အမျိုးသားညီညွတ်ရေးအစိုးရ (NUG) ဂျပန်နိုင်ငံဆိုင်ရာ ကိုယ်စားလှယ်ရုံးအဖွဲ့ဝင်တွေနဲ့ ဂျပန်နိုင်ငံရှိ နွေဦးတော်လှန်ရေးအင်အားစုတွေရဲ့ ဒုတိယအကြိမ်တွေ့ဆုံပွဲကို ဒီဇင်ဘာ ၂၅ ရက်က တိုကျိုမြို့မှာ ကျင်းပရာမှာ မကြာသေးခင်ကမှ မြန်မာပြည်အကျဉ်းထောင်က ပြန်လွတ်လာတဲ့ ဂျပန် ဒါရိုက်တာ တိုရူကူဘိုတာလည်း ပါဝင်တက်ရောက်ခဲ့ပါတယ်။

မှတ်တမ်းရုပ်ရှင်ရိုက်ကူးတဲ့ ဂျပန်ဒါရိုက်တာ   တိုရူကူဘိုတာဟာ  ရန်ကုန်မှာ ဆန္ဒပြပွဲ ရိုက်ကူးနေတုန်း ဖမ်းဆီးခံရကာ ထောင်ဒဏ် ၁၀ နှစ်ချမှတ်ခံရပြီး နိုဝင်ဘာ ၁၇ ရက်မှာ အင်းစိန်အကျဉ်းထောင်ကနေ  လွတ်ငြိမ်းခွင့်နဲ့ ပြန်လွတ်လာကာ ဂျပန်နိုင်ငံကို ပြန်ရောက်ရှိလာခဲ့တာပါ။

စစ်ကောင်စီရဲ့ အကျဉ်းထောင်တွင်း အတွေ့အကြုံတွေနဲ့ သူ့ရဲ့မြန်မာပြည်အတွေ့အကြုံတွေကို ဂျပန်ဒါရိုက်တာ   တိုရူကူဘိုတာက ပြန်လည် မျှဝေသွားခဲ့ပါတယ်။

ဂျပန်ရောက်တော်လှန်ရေးအင်အားစုတွေနဲ့ NUG ဂျပန်ရုံးအကြား နွေဦးတော်လှန်ရေးကာလ အခုထက် ပိုမိုချိတ်ဆက်ဆောင်ရွက်သွားနိုင်ဖို့ အခုလို ဒုတိယအကြိမ် လူထုနှင့် တွေ့ဆုံပွဲကျင်းပတာဖြစ်ပြီး NUG အစိုးရဂျပန်နိုင်ငံဆိုင်ရာကိုယ်စားလှယ် စောဘလှသိန်း ဦးဆောင်တဲ့ NUG  ဂျပန်ရုံးက တာဝန်ခံတွေက စတင်ဖွဲ့စည်းချိန်ကစပြီး  လက်ရှိလုပ်ဆောင်နေမှုတွေ  NUG ဂျပန်ရုံးရဲ့ လုပ်ငန်းဆောင်တာတွေ ၊ရှေ့ဆက်သွားမယ့် လုပ်ငန်းစဉ်တွေကို ကဏ္ဍအသီးသီးအလိုက် ရှင်းလင်းပြောဆိုခဲ့ကာ ဂျပန်နိုင်ငံရောက်မြန်မာတွေရဲ့ မေးမြန်းချက်တွေကို ပြန်လည်ဖြေကြားခဲ့ပါတယ်။

ဂျပန်အစိုးရရဲ့ မူဝါဒက နိုင်ငံတကာရဲ့ မြန်မာနိုင်ငံအပေါ် ဆက်ဆံနေတဲ့ အခြေအနေတွေကို စောင့်ကြည့်နေပြီး နိုင်ငံတကာအတိုင်း လိုက်လံပြောင်းလဲဆက်ဆံလာနိုင်တယ်လို့ စောဘလှသိန်းက ပြောကြားခဲ့ပြီး  နှစ်ပေါင်း ၇၀ ကျော်ကြာ ပြည်တွင်းစစ်မီးကို အမြန်ငြိမ်းစေလိုတယ်လို့လည်း ဒီဗွီဘီကို ပြောပါတယ်။

အမျိုးသားညီညွတ်ရေးအစိုးရ ဂျပန်နိုင်ငံဆိုင်ရာကိုယ်စားလှယ်ရုံးကို ၂၀၂၂ ခုနှစ် ဇူလိုင်လ ၃၁ ရက်က တိုကျိုမြို့မှာ တရားဝင်စတင်ဖွင့်လှစ်ခဲ့တာ ဖြစ်ပါတယ်။

