စူပါတိုင်ဖွန်း Noru ဟာ စက်တင်ဘာ ၂၇ ရက်မှာ ကမ်းရိုးတန်းဘက်ကို ဦးတည် ရွေ့လျားနေတာကြောင့် ဗီယက်နမ်နိုင်ငံက တချို့ဧရိယာတွေမှာ ဒေသစံတော်ချိန် အင်္ဂါနေ့ ညနေပိုင်းကတည်းက လူတွေကို သူတို့နေအိမ်တွေကနေ အပြင်ထွက်ခွာတာကို တားမြစ်မိန့် ထုတ်ထားပါတယ်။
ရာနဲ့ချီတဲ့ လေကြောင်းခရီးစဉ်တွေကို ရပ်နားထားရပြီး ဒါနန်း မြူနီစီပယ် ကမ်းရိုးတန်းမြို့နဲ့ ဗီယက်နမ်နိုင်ငံရဲ့ တခြားဒေသတွေရှိ မူလတန်းနဲ့ အလယ်တန်း ကျောင်းတွေကိုလည်း ပိတ်ထားရပါတယ်။
Noru မုန်တိုင်းဟာ လူစည်ကားတဲ့ ဒါနန်းမြို့ကို ဦးတည်လာတာကြောင့် ဒါနန်းမှ လူပေါင်း ၁ သိန်းကျော်ကို ဘေးလွတ်ရာ ရွှေ့ပြောင်းပေးခဲ့ရပါတယ်။
မုန်တိုင်းဟာ စံချိန်တင် အကြီးမားဆုံး မုန်တိုင်းတွေထဲက တခုဖြစ်နိုင်ကြောင်း ခန့်မှန်း တွက်ချက်နေကြပါတယ်။
ဒါနန်းမှာ နေထိုင်သူအတော်များများဟာ စားနပ်ရိက္ခာနဲ့ မရှိမဖြစ် လိုအပ်တဲ့ပစ္စည်းတွေကို စုဆောင်းဖို့ စျေးတွေကို အပြေးအလွှား သွားဝယ်ထားကြပြီး ကုန်းတွင်းပိုင်းကို ဝင်ရောက်လာမယ့် စူပါတိုင်ဖွန်းအတွက် ကြိုတင်ပြင်ဆင်မှုတွေ လုပ်နေပါတယ်။
ကမ်းရိုးတန်း တံငါသည်တွေဟာ မုန်တိုင်းဒဏ်ကနေ ခိုလှုံဖို့ ဆိပ်ကမ်းကို ပြန်လာခဲ့ကြပါတယ်။
ဒါနန်းမှာ သဘာဝဘေးအန္တရာယ်အဆင့်ကို ဗီယက်နမ်က ဒုတိယအမြင့်ဆုံးအဆင့်ဖြစ်တဲ့ အဆင့် ၄ ကို တိုးမြှင့်ထားပါတယ်။
ဒါနန်း၊ Phu Bai၊ Phu Cat နဲ့ Pleiku လေဆိပ်တွေကို ဗုဒ္ဓဟူးနေ့ မွန်းတည့်ချိန်အထိ ပိတ်ထားမှာဖြစ်ပါတယ်။ အဲဒီလေဆိပ်တွေကနေ ထွက်ခွာမယ့် လေယာဉ်အားလုံးကို ဆိုင်းငံ့ထားကြောင်း ဗီယက်နမ်လေကြောင်းလိုင်းမှ ပြောရေးဆိုခွင့်ရှိသူက ပြောကြားခဲ့ပါတယ်။
ဗီယက်နမ် လေကြောင်းလိုင်းတွေဟာ ခရီးသွားတွေကို သူတို့ရဲ့ ခရီးစဉ်တွေ အနှောင့်အယှက် မဖြစ်စေဖို့ မုန်တိုင်းဆိုင်ရာ အချက်အလက်တွေကို ရှာဖွေဖို့လည်း တိုက်တွန်းထားပါတယ်။
