အီသီယိုးပီယားနိုင်ငံ တီဂရေးဒေသမှာ ဇန်နဝါရီအစပိုင်းကတည်းက အစိုးရရဲ့လေကြောင်း တိုက်ခိုက်မှုကြောင့် အပြစ်မဲ့အရပ်သား ၁၀၈ ယောက် သေဆုံးခဲ့ရတယ်လို့ ကုလသမဂ္ဂ လူ့အခွင့်အရေးဆိုင်ရာမဟာမင်းကြီးရုံး (OHCHR) က ထုတ်ပြန်ပါတယ်။
OHCHR အဖွဲ့ ပြောရေးဆိုခွင့်ရှိသူ မစ္စလစ်ဇ်သရိုဆဲလ်က “ဒီနှစ်စကတည်းက အီသီယိုပီးယား လေတပ်ရဲ့ တိုက်ခိုက်မှုကြောင့် အရပ်သား အနည်းဆုံး ၁၀၈ ဦး သေဆုံးပြီး ၇၅ ဦး အပြင်းအထန် ဒဏ်ရာရထားပါတယ်” လို့ ဂျာနီဗာမြို့အခြေစိုက် သတင်းထောက်တွေကို ပြောခဲ့ပါတယ်။
အီသီယိုပီးယားနိုင်ငံ တီဂရေးဒေသအနောက်မြောက်ဘက် ဒီဒီဘစ်မြို့လေးရှိ စစ်ဘေးရှောင်ဒုက္ခသည်စခန်းတခုကို ညသန်းခေါင်မှာ အစိုးရလေကြောင်းက ဗုံးကြဲခဲ့တာကြောင့် ၅၆ ဦး ထက်မနည်း သေဆုံးခဲ့ပါတယ်။
ဒေသခံတွေရဲ့ ပြောကြားချက်အရ ဒုက္ခသည်စခန်းထဲမှာ အမျိုးသမီးတွေနဲ့ ကလေးတွေ အများအပြား ရှိပြီး ညအမှောင်ထဲ မရှောင်နိုင်ခဲ့ဘဲ ဒဏ်ရာရသူတွေလည်း အလွန်များပါတယ်။
အခုတိုက်ခိုက်မှုအပေါ် အီသီယိုးပီးယားအစိုးရနဲ့ စစ်တပ်က တစုံတရာ ပြောဆိုမှုမရှိပါဘူး။
အစိုးရစစ်တပ်နဲ့ သူပုန်တွေအကြား ၁၄ လဆက်တိုက် ပဋိပက္ခတွေ ဖြစ်နေခဲ့ပြီး အရပ်သားတွေ အပေါ် တိုက်ခိုက်မှုက အစိုးရက အမြဲတမ်း ငြင်းဆန်ပါတယ်။
