မကွေးတိုင်းဒေသကြီး ငဖဲမြို့နယ်က အမြောက်တပ်ကို ဇန်နဝါရေ ၂၃ ရက်နေ့မနက်ပိုင်းမှာ Tringle 3T PDF ကတာဝေးပစ်စိန်ပြောင်းနဲ့ တိုက်ခိုက်ခဲ့တယ်လို့ PDF တပ်ဖွဲ့ကနေ ပြောပါတယ်။

ငဖဲမြို့နယ်အခြေစိုက် အမစ(၉၀၅) အမြှောက်တပ်ကို ဒီကနေ့မနက် ၇နာရီလောက်မှာ Tringle 3T PDF က တာဝေးပစ်စိန်ပြောင်းနဲ့ ၂ ချက်ပစ်ခတ်တိုက်ခိုက်ခဲ့တယ်လို့ Tringle 3T PDF ရဲ့ ပြန်ကြားရေးတာဝန်ခံကပြောပါတယ်။

စစ်ကောင်စီရဲ့တပ်ထဲဖြစ်တာရယ်၊ အဝေးကနေ လှမ်းပစ်ရတာရယ်ကြောင့် ထိခိုက်သေဆုံးတဲ့ အခြေနေကို မသိရသေးဘဲ ဆက်လက်စုံစမ်းနေတယ်လို့ ဆိုပါတယ်။

ဇန်နဝါရီ ၂၂ ရက်နေ့ မနက် ၈နာရီကျော်လောက်ကလည်း ငဖဲမြို့နယ်ထဲက ကပစ ၁၄ ကို စက်ရုံမလည်ပတ်နိုင်အောင် အဓိက လျှပ်စစ်ဓာတ်အားပေးပို့တဲ့လိုင်းတွေကို Tringle 3T PDF က ဗုံးခွဲဖျက်ဆီးခဲ့တယ်လို့ဆိုပါတယ်။

ငဖဲမြို့နယ် ဂုတ်ကြီးရွာနဲ့ စပ်စီရွာကြားမှာလည်း ဇန်နဝါရီ ၁၀ ရက်နေ့က အမ်းမြို့ ဘက်ကနေ ပြန်လားတဲ့ စစ်ကောင်စီကား ၃ စီးကို ညီနောင်မဟာမိတ်တပ်ဖွဲ့တွေက မိုင်းဆွဲတိုက်ခိုက်ရာ စစ်ကောင်စီတပ်သား ၃ ယောက် လွင့်ထွက်သွားပြီး ကားတစ်စီး ထိခိုက်ပျက်စီးခဲ့တယ်လို့ သိရပါတယ်။

အဲဒီစိန်ပြောင်း နဲ့ ပစ်ခတ်တိုက်ခိုက်ခံရတဲ့ ဖြစ်စဥ်နဲ့ပတ်သက်လို့ ထိခိုက်သေဆုံးတဲ့ အခြေနေကို စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။

မြင်းခြံမြို့ PDF အဖွဲ့နဲ့ ရေစကြိုမြို့ ရေလယ်ကျွန်းဒေသက PDF အဖွဲ့နှစ်ဖွဲ့ပူးပေါင်းပြီး တာဝေး ပစ် အဝေးထိန်းစိန်ပြောင်း ထုတ်လုပ်မှု အောင်မြင်ခဲ့တယ်လို့ သိရပါတယ်။

စမ်းသပ်ထုတ်လုပ်မှုမှာ ၁၅ ရက် ဝန်းကျင်လောက် ကြာမြင့်ခဲ့ပြီး စိန်းပြောင်းနဲ့ ထည့်ပစ်ရတဲ့ အသီး ပြုလုပ်စဉ်မှာ အခက်အခဲတွေရှိခဲ့တယ်လို့ PDF အဖွဲ့တွေက ထုတ်ပြန်ကြေညာထားပါတယ်။

ရေစကြိုမြို့ ရေလယ်ကျွန်းဒေသတွေမှာ စစ်ကောင်စီတပ်က  မကြာခဏ ဝင်ရောက် ပစ်ခတ်လေ့ရှိပြီး ကျေးရွာဒေသခံတွေလည်း ထိမှန်သေဆုံးမှုတွေ၊ ကျွဲနွားသေဆုံးမှုတွေ၊ နေအိမ်တွေ မီးရှို့ဖျက်ဆီးခံရမှုတွေကို ကာကွယ်တိုက်ထုတ်နိုင်ဖို့အတွက် အခုလိုလက်နက်တွေကို တီထွင်ခဲ့တာလို့ ဆိုပါတယ်။

စစ်ကောင်စီကို တွန်းလှန်တိုက်ထုတ်ရာမှာ  စစ်ကောင်စီဘက်က လက်နက်တွေက ရှိပြီးသားဖြစ်ပေမယ့်လည်း ဒေသခံ PDF တွေအတွက်ကတော့ ဘာလက်နက်မှမရှိတဲ့အတွက် အခုလို တီထွင်ထုတ်လုပ်ခဲ့တာလို့ သိရပါတယ်။

“စမ်းသပ်ထုတ်လုပ်နေတာတော့ ၁၅ ရက်ဝန်းကျင်လောက်ကြာတယ်ဗျ၊ စိန်ပြောင်းရယ်ထည့်ပစ်ရ တဲ့ အသီးရယ်အတွက် အခက်အခဲတွေရှိတယ်။ ဘာကြောင့်လုပ်ခဲ့ရလဲဆိုရင် လက်နက်ကြီးဆိုတာက ဝယ်ယူဖို့မတတ်နိုင်ဘူးဗျ၊ အဲ့တော့ ကိုယ်တိုင်တီထွင် ပြီးစမ်းသပ်ထုတ်ရတာပေါ့။ လက်နက်ကြီးတွေက စကစမှာက ရှိတယ်လေ၊ ကျနော်တို့မှာက အခုလို ထုတ်လုပ်မှ ရနိင်တာပါ” လို့ MG6  ပြောက်ကျားတပ်အဖွဲ့က တာဝန်ရှိသူတစ်ဦးက ပြောပါတယ်။

ဒီဇင်ဘာ ၁၁  ရက်နေ့ကလည်း ရေစကြိုမြို့ ရေလယ်ကျွန်းကျေးရွာတွေဖြစ်တဲ့ ရွှေလှံကျေးရွာတွေမှာ စစ်ကောင်စီက လက်နက်ကြီးတွေနဲ့ပစ်ခတ်ခဲ့တာကြောင့် ကျေးရွာထဲက ပြည်သူတွေ ကျေးရွာလုံးကျွတ်ထွက်ပြေးတိမ်းရှောင်ခဲ့ရပြီး ဇရပ်အတွင်း နားနေတဲ့ လူငယ်တစ်ဦးလည်း ပစ်သတ်ခဲ့ပါသေးတယ်။

ဒါ့အပြင် လူနေအိမ်တွေကို မီးရှို့ဖျက်ဆီးမှုတွေပြုလုပ်ပြီး နေအိမ်အတွင်းက ငွေကြေးနဲ့ ပစ္စည်းတွေကိုလည်း ယူဆောင်သွားတယ်လို့ ဒေသခံတွေဆီကသိရပါတယ်။