မုန်တိုင်းငယ်ဟာ ဗုဒ္ဓဟူးနေ့ ၁၉း၀၀ နာရီ အချိန်လောက်မှာ အပူပိုင်းမုန်တိုင်းငယ်အဖြစ် အားပျော့သွားလိမ့်မယ်လို့ ခန့်မှန်းထားပါတယ်။
တရုတ်နိုင်ငံအရှေ့ပိုင်း Zhejiang ပြည်နယ်ကနေ ဒီနေ့မှာ ကုန်းတွင်းပိုင်းကို ဝင်လာမယ့် တိုင်ဖွန်းမုန်တိုင်း မွေဖာအတွက် တရုတ်အစိုးရက အရေးပေါ်တုံ့ပြန်ရေး အဆင့်ကို အင်္ဂါနေ့မှာ အဆင့်မြှင့်တင်ခဲ့ပါတယ်။
တရုတ်နိုင်ငံရဲ့ အမျိုးသားရေကြီးမှု ထိန်းချုပ်ရေး၊ တိုင်ဖွန်းမုန်တိုင်းနှင့် မိုးခေါင်ရေရှား ကယ်ဆယ်ရေးဌာနချုပ်ရဲ့ အဆင့်လေးဆင့် တုံ့ပြန်ရေးစနစ်မှာ တတိယအမြင့်ဆုံးအဆင့်ကို သတ်မှတ်ခဲ့တာပါ။
အခြေအနေကို တုံ့ပြန်တဲ့အနေနဲ့ တိုင်ဖွန်းမုန်တိုင်းအတွက် လက်တွေ့ကျတဲ့ အစီအမံတွေ အကောင်အထည်ဖော်ဖို့ မုန်တိုင်းဒဏ်ခံ ပြည်နယ်တွေကို တောင်းဆိုခဲ့ပါတယ်။
အမျိုးသား အရေးပေါ်စီမံခန့်ခွဲရေးဌာနမှ တာဝန်ရှိသူတွေက အန္တရာယ်ရှိနိုင်ခြေ အားလုံးကို ဖော်ထုတ်ဖို့နဲ့ ဘေးကင်းတဲ့နေရာတွေဆီကို ရွှေ့ပြောင်းပေးနိုင်ဖို့ အာဏာပိုင်တွေက တာဝန်ပေးထားပြီး ကမ်းပေါ်မှာ ရေတပ်သားတွေ ခိုလှုံဖို့ ညွှန်ကြားထားပါတယ်။
သင်္ဘောတွေကို ဆိပ်ကမ်းတွေဆီ ပြန်ပို့ဖို့ အမိန့်ပေးထားတယ်လို့ အမျိုးသား အရေးပေါ်စီမံခန့်ခွဲမှုဌာနက ပြောပါတယ်။
မွေဖာမုန်တိုင်းဟာ အင်္ဂါနေ့ ဒေသစံတော်ချိန် မွန်းလွဲ ၂နာရီမှာ ကျဲ့ကျန်းပြည်နယ် နင်ဘိုမြို့ ကမ်းရိုးတန်းရဲ့ အရှေ့တောင်ဘက် ကီလိုမီတာ ၄၀၀ လောက်အကွာမှာရှိပြီး မုန်တိုင်း ဗဟိုချက်နားက လေတိုက်နှုန်းဟာ တနာရီကို ကီလိုမီတာ ၁၅၀ ထက်မနည်းရှိတယ်လို့ ဒေသဆိုင်ရာ မိုးလေဝသဌာနက ဆိုပါတယ်။
တိုင်ဖွန်းဟာ ကျဲ့ကျန်းပြည်နယ်နဲ့ အိမ်နီးချင်း ကျန်စုပြည်နယ်ရဲ့ တချို့နေရာတွေမှာ တောင်ပေါ်ရေကြီးတာတွေနဲ့ မြေပြိုတာတွေ ဖြစ်စေနိုင်တယ်လို့ ကျွမ်းကျင်သူတွေက သတိပေးထားပါတယ်။
