ကနေဒါနိုင်ငံ တိုရွန်တို ပီယာဆန် နိုင်ငံတကာလေဆိပ်မှာ ဧပြီ ၁၇ ရက်က ဒေါ်လာ ၁၅ သန်းနီးပါး တန်ဖိုးရှိတဲ့ ရွှေနဲ့ တခြားအဖိုးတန်ပစ္စည်းတွေ ခိုးယူခံလိုက်ရတာကြောင့် ရဲတပ်ဖွဲ့က စုံစမ်းစစ်ဆေးနေတယ်လို့ သိရပါတယ်။
ပြီးခဲ့တဲ့ ဧပြီ ၁၇ ရက် ညနေပိုင်းမှာ ဒီအဖိုးတန်ကုန်ပစ္စည်းတွေ လေယာဉ်ပေါ်ကို ရောက်လာခဲ့ပြီးနောက် အခုလို ပျောက်ဆုံးသွားတာဖြစ်တယ်လို့ ဧပြီ ၂၀ ရက်နေ့မှာ ပီးလ် ဒေသဆိုင်ရာ ရဲအရာရှိဖြစ်သူ စတီဖင် ဒူဝီဗက်စတိုင်းက သတင်းစာရှင်းလင်းပွဲအတွင်း အတည်ပြုပါတယ်။
ဒီလေယာဉ်ဆင်းသက်ခဲ့ပြီးနောက် ပုံမှန်လုပ်ထုံးလုပ်နည်းအတိုင်း ကုန်ပစ္စည်းတွေချကာ သိုလှောင်ရုံကို ယူဆောင်သွားခဲ့ပေမဲ့လည်း အချိန်တခုအကြာမှာ ပျောက်ဆုံးသွားတာ ဖြစ်ကြောင်း ဒူဝီဗက်စတိုင်းက ပြောပါတယ်။
ဒူဝီဗက်စတိုင်းက “ဒီလို တန်ဖိုးကြီးကုန်ပစ္စည်းတွေ ရောက်လာခဲ့ပြီး နောက်ဆက်တွဲအနေနဲ့ ကုန်လှောင်ရုံထဲကနေ တရားမဝင်နည်းလမ်းတွေနဲ့အတူ ယူဆောင်သွားတာဖြစ်တယ်” လို့ သတင်းထောက်တွေကို ပြောပါတယ်။
အဖိုးတန်ကုန်ပစ္စည်းတွေ ပျောက်ဆုံးသွားကြောင်း အချိန်ခဏအကြာမှာပဲ ရဲတပ်ဖွဲ့ကို အကြောင်းကြားခဲ့တာဖြစ်သလို ဒီကုန်ပစ္စည်းကို သယ်ဆောင်လာခဲ့တဲ့ လေယာဉ်အနေနဲ့ ဘယ်ကလာပြီး ဘယ်ကိုနောက်ဆုံးသွားမယ် ဆိုတာကိုတော့ ဒူဝီဗက်စတိုင်းက ထုတ်ဖော်ပြောဆိုခဲ့ခြင်း မရှိပါဘူး။
ကက်သလစ် ဘုရားကျောင်းက ဖွင့်လှစ်ထားတဲ့ စာသင်ကျောင်းမှာ ကနေဒါရဲ့ ဌာနေတိုင်းရင်းသား ကလေးငယ်တွေ လိင်ပိုင်းဆိုင်ရာ ကိုယ်ထိလက်ရောက် စော်ကားခံရတဲ့ ကိစ္စကို ဧပြီ ၁၈ ရက်နေ့က တိုရွန်တိုမြို့မှာ ဆန္ဒပြခဲ့ကြပါတယ်။
ဒီအဖြစ်အပျက်ဟာ အမှန်တရားနဲ့ ပြန်လည်သင့်မြတ်ရေး ကော်မရှင်က ယဉ်ကျေးမှုတခုလုံး ဖျောက်ဖျက်ပစ်ဖို့ ကြိုးပမ်းမှု "cultural genocide" လို့ ခေါ်ဝေါ်သုံးနှုန်းတဲ့အထိ ဆိုးဆိုးရွားရွား ဖြစ်ခဲ့တာပါ။
ဧပြီ ၁ ရက်တုန်းက ပုပ်ရဟန်းမင်းကြီး ဖရန့်စစ်က ဘုရားကျောင်းကိုယ်စား ဝန်ချတောင်းပန်ခဲ့ ပါတယ်။
ကက်သလစ် ဘုရားကျောင်းမှာ တာဝန်ရှိသူတွေက ဒီလိုစိတ်ပျက်စရာကောင်းတဲ့ အပြုအမူ တွေကို ကျူးလွန်ခဲ့ကြတဲ့အတွက် ဘုရာသခင်ရှေ့မှောက်မှာ ခွင့်လွှတ်ပေးဖို့ တောင်းဆိုပါတယ်။
“လေးနက်တဲ့ နှလုံးသား၊ နာကျင်တဲ့ စိတ်နဲ့ တောင်းပန်ပါတယ်” လို့ ပုပ်ရဟန်းမင်းက မိန့်ကြားခဲ့တာပါ။
ဒါပေမယ့် ဆန္ဒပြသမားတွေကတော့ ဒီလို တောင်းပန်ရုံလောက်နဲ့ မကျေအေးနိုင်ကြဘဲ စော်ကားခံရတဲ့ ကလေးတွေရဲ့ နာမည်တွေကို ဘုရားရှိခိုးကျောင်းရဲ့ ခြံစည်းရိုးမှာ ချိတ်ဆွဲထားကြပါတယ်။
ဒီဟိုးလေးတကျော်အမှုနဲ့ ပတ်သက်တဲ့ ၂၀၀၆ ခုနှစ်တုန်းက သဘောတူညီချက်အရ ဘုရားကျောင်း က ဌာနတိုင်းရင်းသားအကျိုးပြုပရဟိတ ဖောင်ဒေးရှင်းကို ဒေါ်လာ ၆၃ သန်းကျော် ပေးအပ်ဖို့ တာဝန်ရှိတယ်လို့ တရားရုံးက ဆုံးဖြတ်ခဲ့ပါတယ်။
ဒါပေမယ့် ၂၀၁၅ ခုနှစ် တရားရုံးဆုံးဖြတ်ချက်က ၂၀၀၆ ခုနှစ် သဘောတူညီချက်အတိုင်း မဟုတ်တော့ဘဲ ဘုရားကျောင်းဘက်က ပေးရမယ့် သန်းနဲ့ချီတဲ့ နစ်နာကြေးငွေတွေကနေ ကင်းလွတ်ခွင့်ရတာပါ။