ဇော်ဇော်လှိုင်

ဂျပန်လူမျိုး မှတ်တမ်းရုပ်ရှင်ရိုက်ကူးသူ တိုရူကူဘိုတာဟာ မြန်မာနိုင်ငံမှာ စစ်ကောင်စီရဲ့ ထောင်ချခံရပြီးနောက် ဂျပန်နိုင်ငံကို ပြန်ရောက်ရှိလာတော့မယ်လို့ ဂျပန်ထိပ်တန်း အစိုးရပြောရေးဆိုခွင့်ရှိသူက နိုဝင်ဘာ ၁၇ ရက်မှာ အတည်ပြုပြောကြားလိုက်ပါတယ်။ 

“မြန်မာတာဝန်ရှိသူတွေရဲ့အဆိုအရ မစ္စတာ ကူဘိုတာဟာ ၁၇ ရက်နေ့ ညနေပိုင်းမှာ လေကြောင်းခရီးနဲ့ မြန်မာနိုင်ငံကနေ ထွက်ခွာမှာဖြစ်ပြီး မနက်ဖြန် ၁၈ ရက်နေ့မှာ ဂျပန်နိုင်ငံကို အစောဆုံး ပြန်ရောက်လာမှာပါ”လို့ အစိုးရအဖွဲ့ အတွင်းဝန်ချုပ် ဟိရိုကာဇု မာဆူနို က တိုကျိုမှာ ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့တာပါ။

အသေးစိတ် အချက်အလက်တွေကို သံရုံးကတဆင့် စုံစမ်းနေကြောင်းလည်း ပြောပါတယ်။  အသက် ၂၆ နှစ်အရွယ် ကူဘိုတာ ကို ဇူလိုင်လက ရန်ကုန်မြို့ရဲ့ ဆန္ဒပြပွဲတစ်ခုမှာ ဖမ်းဆီးခံခဲ့ရပြီး ပြီးခဲ့တဲ့လက စုစုပေါင်း ထောင်ဒဏ် ၁၀ နှစ် ချမှတ်ခံခဲ့ရတာပါ။ 

မစ္စတာ ကူဘိုတာကို ပြန်လွှတ်ပေးဖို့  မြန်မာနိုင်ငံဆိုင်ရာ ဂျပန်သံအမတ်ကြီး မာရူယာမက မြန်မာနိုင်ငံကို ထပ်ခါတလဲလဲ တိုက်တွန်းခဲ့ရကြောင်းနဲ့ သူ ဒီနေ့ ပြန်လွတ်လာတာဟာ ဂျပန်အစိုးရရဲ့ ပြင်းပြင်းထန်ထန် တောင်းဆိုမှုရဲ့ ရလဒ်ကြောင့်ဖြစ်ကြောင်း မြန်မာအာဏာပိုင် တွေက ရှင်းပြခဲ့တယ် လို့လည်း ဆိုပါတယ်။ 

ဂျပန်အစိုးရအနေနဲ့ ဂျပန်နိုင်ငံသားတွေရဲ့ ဘေးကင်းရေးအတွက် အစီအမံအားလုံးကို ဆက်လက် ဆောင်ရွက်သွားမှာ ဖြစ်ကြောင်းနဲ့ အကြမ်းဖက်မှုတွေ ချက်ချင်းရပ်တန့်ဖို့၊ နိုင်ငံတော်ရဲ့ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် ဖမ်းဆီးခံထားရသူတွေကို ပြန်လွှတ်ပေးဖို့၊ ဒီမိုကရေစီကိုအခြေခံပြီး ပြဿနာတွေကို ငြိမ်းချမ်းတဲ့နည်းနဲ့ ဖြေရှင်းဖို့ အာဆီယံရဲ့ အချက် ၅ ချက် သဘောတူညီချက်ကို အမြန်ဆုံး လိုက်နာဖို့လည်း  ဂျပန်အစိုးရအဖွဲ့ အတွင်းဝန်ချုပ် ဟိရိုကာဇု မာဆူနို က ပြောကြားခဲ့ပါတယ်။ 

မြန်မာနိုင်ငံမှာ ပြီးခဲ့တဲ့နှစ်ဖေဖော်ဝါရီလက စစ်တပ်က အာဏာသိမ်းပြီးကတည်းက ဒေါ်အောင်ဆန်းစုကြည်အပါအ၀င် အရပ်သားခေါင်းဆောင်တွေကို ဖမ်းဆီးပြီး နိုင်ငံရေး မတည်ငြိမ်မှုတွေ ကြုံနေရပါတယ်။ 

Photo-MRTV