ထိုင်းနိုင်ငံထဲကို တရားမဝင် ဝင်ရောက်လာတဲ့ ရွှေ့ပြောင်းလုပ်သားတွေအပါအဝင် နိုင်ငံခြားသားတွေ တစ်နှစ်အတွင်း ၄၀,၀၀၀ ကျော် ဖမ်းဆီးရမိကြောင်း ထိုင်းအမျိုးသားရဲတပ်ဖွဲ့က ဒီဇင်ဘာ ၂၂ ရက်က ထုတ်ပြန်ထားပါတယ်။
ပြီးခဲ့တဲ့ ၂၀၂၀ ပြည့်နှစ် ဒီဇင်ဘာ ၂၉ ရက်မှ ၂၀၂၁ ခုနှစ် ဒီဇင်ဘာ ၁၅ ရက်အထိ တစ်နှစ်အတွင်း တရားမဝင် ဝင်ရောက်လာသူ ၄၂၄၄၃ ဦးနဲ့ ပွဲစား ၂၉၃ ဦး၊ တရားမဝင် ဝင်ရောက်လာဖို့ ကူညီပေးသူ ၈၄၁ ဦးအပါအဝင် စုစုပေါင်း ၄၃၅၇၇ ဦး ဖမ်းဆီးရမိကြောင်း ထိုင်းရဲတပ်ဖွဲ့ ဒုရဲချုပ် ဒမ်းရုန်းဆဒ် ကစ်သီပရဖတ်က ယမန်နေ့ သတင်းစာရှင်းပွဲမှာ ပြောပါတယ်။
လူကုန်ကူးဂိုဏ်း ၂၂၁ ခုရှိကြောင်း စုံစမ်းသိရှိရပြီး ၁၅၄ ဂိုဏ်းကို ဖမ်းဆီးအရေးယူခဲ့ကြောင်း၊ အဲဒီထဲက အဓိကတရားခံ ၄၀၂ ဦးနဲ့ ပါဝင်ပတ်သက်သူ တရားမဝင်နိုင်ငံခြားသား ၁၇၆၃ ဦးကို ဖမ်းဆီးခဲ့ပြီး ၈၂ ဦးကို ဖမ်းဝရမ်းထုတ်ထားတယ်လို့ ဆိုပါတယ်။
အဆိုပါအမှုတွေနဲ့ ပတ်သက်ပြီး တရားခံ ၃၁၂ ဦးရဲ့ ပိုင်ဆိုင်မှုတွေ သိမ်းဆည်းခဲ့ရာမှာ ယာဉ် ၁၈၂ စီး ဘဏ်စာအုပ် ၂၀ ကျော်နဲ့ တခြားပိုင်ဆိုင်မှုတွေ ပါဝင်တယ်လို့ ပြောပါတယ်။
ဒီလာမယ့် နှစ်သစ်ကူးကာလမှာလည်း တရားမဝင် ဝင်ရောက်မှုတွေ ပိုမိုတင်းကျပ်စစ်ဆေးသွားမှာ ဖြစ်ပြီး တရားမဝင်အလုပ်သမားတွေ ငှားရမ်းခန့်ထားတဲ့ အလုပ်ရှင်တွေအနေနဲ့ အလုပ်သမား ၁ ဦးလျှင် ဘတ် ၁ သောင်းမှ ၁ သိန်းထိ မပိုတဲ့ငွေဒဏ်၊ ပြစ်မှုထပ်ဆင့်ကျူးလွန်က နောက်ထပ် ထောင်ဒဏ် ၃ နှစ်ထပ်ဖြည့်ပြီး ကျခံရမယ်လို့ ဆိုပါတယ်။
အလုပ်သမားတွေအနေနဲ့လည်း ခွင့်ပြုချက်မရဘဲ အလုပ်ဝင်လုပ်ရင် ငွေဒဏ် ဘတ် ၅ ထောင်မှ ၅ သောင်းထိ ကျခံရမယ့်အပြင် ပြည်နှင်ဒဏ် ၂ နှစ် အပေးခံရမှာဖြစ်ကြောင်း၊ တရားမဝင် ဝင်ရောက်နေထိုင်တာ၊ မသင်္ကာမှုတွေရှိရင် ဖုန်းနံပါတ် ၁၉၁ နဲ့ ၁၅၉၉ ဆီ ၂၄ နာရီ ဆက်သွယ်သတင်းပေးဖို့လည်း ဒုရဲချုပ်က ပြောသွားပါတယ်။
