတခုအတွင်း ကျဆုံးခဲ့ရတယ်လို့လည်း သက်ဆိုင်ရာ တော်လှန်ရေးတပ်ဖွဲ့တခုက ထုတ်ပြန်ခဲ့ပါသေးတယ်။

၂၀၂၀ တက္ကသိုလ်ဝင်စာမေးပွဲ အောင်မြင်သူတွေအတွက် တက္ကသိုလ်ပထမနှစ် (ပထမနှစ်ဝက်) ရဲ့ တက္ကသိုလ်နှစ်ဝက် စာမေးပွဲတွေကို ၂၀၂၃ ခုနှစ်၊ မတ်လ ၉ ရက်နေ့မှာ ကျင်းပမယ်လို့ စစ်ကောင်စီရဲ့ ပညာရေးဌာနက ထုတ်ပြန်ထားပါတယ်။

အမေရိကန်ပြည်ထောင်စု၊ မက်ဆာချူးဆက်ပြည်နယ်က ဘော်စတွန်မြို့ရှိ နော့သ် အိစတန်း တက္ကသိုလ်မှာ စက်တင်ဘာ ၁၃ ရက်က ဗုံးပေါက်ကွဲမှု ဖြစ်ပွားခဲ့ပြီး လူတယောက် ထိခိုက်သွားပေမဲ့ အသက်အန္တရာယ်မရှိဘူးလို့ ရဲတပ်ဖွဲ့က ပြောပါတယ်။

ဒဏ်ရာရရှိသူမှာ တက္ကသိုလ်ဝန်ထမ်းတယောက်ဖြစ်ပြီး ဗုံးပါတဲ့အထုပ်ကို ဖွင့်နေတုန်း ပေါက်ကွဲခဲ့တာဖြစ်ကြောင်း တက္ကသိုလ်ရဲ့ အမည်မဖော်လိုသူ ပြောရေးဆိုခွင့်ရှိသူကို ကိုးကားပြီး WCVB ရုပ်သံက ဖော်ပြခဲ့ပါတယ်။

ဘော်စတွန်ရဲဌာနက အရာရှိ အန်ဒရေးဝပ်ဆန်ရဲ့ ပြောကြားချက်အရ ရဲတပ်ဖွဲ့ကို ည ၇ နာရီလောက်မှာ ခေါ်ခဲ့တယ်လို့ ဆိုပါတယ်။

ရဲတပ်ဖွဲ့ရဲ့ ဗုံးတပ်ခွဲ၊ ဘော်စတွန်မီးသတ်ဌာနနဲ့ ဘော်စတွန် အရေးပေါ် ဆေးဘက်ဆိုင်ရာ ဌာနတို့က အခင်းဖြစ်ပွားမှုကို ပါဝင်စုံစမ်းစစ်ဆေးနေကြောင်း တာဝန်ရှိသူတွေက သတင်းထုတ်ပြန်ခဲ့ပါတယ်။ FBI ကလည်း ဘော်စတွန်ရှိ ဒေသဆိုင်ရာ တာဝန်ရှိသူတွေကို အကူအညီ ပေးနေပါတယ်။

အဆောက်အအုံခြောက်ခုမှာ ညနေပိုင်းသင်တန်းတွေကို ဖျက်သိမ်းခဲ့ကြောင်း ကျောင်းဝင်းရဲတပ်ဖွဲ့က တွစ်တာမှာ ပြောကြားခဲ့ပါတယ်။