ရာထူးတာဝန်ကနေ အငြိမ်းစားယူတော့မယ့် တရုတ်ဝန်ကြီးချုပ် လီကီချန်းရဲ့ နေရာမှာ  လီချန်ကို အစားထိုးခန့်အပ်ဖို့ မတ် ၅ ရက်မှာစတဲ့ တရုတ်အမျိုးသားပြည်သူ့ကွန်ဂရက်အတွင်း ပြင်ဆင်နေပြီး အတည်ပြုဖို့ အဆင်သင့်ဖြစ်နေပါပြီ။

သမ္မတ ရှီကျင့်ဖျင်နဲ့ လီချန်ရဲ့ နီးစပ်မှုဟာ အားသာချက်ရော အားနည်းချက်ပါ နှစ်ခုလုံး ဖြစ်စေတယ်လို့ တရုတ်ခေါင်းဆောင်မှုကို စောင့်ကြည့်သူတွေက သုံးသပ်ပြောကြပြီး လီချန်ဟာ ရှီရဲ့ ယုံကြည်မှုကိုရပေမဲ့ ကာလကြာရှည် ကူညီထောက်ပံ့သူအဖြစ်သာ သတ်မှတ်ခံထားရပါတယ်။

ဗျူရိုကရက်တဦးဖြစ်သူ လီချန်ဟာ ဝန်ကြီးချုပ်အဖြစ် အတည်ပြုခန့်အပ်ခံရရင်တော့ ကမ္ဘာ့ဒုတိယ စီးပွားရေးအင်အားကြီးနိုင်ငံဖြစ်တဲ့ တရုတ်နိုင်ငံရဲ့ နံပါတ် ၂ ခေါင်းဆောင်အဖြစ် တာဝန်ယူ ဆောင်ရွက်ရမှာဖြစ်ပါတယ်။

လီချန်ဟာ ရှန်ဟိုင်းဒေသခံပြည်သူ ၂၅ သန်းကို ကိုဗစ်-၁၉ ကပ်ရောဂါကူးစက်မှု ဟန့်တားနိုင်ရေး ပိတ်ဆို့တားမြစ်မှုတွေ ဆောင်ရွက်ရာမှာ ကြီးကြပ်ခဲ့လို့ လူသိများခဲ့ပါတယ်။

သူ့ရဲ့လုပ်ဆောင်ချက်ကြောင့် တရုတ်ဘဏ္ဍာရေးမြို့တော် ရှန်ဟိုင်းရဲ့ စီးပွားရေးကို ထိခိုက်စေလို့ စိတ်ပိုင်းဆိုင်ရာ ဒဏ်ရာဒဏ်ချက်တွေ ကျန်ရစ်ခဲ့ပေမဲ့ ရာထူးတိုးတာကို နှောင့်နှေးထိခိုက်တာ မရှိခဲ့ပါဘူး။

ကျဲ့ကျန်းပြည်နယ်ဇာတိဖြစ်တဲ့ အသက် ၆၃ နှစ်အရွယ် လီချန်ဟာ ၂၀၀၄ ခုနှစ်ကနေ ၂၀၀၇ ခုနှစ်အထိ ရှီကျင့်ဖျင် တရုတ်ကွန်မြူနစ်ပါတီရဲ့ အကြီးအကဲဖြစ်ချိန် ရှီရဲ့ အယုံကြည်ရဆုံးသော လူယုံတွေသာ တာဝန်ယူရတဲ့ စစ်ဦးစီးအရာရှိချုပ် ဖြစ်ခဲ့ဖူးပါတယ်။

သြစတြေးလျဝန်ကြီးချုပ် အန်တိုနီအယ်လ်ဘန်နီဟာ ကမ္ဘောဒီးယားနိုင်ငံမှာ နိုဝင်ဘာ ၁၃ ရက်က ကျင်းပတဲ့ အာဆီယံခေါင်းဆောင်များ အစည်းအဝေးမှာ တရုတ် သမ္မတ ရှီကျင့်ဖျင်နဲ့ တရားဝင် ထိပ်သီးဆွေးနွေးပွဲကျင်းပဖို့ မျှော်လင့်နေချိန် တရုတ်ဝန်ကြီးချုပ် လီကီချန်းနဲ့ တွေ့ဆုံ စကားပြောခဲ့ပါတယ်။

အခုတွေ့ဆုံမှုဟာ အပြုသဘောဆောင်တယ်လို့   သြစတြေးလျဝန်ကြီးချုပ်   သတင်းစာရှင်းလင်းပွဲမှာ ပြောပါတယ်။

မကြာသေးမီနှစ်တွေအတွင်း နှစ်နိုင်ငံအကြား ဆက်ဆံရေး ယိုယွင်းလာလို့ တရုတ်ဟာ သြစတြေးလျ သွင်းကုန်တချို့အပေါ် ပိတ်ဆို့အရေးယူမှုတွေ ချမှတ်ခဲ့ပြီး ကိုဗစ်-၁၉ ကပ်ရောဂါ ပျံ့ပွားမှု ဇာစ်မြစ်ကို နိုင်ငံတကာက စုံစမ်းစစ်ဆေးဖို့ ဩစတြေးလျအစိုးရရဲ့ တောင်းဆိုမှုကိုလည်း ဒေါသတကြီး တုံ့ပြန်ခဲ့ ပါတယ်။

အယ်လ်ဘန်နီဟာ အမေရိကန်သမ္မတ ဂျိုးဘိုင်ဒန်နဲ့လည်း  မိနစ် ၄၀ ကြာ တွေ့ဆုံ ဆွေးနွေးခဲ့ပါသေးတယ်။

ရာသီဥတု ပြောင်းလဲမှုနဲ့ ဒေသတွင်းလုံခြုံရေးမှသည် ယူကရိန်းကို ရုရှားရဲ့  ကျူးကျော်မှုနဲ့ သြစတြေးလျ၊ ဗြိတိန်နဲ့ အမေရိကန်တို့ကြား သုံးနိုင်ငံ လုံခြုံရေးသဘောတူညီချက်—AUKUS မိတ်ဖက်ပူးပေါင်းမှုတွေကို ဆွေးနွေးပွဲတွေမှာ ထည့်သွင်းစဉ်းစားခဲ့တယ်လို့  ဝန်ကြီးချုပ်က ပြောပါတယ်။ 

ဒါ့အပြင် အာဆီယံ-သြစတြေးလျ-နယူးဇီလန် လွတ်လပ်သောကုန်သွယ်မှု သဘောတူညီချက် (AANZFTA) ကို အဆင့်မြှင့်တင်ဖို့ ဖနွမ်းပင်မှာ စေ့စပ်ညှိနှိုင်းခဲ့တယ်လို့လည်း သူက ပြောပါသေးတယ်။ 

တိုးတက်မှုတွေမှာ အီလက်ထရွန်းနစ် ကူးသန်းရောင်းဝယ်ရေး၊ ပြိုင်ဆိုင်မှု၊ အကောက်ခွန်ဆိုင်ရာ လုပ်ထုံးလုပ်နည်းတွေနဲ့ ကုန်သွယ်မှု ပံ့ပိုးကူညီမှု၊ ကုန်စည် ကုန်သွယ်ရေးနဲ့ စည်းမျဥ်းစည်းကမ်း တွေ ပါတယ်လို့  သြစတြေးလျဝန်ကြီးချုပ်က ပြောပါတယ်။