ပရီးမီးယားလိဂ်ချန်ပီယံဆုဖလားရယူဖို့ မျှော်လင့်နိုင်ကြောင်း မန်ယူတိုက်စစ်မှူး ရက်ရှ်ဖို့ဒ်က ပြောကြားလိုက်ပါတယ်။
မန်ယူအသင်းဟာ မနေ့ညက ပွဲစဉ်မှာ လက်စတာကို ၃ ဂိုး ဂိုးမရှိနဲ့ အနိုင်ရခဲ့ပြီးနောက် အမှတ် ပေးဇယားပထမနေရာက အာဆင်နယ်ထက် တစ်ပွဲပိုကစားပြီး ၅ မှတ်အကွာ၊ ဒုတိယနေရာက မန်စီးတီးနဲ့ ၃ မှတ်ကွာအနေအထားကိုရောက်ရှိလာခဲ့တာပါ။
ယူနိုက်တက်အသင်းအနေနဲ့ ချန်ပီယံ မျှော်လင့်ချက်ရှိနေပြီလားဆိုတဲ့ စကိုင်းစပေါ့ရုပ်သံရဲ့ မေးမြန်းမှုအပေါ် ရက်ရှ်ဖို့ဒ်က မျှော်လင့်ချက်ရှိ နေပြီဖြစ်ပြီး အရင်ကထက်ပိုမိုနီးစပ်လာတယ်လို့ ပြန်လည်ဖြေကြားခဲ့တာပါ။
“ချန်ပီယံဆုအတွက် မျှော်လင့်နိုင်တာသေချာတာပေါ့။ ကျနော်တို့ ထိပ်ဆုံးက နှစ်သင်းနဲ့ နီးကပ်လာပါပြီ။ တချိန်တည်းမှာပဲ ပြိုင်ဘက်နှစ်သင်းစလုံးကလည်း အမှန်တကယ်ခြေစွမ်းပြနေလို့ ကျနော်တို့ဘက်က ကိုယ့်အလုပ်ကိုယ်ပဲ အာရုံစိုက်လုပ်ဆောင်သွားဖို့လိုတယ်။ အမှတ်တွေ စုဆောင်းနိုင်လာတာနဲ့အမျှ ချန်ပီယံမျှော်လင့်ချက်ကလည်းဖြစ်လာနိုင်တယ်”လို့ ရက်ရှ်ဖို့ဒ်ကပြောပါတယ်။
ရက်ရှ်ဖို့ဒ်ဟာ လက်စတာနဲ့ ပွဲမှာ ၂ ဂိုးသွင်းခဲ့လို့ ပရီးမီးယားလိဂ် ၁၄ ဂိုးအထိရှိလာခဲ့ပြီး ပြိုင်ပွဲစုံမှာတော့ ၂၄ ဂိုး အထိသွင်းယူ ထားပြီးဖြစ်ပါတယ်။
မန်ယူတိုက်စစ်မှူး ရက်ရှ်ဖို့ဒ်အနေနဲ့ တရာသီအတွင်းမှာ သွင်းဂိုး ၂၀ အနည်းဆုံးသွင်းယူနိုင်လိမ့် မယ်လို့ နည်းပြတန်ဟတ်ဂ်က မျှော်မှန်းထားပါတယ်။
ရက်ရှ်ဖို့ဒ်ဟာ ရာသီအစပိုင်းက အသင်းပြောင်းရွှေ့ဖို့ အထိသတင်းထွက်ခဲ့ပေမဲ့ နောက်ပိုင်းပွဲစဉ်တွေမှာ ခြေစွမ်းပြဂိုးတွေသွင်းနိုင်ခဲ့ပါတယ်။
သူဟာ လီဗာပူးနဲ့ပွဲမှာတစ်ဂိုး၊ အာဆင်နယ်နဲ့ပွဲမှာ နှစ်ဂိုးသွင်းခဲ့ပြီး ပွဲစဉ် ၆ ပွဲကစားအပြီးမှာ သွင်းဂိုး ၃ ဂိုး၊ ဂိုဖန်တီးမှု ၂ ကြိမ်ပြုလုပ်နိုင်ခဲ့တာပါ။
နည်းပြတန်ဟတ်ဂ်ကတော့ ရက်ဖို့ဒ်အနေနဲ့ တစ်ရာသီအတွင်းမှာ ဂိုး ၂၀ အနည်းဆုံး သွင်းယူနိုင်မယ့်သူဖြစ်ပြီး ယူနိုက်တက်တိုက်စစ်ကို ဦးဆောင်နိုင်မယ့်သူလို့ ချီးကျူးခဲ့တာပါ။
နည်းပြတန်ဟတ်ဂ်ဟာ ရော်နယ်ဒိုကိုအရန်ခုံမှာ ထားရှိပြီး အင်္ဂလန်တိုက်စစ်မှူးရှက်ရှ်ဖို့ဒ်ကိုပဲ ဦးစားပေး တိုက်စစ်မှူးအဖြစ်သတ်မှတ်ထားကြောင်း The Sun သတင်းဌာနကို နည်းပြတန်ဟတ်ဂ်ကပြောပါတယ်။
ရက်ဖို့ဒ်ဟာ မန်ယူအသင်းနဲ့အတူ ခြေစွမ်းကောင်းပြသနေတာ ကြောင့် အင်္ဂလန်လက်ရွေးစင်အသင်းမှာလည်း ပြန်လည်ရွေးချယ်ခံရဖို့ရှိနေပါတယ်။