ကိုးကား- Thai PBS
ကိုဗစ်ရောဂါဖြစ်ပွားနေတဲ့ ကာလအတွင်း နယ်စပ်ဝင်ထွက်ပေါက်တွေက တရားဝင် ဖွင့်လှစ်ထားတဲ့ စခန်းတွေမှာ စနစ်တကျလက်ခံပြီး ရောဂါကုသရေးလုပ်ငန်းတွေကို ဆောင်ရွက်နိုင်ဖို့ အခုလို ဆောင်ရွက်ရတာဖြစ်သလို ထိထိရောက်ရောက် အရေးယူသွားမယ်လို့ ဆိုပါတယ်။
မြဝတီခရိုင် အုပ်ချုပ်ရေးမှူး ဦးတေဇာအောင်က “တယောက်လွတ်သွားရင် အရမ်းအန္တရာယ်ကြီးတယ်။ ထိန်းချုပ်တဲ့စနစ် မှန်မှန်ကန်ကန်ဖြစ်အောင် ပေးတဲ့လမ်းကြောင်းကနေ ဝင်ဖို့လိုတယ်။ အဲလိုဝင်တဲ့သူကော၊ လက်ခံတဲ့သူကော ထိထိရောက်ရောက် အရေးယူ ဆောင်ရွက်သွားမယ်” လို့ ပြောပါတယ်။
နယ်စပ်ကနေ တရားမဝင် ဖြတ်သန်းခွင့်မရှိစေဖို့နဲ့ ကူညီဆောင်ရွက်နိုင်ဖို့ မဲဆောက်မြို့ တာခ်ခရိုင် လ.ဝ.က၊ အလုပ်သမားသံအရာရှိ၊ သက်ဆိုင်ရာ အုပ်ချုပ်ရေးဌာနတွေကို အသိပေး အကြောင်းကြားစာတွေ ပေးပို့ထားပါတယ်။
တရားဝင်မထုတ်ပြန်ခင် သောင်းရင်းမြစ်ကနေ တရားမဝင် ဖြတ်ကူးခဲ့တဲ့သူ ၆၆ ဦးကို မြဝတီဆေးရုံမှာ ကျန်းမာရေးစစ်ဆေးတာတွေ ပြုလုပ်စေခဲ့ပြီး ဥပဒေအရ အရေးယူ ဆောင်ရွက်ပြီးမှသာ Quaratine စခန်းတွေကို ဝင်ရောက်ရမှာပါ။
ဇွန် ၁ ရက်နေ့မှ စတင်ပြီး နှစ်နိုင်ငံ ညှိနှိုင်းဆောင်ရွက်မှုနဲ့ တရားဝင် ပြန်လည်ဝင်ရောက်လာသူ မြန်မာနိုင်ငံသား ၄၆၀၀ ကျော်၊ IDC ၅၀၀ ကျော်၊ သီးခြားဝင်ရောက်သူ ၂၀၀၀၀ ကျော် ဝင်ရောက်လာခဲ့ပါတယ်။
၂၀၂၀ ဇွန်လ ၁၀ ရက်နေ့က ပြည်ပနိုင်ငံတွေကနေ မြန်မာနိုင်ငံကို မည်သူမဆို တရားမဝင် ဝင်ထွက်ပေါက်တွေကနေ ဝင်ရောက်တာ၊ တရားမဝင် ဝင်ရောက်ကြောင်း သိလျက်နဲ့ လက်သင့်ခံရင် သက်ဆိုင်ရာ တည်ဆဲဥပဒေတွေနဲ့အညီ အရေးယူ ဆောင်ရွက်ခံရမယ်လို့ ကိုဗစ်-၁၉ ကာကွယ်ထိန်းချုပ်၊ ကုသရေးအမျိုးသားအဆင့် ဗဟိုကော်မတီက အသိပေးကြေညာထားပါတယ်။
ရဲမင်းခေါင် 
