ပိုလန်နိုင်ငံရှိ မိဘမဲ့ဂေဟာတခုကို မေ ၉ ရက် နှောင်းပိုင်းက အမျိုးသားတဦး ဝင်ရောက်လာခဲ့ပြီး ဓားနဲ့တိုက်ခိုက်မှုအတွင်း အသက် ၁၆ နှစ်အရွယ် ဆယ်ကျော်သက် မိန်းကလေး ၁ ဦး သေဆုံးပြီး တခြားလူ ၉ ဦး ဒဏ်ရာရရှိခဲ့ကြောင်း အလယ်ပိုင်းမြို့ဖြစ်တဲ့ လော့ဒ်ဇ်မြို့ရှိ ရဲတပ်ဖွဲ့က ပြောကြားခဲ့ပါတယ်။

ရဲတပ်ဖွဲ့ဟာ မေ ၉ ရက်က ဂရင်းနစ်စံတော်ချိန် ၂၁ နာရီမှာ လော့ဒ်ဇ်မြို့အနီးရှိ တိုမစ်စ်-လာဝစ်ချေရွာရှိ မိဘမဲ့ဂေဟာကို အသက် ၁၉ နှစ်အရွယ် အမျိုးသားတဦး ဝင်ရောက်လာပြီး ဒေသခံတွေကို ချွန်ထက်တဲ့အရာနဲ့ တိုက်ခိုက်ခဲ့ကြောင်း ရဲတပ်ဖွဲ့ ပြောရေးဆိုခွင့်ရှိသူ အာနေတာ ဆိုဘီယေရာဂျ်က ပြောပါတယ်။

ဒီဖြစ်ရပ်ကြောင့် လူ ၅ ဦးကို ဆေးရုံတင်ထားရပြီး သူတို့ရဲ့ အသက်အန္တရာယ်တော့ စိုးရိမ်စရာမရှိဘူးလို့ ဆိုဘီယေရာဂျ်က ပြောပါတယ်။ တခြားလေးဦးကိုတော့ အခင်းဖြစ်နေရာမှာ ကုသပေးခဲ့ပါတယ်။

မိဘမဲ့ဂေဟာက တခြားမိန်းကလေးတွေလည်း စိတ်ပိုင်းဆိုင်ရာ စောင့်ရှောက်မှုကို ခံယူထားကြောင်း ရှဲ့ရားဒ်စ်ခရိုင်အုပ်ချုပ်ရေးမှူး မာရီယူစ် ဘာ့ဒ်ဂျောက ပြောပါတယ်။

အခင်းဖြစ်ပွားပြီး ၁ နာရီလောက်အကြာမှာ တိုက်ခိုက်သူကို သူနေထိုင်တဲ့နေရာမှာ ဖမ်းဆီးနိုင်ခဲ့ပြီး  ခုခံတုံ့ပြန်မှု မရှိခဲ့ဘူးလို့ ဆိုပါတယ်။

အဖမ်းခံရချိန်မှာ အရက်မူးနေတာ မရှိပေမဲ့ ရဲတွေက မူးယစ်ဆေးဝါးအတွက် စစ်ဆေးနေတယ်လို့ ဆိုဘီယေရာဂျ်က ပြောပါတယ်။

အစိုးရရှေ့နေတွေဟာ တိုက်ခိုက်သူနဲ့ သေဆုံးသူ ဆယ်ကျော်သက်မိန်းကလေးတို့ရဲ့ ဆက်နွှယ်မှု အပါအဝင် သေဆုံးသူရဲ့ နောက်ဆုံးကာလ အစိတ်အပိုင်းအားလုံးကို စုံစမ်းစစ်ဆေးနေကြောင်း ခရိုင်အစိုးရရှေ့နေရုံးမှ ပြောရေးဆိုခွင့်ရှိသူ ယိုလန်တာ စကိလ်န်ရှ် က ပြောပါတယ်။

တိုက်ခိုက်သူဟာ မိန်းကလေးရဲ့ ရည်းစားဟောင်းဖြစ်ကြောင်း အစိုးရပိုင် PAP သတင်းဌာနက သူ့ရဲ့သတင်းရင်းမြစ်ကို အမည်မဖော်ဘဲ ထုတ်ပြန်ပါတယ်။

PAP ရဲ့ အဆိုအရ သူဟာ ပြတင်းပေါက်ကနေ မိန်းကလေးရဲ့ အခန်းထဲကို ဝင်ရောက်ခဲ့တယ်လို့ ဆိုပါတယ်။ တိုက်ခိုက်သူရဲ့ အထောက်အထားကို ရိုက်တာက ချက်ချင်း အတည်မပြုနိုင်သေးပါဘူး။

တိုက်ခိုက်မှုဖြစ်ပွားချိန်မှာ ဝန်ထမ်း ၁ ဦး အပါအဝင် လူ ၁၃ ဦးဟာ မိဘမဲ့ဂေဟာမှာ ရှိနေခဲ့ပါတယ်။

လူ ၂၅ ဦး သေဆုံးခဲ့ရတဲ့ ၂၀၁၈ ခုနှစ် စစ်ရေးပြအခမ်းအနား တိုက်ခိုက်မှုအပါအဝင် အာရပ်ခွဲထွက်ရေးအုပ်စုကို ဦးဆောင်ခဲ့တယ်လို့ စွပ်စွဲခံထားရတဲ့ ဆွီဒင်-အီရန် နိုင်ငံသား ၂ မျိုး ခံယူ ထားတဲ့ အတိုက်အခံခေါင်းဆောင်တဦးကို မေ ၆ ရက်က ကွပ်မျက်လိုက်ပြီလို့ အီရန် တရားရေးဌာနက ပြောပါတယ်။ 

ဟာဘစ် ဖှာရာယိုလာ ရှာ့ဘွန်အား ကွပ်မျက်တာကို ကန့်ကွက်ဖို့ အီရန် လက်ထောက် သံအမတ်ကို ဆင့်ခေါ်ခဲ့တယ်လို့ ဆွီဒင်နိုင်ငံခြားရေးဝန်ကြီးဌာနက ပြောပါတယ်။

ရှာ့ဘွန်ဟာ အီရန်နိုင်ငံရဲ့ တင်းကျပ်တဲ့ အစ္စလာမ္မစ်ဥပဒေတွေအောက်မှာ အကျင့်ပျက်ခြစားမှုနဲ့ သေဒဏ်ချမှတ်ခံခဲ့ရတာပါ။

အီရန်နိုင်ငံအနောက်တောင်ပိုင်းရှိ ရေနံကြွယ်ဝတဲ့ ခူဇက်စတန် ပြည်နယ်မှာ သီးခြားပြည်နယ် တခု ရရေး ကြိုးစားနေတဲ့ အာရပ် လွတ်မြောက်ရေးအတွက် အာဝှက်ဇ် လွတ်မြောက်ရေး လှုပ်ရှားမှုကို ဦးဆောင်ရင်း ဗုံးခွဲမှုတွေ၊ အကြမ်းဖက် စစ်ဆင်ရေးတွေ အများအပြားလုပ်ဖို့ ကြံစည်မှုအတွက် သူ့ကို အီရန်က ၂၀၂၂ ခုနှစ်မှာ ရုံးတင်စစ်ဆေးခဲ့ပါတယ်။ 

ဆွီဒင်၊ အစ္စရေးနှင့် ဒေသတွင်းနိုင်ငံတွေက လုံခြုံရေးအေဂျင်စီတွေက ရှာ့ဘွန်နဲ့ သူ့အဖွဲ့ကို ကျောထောက်နောက်ခံပေးလို့ နှစ်ပေါင်းများစွာအတွင်း အီရန်နိုင်ငံသား ၄၅၀ သေဆုံး ဒဏ်ရာရ ခဲ့တယ်လို့ ကွပ်မျက်ကြောင်း ကြေညာချက်ထဲမှာ တရားရေးအရာရှိက စွပ်စွဲခဲ့ပါတယ်။ 

ဆွီဒင်နိုင်ငံခြားရေးဝန်ကြီး တိုဘီးယပ်စ် ဘီလ်စထရောင်းမ်က ရှာ့ဘွန်ရဲ့ ကွပ်မျက်မှုအပေါ် စိတ်ပျက်ဖွယ်ရာလို့ ပြောဆိုတုံ့ပြန်ခဲ့ပြီး အရေးမယူဖို့ ဆွီဒင်က အီရန်ကို ပန်ကြားခဲ့တယ်လို့ ပြောခဲ့ပါတယ်။

“သေဒဏ်ဟာ လူမဆန်ဘဲ နောက်ပြန်မဆုတ်နိုင်တဲ့ ပြစ်ဒဏ်ဖြစ်ပြီး ဆွီဒင်က ကျန်တဲ့ EU နိုင်ငံတွေနဲ့အတူ အခြေအနေ အားလုံးမှာ ရှုတ်ချပါတယ်” လို့ သူက ဆက်ပြောပါတယ်။

အီရန်လုံခြုံရေးတပ်ဖွဲ့တွေဟာ အိမ်နီးချင်းတူရကီ နိုင်ငံထဲမှာ ရှာ့ဘွန်ကို ဖမ်းဆီးခဲ့ပြီး အီရန်မြို့တော် တီဟီရန်ဆီ ခေါ်သွားတယ်လို့ ၂၀၂၀ ခုနှစ်မှာ အီရန်က ပြောခဲ့ပါတယ်။

၁၉၈၈ ခုနှစ်က အီရန် အစ္စလာမ္မစ်သမ္မတနိုင်ငံမှာ နိုင်ငံရေးအကျဉ်းသားတွေကို အစုလိုက် အပြုံလိုက် ကွပ်မျက်မှုမှာ အီရန်အရာရှိဟောင်းတဦးကို ဆွီဒင်တရားရုံးက တသက်တကျွန်း ပြစ်ဒဏ်ချမှတ်ခဲ့လို့ အီရန်နဲ့ ဆွီဒင်ကြား ဆက်ဆံရေး ယိုယွင်းလာခဲ့ပါတယ်။